Ижкар-1 °C
26 -тӥ толшор 2021 Пуксён
18+

«Шундыкар» лагерьлэн сменаез йылпумъяськиз Удмуртиын

  • 103
  • 0
Ижкар / Удмуртия
 «Шундыкар» лагерьлэн сменаез йылпумъяськиз Удмуртиын
Туспуктэм: vk.com (ШУНДЫКАР-2021)

3-11 толшоре Ижкар вӧзысь «Оранжевое настроение» нылпи лагерьын «Шундыкар» лагерьлэн 27-тӥ сменаез ортчиз. Туэ отчы Удмуртиысь гинэ 100 пиналъёс пыриськизы. Со сярысь ивортодэтъя «Удмуртия» агентстволэн корреспондентэзлы лагерьлэн кивалтӥсез, удмурт егитъёслэн «Шунды» огазеяськонзылэн тӧроез Алина Чернова вераз.

Пиналъёс 11 ӧръёсъя дышетскизы: литература (ӧнерчизы Богдан Анфиногенов), эстрада (Эльвира Панченко), дӥськут дизайн (Надежда Касаткина), журналистика (Александр Бикузин), видеоискусство (Егор Артемьев), фольклор (Ольга Тройникова), крезьгуро инструментъёсын шудон (Кирилл Кириллов но Владимир Жуйков), суредаськисьёс (Марина Степанова), кибашлыос (Владимир Кондратьев), театр (Дмитрий Корепанов) но программирование (Григорий Григорьев).

Котькуд ӧнерчилэн вал аслаз программаез. Эстарада отрядысь пиналъёс ансамбльын кырӟаны дышетскизы, концерт пуктӥзы. Программистъёс «Удмурт Alias» шудон приложение лэсьтӥзы. Театр отрядысь пиналъёс «Холокост» темая спектакль пуктӥзы
Алина Чернова, «Шундыкар» лагерьлэн кивалтӥсез

Крезьгурасьёс концерт пуктӥзы, озьы ик ик кырӟан гожтӥзы. Соин матысь дыре мерлыко вотэсъёсын тодматскыны луоз ини. Литература отрядысь пиналъёс мультфильмез удмурт кылэ берыктӥзы но лыдӟон ортчытӥзы. Дизайнеръёс турын-куаръёслэсь суредъёс лэсьязы. Видеоискусство отрядысь пиналъёс Tik-Tok мерлыко вотэсын «Шундыкарлэсь» бамзэ кылдытӥзы но отчы тик-токъёс гожъязы. Нош журналистъёс котькуд ӵукналы радиоверанъёс дасяллязы но пӧртэм амалъёсын ужаны дышетскизы.

Дышетскем сяна, шундыкарчиос шутэтскыса но вуизы. Туэ соос понна пӧртэм ужрадъёс дасязы.

Милям вал сыӵе ужрадъёс, кудъёсыз ӧй вал 2020-тӥ арын, кылсярысь, Олимпиада. «Шундывидение» шуыса но ми ортчытӥм. Тунсыко вал ужрадъёс. Пиналъёслэн котькуд отрядлэн «капсула временизы» вал, кудӥныз соос мукет дауре быгатӥзы выжыны. Сыӵе фантастической кыӵе ке программа вал
Алина Чернова, «Шундыкар» лагерьлэн кивалтӥсез

Со сяна, лагерьын, Удмуртилэн кунлыкезлы 100 ар тырмонлы сӥзьыса, «Удмуртия 100 ар ортчыса» программа ортчытӥзы. Со улсын пиналъёс вань-а 100 ар ортчыса удмуртлык, удмурт кыл но мукет юанъёсъя малпанъёссэс веразы.

Алина Черновалэн кылъёсызъя, «Шундыкаре» пыриськыны мылкыд карисьёслэн лыдзы уг усьы. Котькуд ар трос гинэ пиналъёс куриськонъёс келяло.

Лыкто удмурт кылын вераськисьтэм пиналъёс но, кудъёсыз валало гинэ, но соос туж быгатӥсесь, туж талантоесь, тон уд быгатӥськы соосты кутытэк, ӧнерчиос уг быгато. Ми адӟиськом, кызьы син азямы нылпи удмурт кылын вераськыны кутске, тырше но берло сцена вылын шуэ: «Мон ноку ӧй вераськы удмурт кылын, нош али мон яратӥсько удмурт кылэз, вераськисько соин». Со туж шумпотымон, куке нылпиос кутско тунсыкъяськыны но вераськыны
Алина Чернова, «Шундыкар» лагерьлэн кивалтӥсез

Тӧро пусйиз, шудыкарчиос котьку но верало, лагерьын туж шуныт омыр кылдытэмын шуыса. Ӧнерчиос но пиналъёслы вань тодон-валанзэс сётыны тыршо.

Школаын соос одӥгезлы дышетско, нош татын копак мукет дышетскон. Кин ке аслэсьтыз ӧнерзэ но шедьтыны быгатэ, выль тодон-валан басьтыны. Валтӥсь ужпумез «Шундыкарлэн» - удмуртлык со туж усто, туала шуыса возьматыны. Кулэ ӧвӧл вунэтыны сое
Алина Чернова, «Шундыкар» лагерьлэн кивалтӥсез

Ватсалом, пандемиен сэрен «Шундыкар» нырысьсэ толалтэ ортчиз. Но Алина Чернова пусйиз, со гужем радъяськылӥсь сменаослэсь воксё ӧз висъяськы шуыса, котьку сямен капчи мылкыдын но туж пайдалыко ортчиз.

Тодэ вайытом, та дыре Удмуртиын удмурт нылпиос понна «Тулкым» лагерь ужзэ азьланьтэ.



Наверх
Вниз