Ижкар+12 °C
16 -тӥ оштолэзь 2021 Удмуртарня
18+

Ижкарысь математикая дышетӥсь Удмуртилэсь «Россиысь арлэн дышетӥсез - 2020» огъяросси конкурсэ пыриськоз

  • 1589
  • 0
Волгоград / Россия
Ижкарысь математикая дышетӥсь Удмуртилэсь «Россиысь арлэн дышетӥсез - 2020» огъяросси конкурсэ пыриськоз
Туспуктэм: Удмуртиысь дышетонъя но тодосъя министерстволэн пресс-службаез

Ижкарысь 91 номеро школаысь математикая дышетӥсь Мария Ившина «Россиысь арлэн дышетӥсез - 2020» огъяросси вожвылъяськонын Удмуртилэсь данзэ утёз. Азьвыл со «Удмуртиысь арлэн дышетӥсез - 2020» ним басьтӥз вал. Со сярысь элькунысь дышетонъя но тодосъя министерстволэн пресс-службаез ивортӥз.

Сыӵе уровеньын вожвылъяськонын улосвылмес возьматон туж тулкымъяськымон но кылкутымон. Со мукет улосвылъёсысь ужъюлтошъёсын кусып шедьтыны но ужан амалъёсын люкиськыны луонлык. Сыӵе ужрадъёс «синъёсты ӝуатыны» юртто но ӧнеръя ужаны мылкыдэз выльысь бурдъяло. Конкурслы рос-прос дасяськиськом
Мария Ившина, Ижкарысь 91 номеро школаысь дышетӥсь

Вожвылъяськонлэн йылпумъясь люкетэз 25-тӥ толшорысен 2-тӥ тулыспалозь Волгоград улосвылын ортчоз.

Дышетӥсьёс «Методическая мастерская» но «Урок» конкурс эскеронъёсын быгатонлыкъёссэс возьматозы. Бӧрысь жюрилэн ёзчиосыз 15 лауреатъёсты быръёзы. Собере «Классный час» но «Мастер-класс» конкурс эскеронъёс радъяськозы, соя вить призёръёсты шараялозы.

Огаз конкурс эскеронын усьтэм урок ортчытон чакламын. Мон 6-тӥ класслы математикая урок дасясько. Туннэ 97-тӥ школаын эскерон урок ортчытӥсько, ваньзэ рос-прос кареме потэ. Соизлы яке таизлы валатонлы, шудонъёслы, амалъёслы нылпиослэсь реакцизэс азьвыл ик тодыны уг луы. Соин ик ваньмызлы рос-прос анализ лэсьтоно. Мукетаз туре потӥ ке, мыным классной час ортчытоно луоз. Нырысь-валысь 15 темаос сётэмын вал
Мария Ившина, Ижкарысь 91 номеро школаысь дышетӥсь

Ужрадлэн йылпумъясь люкетэз 2-тӥ тулыспалэ ортчоз. Со туэ выль сямен радъяськоз. Призёръёс пресс-конференция улсын журналистъёслэн, дышетӥсьёслэн, анай-атайёслэн, дышетскисьёслэн но дышетӥсьёсты дасясь вылӥ дышетсконниосысь студентъёслэн юанъёссылы валэктонъёс сётъялозы. Йылпумъянъсъя вить устоосыз пӧлысь вормисез шараялозы.

Конкурсэ оглом 85 дышетӥсьёс пырисько. Собыдӟа конкуренция дыръя вормись луыны – секыт ужпум. Ваньмыз луыны быгатэ! Мон понна конкурсэ пыриськон – бадӟым вормон. Мон асме ушъяло, дыр, та уже понна, ӧй ке но вормы. Валамон ини, котьку вормисьёс пӧлын луэм потэ, аслым вылӥ ужпумъёслы мылкыд сётоно!
Мария Ившина, Ижкарысь 91 номеро школаысь дышетӥсь

Пусъём, Мария Ившина математикая дышетӥсь луыса 10 арлэсь кема ужа ини. Ддышетӥсьлэсь сюрессэ Кезысь 1 номеро школаын мытӥз. Со ӧнер устолыкъя конкурсъёсы туж мыло-кыдо пыриське. 

Тодэ вайытом, кылем арын «Удмуртиысь арлэн дышетӥсез» вожвылъяськонэ 280-лэсь трос куриськонъёс вуизы вал. Удмуртиысь кык педагогъёс анай кылъя дышетӥсьёслэн огъяросси мастер-классазы вормисьёс пӧлы пыризы



Наверх
Вниз