Ижкар+4 °C
19 -тӥ коньывуон 2021 Пуксён
18+

«АРТЭ» удмурт мерлыко огазеяськон кылдытӥзы Удмуртиын

  • 272
  • 0
Ижкар / Удмуртия
«АРТЭ» удмурт мерлыко огазеяськон кылдытӥзы Удмуртиын
Туспуктэм: vk.com (АРТЭ | Центр Этнокультурного Образования)

Удмуртиын удмуртлыкез улонлэн туала куронъёсызъя азинтон понна «АРТЭ» удмурт мерлыко огазеяськон кылдытӥзы. Солэн пуштросэз но ужпумъёсыз сярысь ивортодэтъя «Удмуртия» агентстволэн корреспондентэзлы Кузебай Герд нимо йӧскалык гимназилэн кивалтӥсезлэн ватсаса тодон-валан сётон ужъя воштӥсез, огазеяськонлэн кивалтӥсез Юлия Шахтина вераз.

Мерлыко огазеяськонэз удмурт кылэз дышетонын выль, пайдаё амалъёсын тодматон, пӧртэм тунсыко йӧскалык ӵектосъёсты улонэ пыӵатон понна малпазы. Солэсь ужзэ нырысь ик школаос пыр азинтыны чаклало.

Туннэ нуналлы быдэс этнокультурной образованиез кутоно ке, школа солэн одӥгез валтӥсез инъетэз луэ. <…> Валамон, удмурт кылмес дышето урокъёсын, формальной дышетон шуиськом. Нош милям школаосы неформальной дышетонэн удмурт мер инициативаосты тросгес пыртэммы потэ вал. Ми понна школаосты вырӟытыны, ӵектос амал пыр дышетыны, удмуртлыкен вырись пӧртэм огазеяськонъёсын, ужъюртъёсын соосты огазеяны, выль туала мерлыко шӧм пыртыны – валтӥсь ужпумъёс
Юлия Шахтина, «АРТЭ» мерлыко огазеяськонлэн кивалтӥсез

Юлия Шахтиналэн кылъёсызъя, ужзэс ёросъёсысь школаосы потаса кутскозы, уго туннэ нуналлы ӵапак гурт школаосын ужасьёслы туала тодон-валанъёс, технологиос, мер кичӧлтонъёс уг тырмо.

Соин ик соос понна семинаръёс радъялозы, кытын ӵектосъёсъя шудон пыр «мозговой штурм» ортчытозы.

Со пыр валасалмы, кыӵе туннэ нуналлы шуг-секытъёссы вань но азинскыны луонлыкъёссы. Со сяна, дорожной картамы пӧрмысал, мар бордын ужаны кулэ. Со сыӵе эскерон блок милям ужамы
Юлия Шахтина, «АРТЭ» мерлыко огазеяськонлэн кивалтӥсез

Собере ӵектосъёсъя нодъясь луыны дышетон понна «Веме» программа радъялозы. Со улсын озьы ик ӵектосъёсын ужаны дышетозы.

Со сяна, «Удмурт кейс-чемпионат» ортчытозы. Отчы пиналъёс но, дышетӥсьёс но, удмуртлыкез азинтон бордын ужасьёс но пыриськыны быгатозы. Ужрад ӵошатскон выллем луоз, нош вормисьлы ӵектоссэ «Росмолодёжь» конкурсэ келяны дасяны юрттозы.

Со туж кулэ, малы ке шуоно егитъёс, 14 аресысен, соос уггес пырисько ай (грант утон понна вожвылъяськонъёсы – ред.). Нош милям потэ вал мед удмуртъёс но тросгес пыриськозы шуыса. Соин ик ӵапак «Удмурт кейс-чемпионат», мыным потэ, сыӵе тунсыко амал луысал со ужез вырӟытыны
Юлия Шахтина, «АРТЭ» мерлыко огазеяськонлэн кивалтӥсез

Озьы ик мерлыко огазеяськонын тыршисьёслэн удмуртлыкен герӟаськем йӧскалык кичӧлтонъёсты лыдъяны-чотаны малпанзы вань. Ужрадлэн «Дор» нимыз луоз. Со онлайн амалэз ортчоз.

Удмуртлыкен герӟаськем пӧртэм ӵектосъёсын вырисьёс ужъёссэс милемлы келяны быгатозы, нош ми соосты огазе карыса сыӵе каталог выллем поттом. «Банк этнокультурных инициатив» шуиськом. Соос трос кадь, нош огазеяны инты, кытын соосты учкыны, адӟыны луэ, ӧвӧл. Со но сыӵе огъя уж луысал, кудӥз возьматэ туннэ нуналлы удмуртлыклэсь кужмо палзэ
Юлия Шахтина, «АРТЭ» мерлыко огазеяськонлэн кивалтӥсез

Со сяна, мерлыко огазеяськонэ пыриськисьёслэн мукет трос пӧртэм ужрадъёс ортчытыны малпанъёссы вань. Ваньмыз соос удмуртлыкез утён но азинтон, валэктон, дышетон, туала улонэн ӵош вамыштон понна.

Огазеяськонлэн ёзчиосыз пӧлазы артэ ужаны асьсэос кадь ик мыло-кыдо, удмуртлык понна висись, кылкутӥсь адямиосты возьмало. 



Наверх
Вниз