Ижкар-1 °C
27 -тӥ шуркынмон 2021 Кӧснунал
18+

Татарстанын улӥсь удмурт покчи нылпиос понна «Мудорвай» конкурс 2017-тӥ арын нош ик ортчоз

  • 1505
  • 0
Казань / Россия
Татарстанын улӥсь удмурт покчи нылпиос понна «Мудорвай» конкурс 2017-тӥ арын нош ик ортчоз
Фото: vk.com (Удмурты Татарстана | Татарстанысь удмуртъёс)

Татарстанын улӥсь удмурт покчи нылпиос понна «Мудорвай» конкурс 2017-тӥ арын нош ик ортчоз. Иворъёсъя «Удмуртия» агентстволы со сярысь вераз «Татарстан Элькунысь удмуртъёслэн йӧскалык лулчеберетъя автономизы» улосвыл мер огазеяськонлэн быдэсъясь кивалтӥсез Марина Иванова.

«Гуртъёсын пиналъёс удмурт кылын туж шер вераськыны кутскизы. Татарстанысь дышетонъя министерствое гожтэтъёс но гожтэмын ни вылэм сое кызьы ке но радъяно, удмурт кылэз (дышетон радлыке — ред.) пыртоно шуыса. <…> Семьяын мылкыдэз ӝутон понна конкурсэз радъяны кутским ми. Нырысь ик со нылпи садъёс понна гинэ вал. Со малпанысь нош куинь конкурс потоз. Али тани одӥгез луиз ни — «Мудорвай», нош кыкез вань ай — «Дышетсконниосын удмурт кыллы дышетонъя устоез амал но дышетонэз удмурт кылын нуон», толсуре луоз «Устоез нылпи сад» вожвылъяськон», — вераз Марина Иванова.

Нылпи садэ ветлӥсь пиналъёс понна «Мудорвай» вожвылъяськон 2016-тӥ арын куарусёнысен толсурозь мынӥз. Марина Ивановалэн кылъёсызъя, сое 200 сюрс манетъем грантэз утыса быдэстыны кылдӥз. Татарстанын 13 нылпи садъёсын удмурт кылэз дышето. Но пумен конкурс борды итӥськизы мукетъёсыз но, кытын удмурт пиналъёс вань. Оглом 315 нылъёс но пиос вожвылъяськонэ пыриськизы, соос суредаськизы, кырӟазы, эктӥзы.

«Тужгес тунсыкоез ми понна, пӧртэм калыкъёслэн эшъяськонзы ласянь учконо ке, — мукет пиналъёс со лулчеберетэ пыриськизы, милям лулчеберетамы пыриськизы. Соослы со тунсыко. Асьме эктонъёсты эктӥзы, асьме кырӟанъёсты кырӟазы… Со ик вань конкурс пыр мукет йӧскалык лулчеберетэз гажаны мылкыдэз пыӵатон. Эшшо семьяосын, анай-атайёслэн йырвизязы мар ке вырӟиз, та лулчеберет кулэ шуыса», — пусйиз Татарстанысь удмуртъёслэн автономизылэн быдэсъясь кивалтӥсез.

«Мудорвай» вожвылъяськон ваньмызлы кельшиз, соин ик сое 2017-тӥ арын но ортчыны пумкылъян кутӥзы. Кызьы ивортӥз Марина Иванова, та конкурсэз Татарстанысь йӧскалык дышетонъя программае пыртыны кулэ шуыса ӵектон вуиз. 



Наверх
Вниз