Ижкар-4 °C
5 -тӥ толсур 2021 Воскресенье
18+

Удмуртиысь укмыс дышетӥсьёс Классэн кивалтӥсьёслэн огъяросси форумазы мынозы

  • 265
  • 0
Москва / Россия
Удмуртиысь укмыс дышетӥсьёс Классэн кивалтӥсьёслэн огъяросси форумазы мынозы
Туспуктэм: Григорий Фомин

Удмуртиысь укмыс дышетӥсьёс 9-10 коньывуонэ Москваын Классэн кивалтӥсьёслэн огъяросси форумазы пыриськозы. Со сярысь элькунысь дышетонъя но тодосъя министерстволэн пресс-службаез ивортӥз.

Со Ижкарысь Ю. А. Гагарин нимо 62 номеро школаысь Татьяна Брылякова, 83 номеро гимназиысь Павел Юминов, Ярысь 1 номеро школаысь Татьяна Горбушина, 2 номеро школаысь Елена Яковлева, Сьӧлтаысь школаысь Нина Келарева, Якшур-Бӧдья ёросысь Чур черкогуртысь школаысь Елена Эссенкулова, Эгра ёросысь 4 номеро школаысь Надежда Корепанова, Киясаысь школаысь Ирина Мещерякова но Воткаысь М. Т. Калашников нимо 7 номеро кадет школаысь Роза Мелекесова.

Классэн кивалтӥсьёслы таӵе бадӟым ужрад кунын нырысьсэ ортче. Со дышетӥсьёсты сюлмаськытӥсь ужпумъёсты эскерыны но экспертъёслэсь малпанъёссэс кылзыны, выль тодон-валан басьтыны луонлык сётоз.

Форум улсын дышетӥсьёслы азьланяз юрттэт сётон но ужзылэсь данзэ будэтон, ӧнер быгатонлыкъёссэс азинтон но Россиын дышетӥсьёсты дасян амалъёсты умоятон, классэн кивалтӥсьлэн туала тусыз но дышетон психологи сярысь вераськыны ӧдъяло.

Россиысь калыкез дышетонъя министр Сергей Кравцов форум дышетӥсьёслы азьланяз ужаны мылкыд но выль амалъёс сётоз шуыса оскемзэ вераз.

Классэн кивалтӥсьёслэн нырысетӥез огъяросси форумзы – дышетӥсьёслэсь тодон-валанъёссэс азинтонын бадӟым вамыш. Уго соослы ас тодметсэс нуыны сяна, нылпи коллективлэсь, пичи огинлэсь ужзэ радъяны оскемын, кытын пиналъёс ог-огенызы кусып возьыны, эшъяськыны, ченгешонъёссэс сэрттыны-пертчыны дышетско. Ӵапак классэн кивалтӥсьёс, нылпиосты, соослэсь семьязэс, улон югдурзэс умой тодыса, соосты дышето но визьнодало но котькудзылы улонэн но дуннеен тодматскыны нимаз юрттыны быгато
Сергей Кравцов, Россиысь калыкез дышетонъя министр

Форум 4-10 коньывуонэ ортчоно Дышетӥсьёслэн огъяросси арнязылэн валтӥсь ужрадэз луоз. Со улсын дышетӥсьлэн ӧнерезлы но сое вӧлмытонлы сӥзем ужрадъёс ортчозы. Дышетӥсьёс тодмо теле- но радиоӵектосъёсы пыриськозы. Арня ӵоже «Учитель года России», «Воспитатель года России» но «Директор года России» огъяросси вожвылъяськонъёслы йылпумъянъёс лэсьтозы.

Пусъём, форуме пыриськон понна Россиысь дышетӥсьёслэсь 21 сюрслэсь трос куриськонъёс вуизы. Жюрилэн ёзчиосыз соосты пыр-поч эскеризы: конкурс анкетаез гожтэмзэс, вормонъёссэс, пыриськыны мылкыд каремзэс но мукетсэ.

Озьы, ужрадэ оглом классэн кивалтӥсь 1 сюрс дышетӥсьёсты бырйизы. Соослэн пӧртэм арлыдзы, пӧртэм опытсы, кар но гурт школаосын, «Точка роста» центръёсын, специализированной школа-интернатъёсын, кадет, казак классъёсын ужало

Кунысь классэн кивалтӥсьёс но визьнодан темаен, пиналъёсын ужан выль амалъёсын но мукет юанъёсын тунсыкъяськисьёс онлайн-трансляцие пыриськыны быгато. Соослы озьы ик электрон сертификатъёс сётыны чаклало. Онлайн-пыриськись сямен чӧлсконпусъя гожтӥськыны луэ.

Тодэ вайытом, 2022-тӥ арын Балезиноысь 5 номеро шор ёзо школаын дышетӥсьёсты дасянъя классъёс усьтозы.



Наверх
Вниз