Ижкар+13 °C
13 -тӥ куартолэзь 2021 Покчиарня
18+

Глаз ёросысь школа Россиысь огез устоез луиз

  • 693
  • 0
Куреггурт / Удмуртия
Глаз ёросысь школа Россиысь огез устоез луиз
Туспуктэм: vk.com (МОУ "Куреговская СОШ")

Глаз ёросысь Куреггуртысь шор ёзо школа «500 лучших образовательных организаций страны – 2021» огъяросси конкурсын «Лучшая школа с этнокультурным компонентом – 2021» номинациын лауреат луиз. Вожвылъяськонлы йылпумъянъёс 15-18 оштолэзе Санкт-Петербургын дышетӥсьёслэн «Моя страна» III огъяросси ӧтчамзы улсын лэсьтӥзы. Со сярысь ивортодэтъя «Удмуртия» агентстволэн корреспондентэзлы школаысь удмурт кылъя но литературая дышетӥсь Маргарита Чибышева вераз.

Солэн кылъёсызъя, та вормонзы дышетӥсьёслэн ужамзылы луыса гинэ ӧвӧл, пиналъёслэн но, анай-атайёслэн но валче тыршемзылы луыса вуиз.

Школаямы озьы ужмы радъямын, кытын нылпи садысен кутскыса, школаез быдтэмъёс дорозь школа улонэн пӧзиськомы
Маргарита Чибышева, Куреггуртысь шор ёзо школаысь удмурт кылъя но литературая дышетӥсь

Туннэ нуналлы Куреггуртысь школаын 69 пиналъёс дышетско. Удмурт кылэз ваньзы ик уг тодо ни ке но, дышетыны ваньзы ик дышето. Солы котькуд классын арнялы быдэ куинь час висъяло.

Со сяна, пӧртэм йӧскалык ужрадъёс ортчытъяло. Йӧскалык ужпумъёсты анай-атайёслы кенешонъёсын но ӝуткало.

Та ласянь быдэс ар ӵоже вис карытэк уж нуиське. Дышетӥсьёс асьсэос пӧртэм конференциосы, конкурсъёсы пырисько. <…> Нылпиослы нимысь ужрадъёс нуисько удмурт шаерлэн вордскем нуналэзлы, удмурт кыллэн нуналэзлы но анай кыллэн нуналэзлы сӥзьыса
Маргарита Чибышева, Куреггуртысь шор ёзо школаысь удмурт кылъя но литературая дышетӥсь

Маргарита Чибышевалэн кылъёсызъя, школазы Глазкарысь пединститутэн, озьы ик элькун газетъёсын но журналъёсын, телерадиокомпаниен юн кусыпъёс возе. Озьы ик Якшур-Бӧдья ёросысь Мукши школаен, Балезино ёросысь Пыбья, Люк школаосын, Глазкарысь 17-тӥ школаен эшъяське.

Дышетӥсь школазылэн кивалтӥсезлы, ужъюлтошъёсызлы но анай-атайёслы тау кариз. Соостэк номыр ӧз пӧрмысал шуыса пусйиз.

Со (кивалтӥсьсы – ред.) милям ӟуч ке но ачиз, вань удмурт ужрадъёсты туж мылысь-кыдысь поддержать каре, отчы пыриськоно шуэ. Собере анай-атайёслы бадӟым тау шуэме потэ, котькыӵе ужрадэ пыриськыны куриськом, соослэн ноку но пумит ваземзы ӧвӧл. Собере коллективмы но зол шуысал, таӵе ужрадъёсы пыриськиськомы бере
Маргарита Чибышева, Куреггуртысь шор ёзо школаысь удмурт кылъя но литературая дышетӥсь

Пусъём, Куреггуртысь шор ёзо школа та вожвылъяськонэ куинетӥзэ пыриськиз.

Тодэ вайытом, 2019-тӥ арын соос «Лучшая сельская школа» номинациын вормисьёс луизы. Сыӵе ик номинациын лауреат нимез 2020-тӥ арын но басьтӥзы. 



Наверх
Вниз