Ижкар-1 °C
25 -тӥ толшор 2021 Вордӥськон
18+

Удмурт нылпиослы «Тулкым» лагерь ужа Удмуртиын

  • 156
  • 0
Ижкар / Удмуртия
Удмурт нылпиослы «Тулкым» лагерь ужа Удмуртиын
Туспуктэм: vk.com (ТУЛКЫМ 2020)

Удмуртиын Ижкар вӧзысь «Ёлочка» лагерьын трос нылпиё, секыт улон югдуре сюрем но ӧлексы удмурт нылпиослы «Тулкым» лагерь ужа. Со 6-тӥ толшоре усьтӥськиз но 15-тӥ толшорозь кыстӥськоз. Лагерьлэн ужез сярысь ивортодэтъя «Удмуртия» агентстволэн корреспондентэзлы кивалтӥсез Лариса Ускова вераз.

Туэ лагерь тямысэтӥзэ ортче ини, Лариса Ускова кивалтэм улсын – куатетӥзэ. Туэ сое «Тулкым. Тол» нимазы. Отчы 14 ёросъёсысь 10-17 аресъем 40 пиналъёс люкаськизы.

Соосын ньыль пӧртэм ӧръёсъя ужало: крезьгуран, туспуктон искусство, видеоискусство но блогерство, SMM. Со сяна, вань на витетӥ отряд – со вожатойёс. Соосын ачиз Лариса Ускова ужа.

Шумпотӥсько, милям со отрядмы туэ витетӥ арзэ ини, но али адӟиськом емышсэ. Милям туж зол туэ вожатойёсмы, валасесь, йӧноесь. Вожатойёс – со милям ик нылпиосмы
Лариса Ускова, «Тулкым» лагерьлэн кивалтӥсез

Крезьгурасьёсын Ижкарысь техникая кун университетысь студент Владимир Михайлов ужа. Лариса Усковалэн верамезъя, пиналъёс бас-гитараен, гитараен, синтезаторен шудыны дышетско. Фото лэсьтыны туспуктӥсь Максим Агафонов дышетэ.

Со сётӥське милям почти профессионально, малы ке шуоно милям быдэсак ужан тӥрлыкмы вань, умой дуно фотоаппаратъёсмы вань. Пиналъёс ракурс, горизонт сярысь гинэ тодон-валан уг басьто, кызьы ӧнерлыко коллаж, портрет, инкуазь съёмка лэсьтыны тодон-валан но басьто
Лариса Ускова, «Тулкым» лагерьлэн кивалтӥсез

Видеоискусство ӧрын дышетскисьёс туэ «Эктоника» ӵектослы клип снимать карозы. Соосын Кузебай Герд нимо гимназиысь дышетӥсь Владимир Вахрушев ужа. Пиналъёс «Айкай» театрлэсь кырӟанзэ бырйизы, соя клип лэсьтозы. Ужазы быдэс лагерь пыриськоз.

Озьы ик туэ нырысьсэ пиналъёс блогерлэн, SMM-ӧнерчилэн уженыз тодматско.

Ми сое азьло ик турттӥм пыртыны, но туж зол шугмиськом вал ӧнерчиослы. Нош туэ Вера Трефилова нуэ. Таре милям «Тулкым» лагерьмылэн Tik-Tok мерлыко вотэсын бамез но вань
Лариса Ускова, «Тулкым» лагерьлэн кивалтӥсез

Лариса Усковалэн кылъёсызъя, лагере вуылэм пиналъёс дорысьтызы «Тулкым» - со семья шуыса малпанэн кошко. Озьы туэ сменазэс но «Тулкым. Семья» нимазы.

Котькуд ар ми доры лыкто туж тунсыко, мудрон куноос, гурт адямиос, кудъёсыз та улонын кыӵе ке но бадӟым вормон басьтӥзы. Туэ ми семьяосты ӧтчаськомы. Кылсярысь, ми доры ветлӥзы Дмитрий но Зинаида Софроновъёс Шаркан ёросысь Порозысь. Зинаида ӵектосъёс бордын ужан сярысь вераз, нош Дмитрий гурт event сярысь вераз но со борды профориентационной тодон-валан но сётӥз на. Озьы ик Пётр но Анастасия Пушкинъёс ми доры ветлӥзы: журналистъёслэн семьязы сямен. Ӵуказе Иван но Юлия Белослудцевъёсты возьмаськом. Озьы ми туэ семья пыр тунсыко адямиосты возьматӥськом
Лариса Ускова, «Тулкым» лагерьлэн кивалтӥсез

Со сяна, туэ пиналъёс доры ньылетӥ арзэ ини «Эктоника» ӵектос вуоз. Но таяз арын позыръяськон ортчытыны уз, мылкыд сётон понна пумиськонэн. Озьы ик крезьгурась Александр Ашихмин, «Чукиндэр» огазеяськонлэн ёзчиосыз Вадим Крестьянинов но Августина Михайлова лыктозы.

Ми тыршӥськом гурт нылпиослы возьматыны сыӵе югдуръёсты, кудъёссэ ас гуртазы соослэн адӟемзы уг луы. Тани али мыным одӥгез нылаш шумпотыса шуэ: «Лариса Васильевна, нош мон туннэ «ВКонтакте» регистрироваться кари». Гуртаз солэн уг пӧрмы вал. Асьмеос понна со дышем мар ке кадь ини, нош соос понна со озьы ӧвӧл
Лариса Ускова, «Тулкым» лагерьлэн кивалтӥсез

Лагерьын нимысьтыз саклык профориентационной ужлы висъяло - пиналъёсты пӧртэм ӧнеръёсын тодмато.

Тросэз малпало, со пуксьыса тестъёс гожъян шуыса. Милям озьы ӧвӧл. Тани ӵуказе ми доры лыкто «Годекшурский продукт» предприятиысь. Соос куинетӥ арзэ ми доры ветло. Соос верало, кыӵе профессиос гуртын кулэ, гуртэ берытскыны урод ӧвӧл шуыса
Лариса Ускова, «Тулкым» лагерьлэн кивалтӥсез

Дышетскем сяна, пиналъёс шутэтско но. Соос понна пӧртэм ужрадъёс радъяло. Ваньмыз соос удмурт шӧмо луо. Кылсярысь, огез соос пӧлысь «Эктон-тыпыртон» нимаське. Со улсын котькуд отряд пӧртэм эктонъёс дася, туалазэ но, кудаз одно ик тыпыртонэз пыртэ.

Пусъём, «Тулкым» 2020-тӥ арын гужем ортчыны кулэ вал, но пандемиен сэрен сое радъяны ӧз луы. Лагерез толлы кельтӥзы. Лариса Усковалэн верамезъя, соин сэрен кӧня ке шуг-секытъёсын пумиськоно луиз. Со сяна, «Ёлочкаын» интернет лябен сэрен, туэ кунгож сьӧры улыны выжем удмуртъёсын герӟаськемзы ӧз луы, нош азьло аръёсы Португалие, Ирландие кошкемъёсын вераськылӥзы. Соос куназы дышетскон, отысь дышетсконниосы пырыны луонлыкъёс сярысь вераллязы. Калыккуспо пумиськонъёс интые мукет ужрадъёс радъяно луиз. Но гужем котькыӵе вакытэ ураме потыса шудыны луэ ке, толалтэ пиналъёс кырын кынмо. Соин ик ужрадъёс юртын ортчытоно луо. 

Ватсалом, лагерез  удмурт егитъёслэн «Шунды» огазеяськонзы радъя. 



Наверх
Вниз