«Шундыкар» лагерьлэн 25-тӥ сменаез йылпумъяськиз

Туннэ, 29-тӥ гудырикошконэ, «Шундыкар» лагерьлэн 25-тӥ сменаез йылпумъяськиз. Удмуртиысь, Башкортостанысь, Татарстанысь, Пермь шаерысь, Марий Элысь 95 нылъёс но пиос 11 ӧръёсъя выль тодон-валанъёс люказы, быгатонлыкъёссэс волятӥзы.

Смена пумын котькуд отряд возьматыны кулэ вал, мар соос лэсьтӥзы арня ӵоже. Кылсярысь, «Крезь лэсьтон» отрядын Быдӟым крезь но кубыз пӧрмытӥзы, соос огшоры макетъёс гинэ ӧвӧл — зэмос шудон инструментъёс. Ӧнерчизы Василий Широбоков верамъя, табере пиналъёс асьсэос но соосты лэсьтыны быгатозы ни.

«Со зэмос инструментъёс, соин мон туэ туж шумпотэмын, таӵе бадӟым ужез быдэстӥм шуыса. Инструментъёс зэмзэ но умоесь пӧрмизы, эшшо но Быдӟым крезь вашкала сяменгес лэсьтэмын, малы ке шуоно пулэсь колыкъёс отчы тыремын. Материалэ мынам аслам ваемын, гуртысь — кыз но, пужым но кутылӥм, собере сирпу но бадяр. Туэ нырысьсэ ай нылашмы вал (отрядын — ред.). Нылашлы секытгес, конечно, сётӥське, но юрттӥським, пиос но юрттӥськизы, нош пиос зэмос воргоронъёс кадь, соослэн туж умой пӧрмиз. Туэ электроинструментэн но пыртӥ ужан, малы ке шуоно соос куке ысъязы видео конкурсэ, электроинструментэн тросэз выро ни», — вераз Василий Широбоков.

«Тележурналистика» отрядысь нылъёс но пиос сменалэн йылпумъян нуналаз мерлыко роликъёссэс, иворъёсын сузьетсэс возьматӥзы. Со сяна, котькуд нунал газет поттылӥзы.

«Нылпиосылэсь ужамзэс «витьлы» ушъясал. Ми поттамы газет котькуд нунал, «Табаньёс» нимын вал милям газетмы. Пиналъёс асьсэос гожъязы заметкаос, интервьюос, блиц-опросъёс, статьяос, репортажъёс. <…> Куд-огез, кылсярысь, малпа пырыны тележурналистикае, журналист луэмез потэ, куд-огез, шуом, бырйиське на, кыӵе сюрестӥ солы мыноно, кыӵе ӧнер быръёно. Кинлы ке но туж секыт потӥз ужаны тележурналистын. Кин ке шуэ, ми кожаськом вал со туж капчи. <…> Зэмзэ, со секыт уж, солы дышетскыны кулэ. Малпасько, будозы соослэсь ӟеч журналистъёс», — пусйиз отрядлэн ӧнерчиез Вероника Ваулина.

«Театр» отрядысь пиналъёс Надежда Тэффилэн «Женский вопрос» пьесаезъя одӥг ёзо комедия пуктӥзы. Маскара веросъя 18 аресъем Катя нылкышноослэн интызы пумысен бугыръяське. Солы уг кельшы туала улонэн воргоронъёс кивалто шуыса. Но одӥг вакытэ ваньмыз йырчукин берытске — воргоронъёс но нылкышноос интыенызы воштӥсько...

«Кык ар куспын — сояз аре, соизлэсь азьвыл аръёсы — пуктӥм вал трагедиосты. Ӧнерчиос но шуо вал, ойдо, театръёс, комедия пуктэ ни шуыса. Туэ тани комедия малпам пуктыны. Светлана Михайловна Кибардиналы бадӟым-бадӟым тау, ойдо, тае мон оскалто берыктыны удмурт кылэ шуиз со. Пиналъёслы мон шуи — со туж на грани: переиграть кариды ке, со туж зол пошлой луоз, не доиграете ке — серем уз луы. Кышканъёс, конечно, вал. Но кышкаса улӥд ке, номыр уд басьты, мон малпасько озьы», — пусйиз театрлэн ӧнерчиез Дмитрий Корепанов.

«Шундыкар» — со нырысь ик дышетскон смена, лыдъя со. Татын пиналъёс выльзэ тодыны, асьсэдыз пӧртэм ӧръёсын эскеырны кулэ, нош шутэтскыны мукет лагерьёс вань.

«Дышетэммы потэ, возьматэммы потэ, мар со сыӵе удмурт культура, мар выльёсыз, кыӵе течениосыз вань шуыса, кыӵе ӧръёсъя ужаны быгато шуыса. <…> Мон кылем арын но, туэ но соослы верай: пичильтык сценкаосты удмурт кылын тӥ гуртады но басьтыны, пуктыны быгатӥськоды дышетӥсьёсыныды, нош кыӵе ке серьёзной произведениосты, соосты, нырысетӥез, туж зол секыт шедьтыны, кыкетӥез, соосты пуктыны тазьы школаын дыр но туж ик уг тырмы», — вераз Дмитрий Корепанов.

«Шундыкарын» но тэк улыны маза ӧй вал. Быръем ӧръя ужам сяна, шулдыръяськон ужрадъёслэсь но палэнскемзы ӧз поты. Лагерьын улон уен-нуналэн пӧзиз. 

«Куддыръя уйин но кулэ луиз ужаны, уг тырмы милемлы дыр, нунал уг тырмы ваньзэ лэсьтыны, ваньзэ вуттыны. Таӵе чебер кылбуръёслы — альманах поттыны, дӥськут дизайнлы — дэремъёс вурыны. Со сяна, программамы туж бадӟым — шулдыръяськон программа но, сое но кулэ вуттыны. Туж милям ваньзылэн потэ «Шундыкар» мед луоз кык арня, куинь арня шуыса. <…> Ми гожъяськом котьку, мед луоз тросгес шуыса, но ваньмыз пыкиське коньдон борды яке мукет кыӵе ке шуг-секытъёс борды. Но озьы но луэ — пиналъёс жадё. Соослэн туж трос ужрадъёссы, ӝог мынэ ваньмыз, пиналъёсмы но жадё, соин ик малпаськиськомы на та сярысь, малпано умойгес», — пусйиз, сменалы йылпумъянъёс лэсьтыса, «Шундыкар» лагерьлэн кивалтӥсез Алина Чернова.