Ижкар+19 °C
14 -тӥ оштолэзь 2021 Вирнунал
18+

Глазкарысь 17 номеро школа йӧскалык гимназия луыны быгатоз

  • 481
  • 0
Глазкар / Удмуртия
Глазкарысь 17 номеро школа йӧскалык гимназия луыны быгатоз
Туспуктэм: Григорий Фомин

Глазкарысь 17 номеро школаын «Флор Васильев нимо йӧскалык гимназия» ӵектосэз быдэсъяны кутскизы. Со улсын мылкыд карем пиналъёс но анай-атайёс понна удмурт кылэз дышетонъя но сям-йылолъёсын тодматсконъя курсъёс радъялозы. Со сярысь иворъёсъя «Удмуртия» агентстволы вераз школалэн кивалтӥсез Нина Вершинина.

Та вакытэ ми Флор Васильев нимо йӧскалык гимназия ӧвӧл, милям потэ та инлыкез азьланяз басьтэммы. Со понна ми уж нуиськом. Дышетсконлэсь ваньмон дыръя ми выжыкылъёс, легендаос но мифъёс пыр тодматскиськом удмурт калыклэн лулчеберетэныз. Кылэз дышетонъя курсъёс но дышетсконтэм дыре вань мылкыд карись нылпиослы но анай-атайёслы радъяськозы
Нина Вершинина

Удмурт кылэз но лулчеберетэз пыӵатон ужез нырысь ик покчи дышетскисьёсын кутскозы. Со шудон порма мастер-классъёс, конференциос но творческой мастерскойёс луозы. Школалэн кивалтӥсез верамъя, кыкетӥ класслы пиналъёс удмурт кылэз дышетыны дась луозы ни. Нош витетӥ классэз рос-прос гимназической шуыны луоз.

«Удмурт кылын вераськись дышетскисьёсмы милям ӧвӧл. Вань ӟучомем удмурт пиналъёс, кудъёсыз удмурт кылэз песянай-песятайёссылэсь гинэ кыло. Нылпиос, кинлэн анай-атайёсы удмурт кылын верасько, одӥг-кык сяна ӧвӧл. Соос ик пиналъёссэс анай кыллы дышетыны но удмурт калыклэсь лулчеберетсэ тодыны мылкыдзэс верало», — ивортӥз Нина Вершинина.

Али удмурт кылъя курсъёсы ветлыны малпасьёсты люкало. Чакланъёсъя, дышетонэз куарусён пумын мытозы.

Ӵектосэз быдэстыны 17 номеро школаысь но Глазкар пединститутысь дышетӥсьёс юрттозы. Нош азьланяз, йӧскалык гимназия инлык басьтыса, пиналъёс финн кылэз но дышетыны быгатозы.

Ватсалом, «Флор Васильев нимо йӧскалык гимназия» ӵектосэз кылдытыны кичӧлтон Глазкарысь 17 номеро школалэн кивалтэтэз но «Удмурт Кенеш» мер огазеяськон сётӥзы.



Наверх
Вниз