Ижкар-9 °C
6 -тӥ южтолэзь 2021 Кӧснунал
18+

Удмурт кылъя калыккуспо гужем школа усьтӥськиз Удмурт кун университетын

  • 708
  • 0
Ижкар / Удмуртия
Удмурт кылъя калыккуспо гужем школа усьтӥськиз Удмурт кун университетын
Туспуктэм: Григорий Фомин

Туннэ, 10-тӥ пӧсьтолэзе, Удмурт кун университетын удмурт кылэз дышетонъя калыккуспо гужем школа усьтӥськиз. Сое Удмурт кылосбуръя, финно-угороведениея но журналистикая институт радъя. Курсъёсы вить адями вуиз. Иворъёсъя «Удмуртия» агентстволы со сярысь вераз Институтысь журналистикая кафедралэн кивалтӥсез, кылосбур тодосъя кандидат, удмурт кылэз дышетонъя гужем школаез радъясь Дмитрий Ефремов.

«Вить кузя лыкто — кык кузя Венгриысь, одӥгез Венгриысь, но со немец, собере одӥгез Америкаысь (США) но одӥгез Финляндиысь. <…> Витез пӧлысь куинез студентъёс, кудӥз финн-угор кылъёсты дышето. Одӥгез фермер — Венгриысь немец — со ас мылкыд каремезъя удмурт кылэз дышетэ, со филолог ӧвӧл, но американец, кудӥз филолог ӧвӧл», — вераз Дмитрий Ефремов.

Солэн кылъёсызъя, вить адями пӧлысь кыкез удмурт кылэз валало ни, соин ик дышетскисьёс кык группалы люкемын луозы. Курсъёс пумын ваньзы асьсэ сярысь ке но удмурт кылын верыны быгатыны кулэ.

«Милям сыӵе но учыръёс луо, куке чик кылэз тодытэк лыктэм адями ачиз сярысь гань-гань ваньзэ вераны быгатэ, огшоры темаосъя но вераны быгатэ ни. Валтӥсез отын — удмурт шаере лыктыкузы соос кылэз рос-прос дышетыса ӧз вуттэлэ ке но, соос татын удмурт кылэн тодматскыса, удмурт калыкен тодматскыса, азьланяз дышетон мылкыдзы эшшо но ӟечгес мед луоз шуыса», — пусйиз гужем школаез радъясь.

Удмурт кылъя урокъёс сяна, дышетскисьёсты возьмало удмурт калыклэн историез но лулчеберетэз сярысь лекциос. Соос англи кылын мынозы. Со сяна, Воткае П. И. Чайковскийлэн музей-юртаз, Ижкарысь Кузебай Герд нимо йӧскалык музее ветлозы. Озьы ик куиськонъя но мунё лэсьтонъя, горд сюен ужанъя, кубызэн шудыны дышетсконъя, удмурт кырӟанъёсъя но эктонъёсъя мастер-классъёсы пыриськозы.

Удмурт кылэз дышетонъя гужем школа пӧсьтолэзь пумозь ужалоз.



Наверх
Вниз