Ижкар-4 °C
5 -тӥ толсур 2021 Воскресенье
18+

Йӧскалык лулчеберетэз дышетон ужпумъёслы сӥзем кенешон ортчиз Ижкарын

  • 218
  • 0
Ижкар / Удмуртия
Йӧскалык лулчеберетэз дышетон ужпумъёслы сӥзем кенешон ортчиз Ижкарын
Туспуктэм: Майя Бывальцева

Россиысь финн-угор калыкъёслэн VII ӧтчамзылы дасяськон улсын 7-тӥ коньывуонэ «Удмурт Кенеш» огазеяськон кичӧлтэмен йӧскалык лулчеберетэз дышетон ужпумъёслы сӥзем котырес ӝӧк ортчиз. Ужрадэ ивортодэтъя «Удмуртия» агентстволэн корреспондентэз но вуылӥз.

Кенешонэ Удмурт кун университетлэн лыдӟетъюртаз ортчем пумиськонэ дышетонъя но тодосъя министерстволэн, йӧскалык политикая министерстволэн, вылӥ дышетсконниослэн ыстэм муртъёссы, Ижкарысь но Глазкарысь школаослэн кивалтӥсьёссы но дышетӥсьёс пыриськизы. Соос асьме элькунмы но быдэс финн-угор дунне понна лэчыт ужпумъёсты ӝутӥзы, соосты сэрттыны-пертчыны луонлыкъёс но амалъёс сярысь вераськизы.

Рос-прос ӵектонъёс дасяллям Йӧскалык дышетонъя институтысь ӧнерчиосты, соосты ужъюртлэн кивалтӥсез Надежда Ураськина шараяз. Кылсярысь, соос финн-угор кылъёсты дышетон удысысь экспертъёслэсь огъя лыдметсэс кылдытыны ӵекто. Та дыре программалы, учебниклы яке статьялы рецензия гожтыны дунъясьёсты шедьтыны ум быгатӥське, шуиз институтлэн кивалтӥсез.

Со сяна, Россиысь калыкъёслэн анай кылъёссыя федерал институтын котькуд финн-угор улосвыллэсь внештатной ужась яке координатор мед луоз вылэм шуыса пусйизы. Надежда Ураськиналэн кылъёсызъя, али Кыдёкысь Уйпалын улӥсь ӧжыт лыдъем калыкъёсын гинэ уж мынэ, потэ вылэм финн-угор калыкъёсын кусыпъёс мед юнматозы шуыса.

Озьы ик Йӧскалык дышетонъя институт финн-угор кылъёсты дышетон методикая но педагогикая огазе журнал кылдытыны но поттыны ӵектӥз. Али Scopus базае пырись журналын статьяез печатлан понна 80 сюрс манет тыроно, автор яке авторъёс асьсэ коньдонзэс сётоно луо. Финн-угор улосвылъёс понна журналын печатласькон дунтэк яке пичи дунын мед луыса, пусйиз Надежда Ураськина.

Йӧскалык дышетонъя институтлэн ӵектонъёсыз пӧлын дышетон но визьнодан теория но методика ӧръя огъя диссертаци кенеш кылдытон. Сотэк асьмелэн тодосъя кандидатъёсмы но, докторъёсмы уз луэ, пусйиз институтлэн кивалтӥсез.

Кенешонын шараям куд-ог ужпумъёсты улосвыл но муниципал ёзъёсын эскерыны луоз, нош ку-огзэ федерал ёзъёсын гинэ сэрттыны-пертчыны луоз.

Татын дэмланъёс туж тунсыко вал. Кызьы пиналъёсты мотивировать карыны, «Сириус» выллем центръёс усьтӥсько ке, соос финн-угор, национальной элькунъёсын одно этнокультурной компонентэз мед луоз шуыса. Собере олимпиадаосы, ӵошатсконъёсы пыриськись пиналъёс, куке вылӥ дышетсконниосы пыро, соослы балл ватсаса мед сётӥськоз шуыса
Татьяна Ишматова, «Удмурт Кенеш» огазеяськонлэн тӧроез

Та дыре школаын удмурт кылъя дышетӥсьёс уждунзы борды 15 процентъем ватсэт басьто. 1-тӥ куарусёнысен озьы ик ватсаса коньдон тыриськоз нылпи садын пиналъёсты удмурт кыллы дышетӥсьёслы. Та пумиськонын сыӵе ик амалэн мылкыдзэс ӝутыны дышетон юртъёслэн кивалтӥсьёссылэсь но ӵектӥзы. Соку со удмурт кылэз дышетыны мылкыд карисьёслэн куриськонъёссы шоры киыныз уз шонты ни, ужпумез сэрттыны-пертчыны тыршоз, лыдъяло кенешонэ пыриськемъёс. Нош интыосысь дышетонъя управлениослэсь ужан пайдалыксэс дунъяку, лыдэ басьтыны кулэ, кызьы соослэн кивалтӥсьёссы анай кылэз дышетыны эрикрадэз улонэ пыӵато.

Татьяна Ишматова пусйиз, таӵе кенешонъёс лулчеберет но иворъёсты вӧлмытон удысъёсъя радъяськозы на. Соосын герӟаськем ужпумъёсты вуоно ӧтчамын эскерозы.

Милемлы, кин отчы мыноз, делегатъёслы, капчигес луоз вераськыны калыклэн нимыныз, куке со эскеремын асьме ӧнерчиосын, кин та удысын ужа, и куке вань ни конкретной дэмланъёс, кудъёссэ верало со адямиос, кин ужа ни та системаын. Ми нырысь ик сое гожтыса келяськом 12-тӥ коньывуонозь Мордовие, резолюцие пыртэмын мед луозы шуыса. Со нырысетӥез. Кыкетӥез, докладчикъёсмы, кин отчы пыриськоз, соос но татысь материал басьтыны быгатозы
Татьяна Ишматова, «Удмурт Кенеш» огазеяськонлэн тӧроез

Тодады вайытом, Россиысь финн-угор калыкъёслэн ассоциацизылэн ӧтчамез 25-26 шуркынмонэ Мордовилэн шоркараз Саранскын ортчоз.



Наверх
Вниз