Ижкар-4 °C
2 -тӥ толсур 2021 Покчиарня
18+

Историяя, кылъя но литературая удмурт институтлы 90 ар тырмонлы сӥзем тодосъя огъяросси конференци ортче Ижкарын

  • 349
  • 0
Ижкар / Удмуртия
Историяя, кылъя но литературая удмурт институтлы 90 ар тырмонлы сӥзем тодосъя огъяросси конференци ортче Ижкарын
Туспуктэм: Анжелика Тихонова

6-8 коньывуонэ Ижкарын «Финно-угры – славяне – тюрки: опыт взаимодействия» тодосъя огъяросси конференци ортче. Со Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтлы 90 ар тырмонлы сӥземын. Ужрадэ ивортодэтъя «Удмуртия» агентстволэн корреспондентэз но вуылӥз.

Конференцие оглом 160 адями пыриське. Удмуртиысь сяна, Россиысь улосвылъёсысь но кунгож сьӧрысь: Франциысь, Эстониысь, Финляндиысь, Туркмениысь, Азербайджанысь но Украинаысь. Тросэз – видеоконференци амалэн.

Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсез Михаил Альес пусйиз, институт туж секыт вакытэ – 1931-тӥ аре кылдӥз шуыса.

90 ар ӵоже ини коллектив финн-угор калыклэн но элькунлэн шудо-буро улонзы понна тырше. <…> Пусъеме потэ, институт асьмемыз ялан таӵе бадӟым ужрадъёсын шумпоттэ, центрмы но академи практика понна гинэ уг, элькунысь гуманитарной огинэз азинтон понна
Михаил Альес, Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсез

Институтлэн кивалтӥсезлэн социо-гуманитарной ӧръя воштӥсез, истори тодосъя доктор Людмила Бехтерева ужъюртысь ӧнерчиос пӧртэм ӧръёсъя ужало шуыса вераз. Нырысь ик со кылтодосъя ӧр. Кылсярысь, 2019-тӥ арын тодосчиос удмурт кыллэсь йӧскалык корпуссэ кылдытӥзы. Нош али удмурт кылын вераськонъя синтезатор кылдытон бордын тыршо. Соин 2021-тӥ ар пумын тодматыны чаклало.

Со ивортодэтъя технологиосты кылэ пыртыны луонлык, со чат-ботъёс, Алиса нерге выль продуктъёс кылдытон, кудъёсыз кылэз азинтон ужын кыӵе ке выль амалъёс луо, соос калыке паськыт вӧлмыны быгато
Людмила Бехтерева, Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсезлэн социо-гуманитарной ӧръя воштӥсез

Нош этнографиен герӟаськем ӧръя туэ тодосчиос «Народы Удмуртии» серизэс мытозы. Со улсын шаерамы улӥсь калыкъёс сярысь книгаос поттозы. Нырысетӥез пор калыклы сӥземын луоз.

Со туж азинлыко но кемалы ӵектос. Азьланяз ми удмуртъёслы, ӟучъёсты, бигеръёслы, бесерманъёслы, чувашъёслы сӥзем книгаос поттыны чакласьком
Людмила Бехтерева, Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсезлэн социо-гуманитарной ӧръя воштӥсез

Фольклорист, кылосбур тодосъя доктор Татьяна Владыкина пусйиз, конференциын ӝутӥськись ужпум нырысьсэ поттэмын ӧвӧл ини шуыса. Уго шаерамы кемаласен бигеръёс но, финн-угор калыкъёс но, ӟучъёс но валче уло. Вашкала дырысен ог-огзылэсь мазэс ке асэсто.

Соин наука удысын ужасьёслы со котьку тунсыко, кызьы со кусыпъёс вашкала дыръя вал, кызьы соос азинскизы, кыӵе соос али
Татьяна Владыкина, фольклорист, кылосбур тодосъя доктор

Тодосчилэн кылъёсызъя, Удмуртиын та вакытэ 130 пала калыкъёс лыдъясько. Шаермес котьку но нимало вал интыен, кытын пӧртэм калыкъёс тупаса уло. Соин ик сое сӧронтэм понна тыршоно.

Котькыӵе пӧртэм ужпумъёс вань, дыр, но, мыным потэ, соосты нимысьтыз лэчытатыны кулэ ӧвӧл, аслад калыкед сярысь малпаськоно. Асьмеос вераськиськомы асьмелэн кылмы сярысь, лулчеберетмы, азинсконъёсмы. Нош асьмеос асьмеды вунэтӥм ке, соку мукетъёсызлы но кулэ ум луэ. Соин ик нырысь ик асьмелы ужпум пуктыны кулэ, асьмелэсь мылкыдъёсмес, асьмелэсь удмуртлыкмес юнматыны но ӝутыны. Со тужгес но кулэез мыным потэ
Татьяна Владыкина, фольклорист, кылосбур тодосъя доктор

Конференци улсын куать секциос ужалозы. Озьы ик нырысетӥ удмурт гожъяськисьлы, тодосчилы, югдытӥсьлы Григорий Верещагинлы вордӥськем дырысеныз 170 ар тырмонлы сӥзьыса симпозиум ортчоз. Со сяна, институтысь тужгес арлыдоезлы ужасьлы Василий Ванюшевлы 85 арес тырмонэзлы сӥзем сӥё-дано кенешон радъяськоз.

Пусъём, конференцилэн сӥё-дано ужрадэз улсын институтын ужасьёсты пӧртэм пумо данъетъёсын пусйизы. Бадӟым лыдпусэнызы люкаськемъёсты «Айкай» театрысь артистъёс ӟечкылазы. Ужрад Ижкарысь йӧскалык лыдӟетъюртын ортчиз. Со сяна, конференцилэн нырысетӥ нуналаз институтын ужасьёс «История литературы Урала» книгаосынызы тодматӥзы. 



Наверх
Вниз