Ижкар-24 °C
6 -тӥ толсур 2021 Вордӥськон
18+

Юрий Перевощиков сярысь: кельыт адями пичи дырысен аслаз малпанъёсыз понна нюръяськыны дышемын

  • 429
  • 0
Ижкар / Удмуртия
Юрий Перевощиков сярысь: кельыт адями пичи дырысен аслаз малпанъёсыз понна нюръяськыны дышемын
Туспуктэм: Наталья Еркешева

Туннэ, 24-тӥ толшоре, Удмуртиысь Йӧскалык лыдӟетъюртлэн йӧскалык но шаертодон литературая центраз тодосчилы Юрий Перевощиковлы 90 арес тырмонэзлы сӥзем пумиськон ортчиз. Экономика тодосъя докторез, Удмурт кун университетысь профессорез, УАССР-ысь тодос но техника удысысь дано ужасез ӟечкыланы ӵош ужам эшъёсыз, дышетскисьёсыз но мерлыко ужасьёс люкаськизы.

Мер но кун ужась, экономика тодосъя кандидат Анатолий Матвеев юбилярен кемалась тодмо ни: ӵош дышетскизы но, ужазы но. Со пусйиз, Юрий Перевощиков студент дыръяз ик аслэсьтыз малпанзэ шараяны уг кышка вал.

«Со критиковать карыны кутскиз дышетӥсьёссэ. Аслэсьтыз пӧртэм туж лэчыт юанъёссэ сетӥз соослы», — вераз Анатолий Матвеев.

Та учырез ачиз но Юрий Перевощиков тодаз ваиз. Солэн кылъёсызъя, дышетӥсьёсыз, книгаез лыдӟытэк, соя калыкез дышето вал, соин ик сыӵе споръяськон кылдӥз.

Анатолий Матвеев серекъя, Перевощиков — кельыт адями, нош пичи дыръязы кельытъёсты ӵемысь исало, соин ик со пичи дырысен аслаз малпанъёсыз понна нюръяськыны дышемын. Озьы, Юрий Перевощиков кутскем ужъёссэ котьку пумозяз вуттылӥз. Кылсярысь, тодосчилэн одӥгез тунсыкоез ужез кужымен но йырын ужанэз одӥг мертэтэн дунъяны юрттэ. Та дыре солэн формулаосызъя Япониысь но Америкаысь тодосчиос ужало, ивортӥз Анатолий Матвеев.

Со экономикаен гинэ ӧз дугды, ужаз мукет удысъёсъя но. <…> Со тӥни пыриське кылосбурез но эскерыны, Кудымкарын университетлэсь филиалзэ но устӥз вал со, <…> историзэ но калыкмылэсь (эскере — ред.)
Анатолий Матвеев

Юрий Перевощиковлэн удмурт калык кылдэм сярысь эскеронъёсыз «Рыжие люди (кельыт адямиос) откуда вы? Не из геродотовских ли будинов» книгае пыремын. Отын тодосчи удмурт но грек кылъёсты ӵошатэ, соослэн ог-огзылы укшамзы сярысь вера.

Та удысэн тунсыкъяськонзэ Юрий Перевощиков пичи дырыныз герӟа, куке апаезлэсь выжыосыз сярысь юалляськыны кутскиз.

Адями вордске ке, ассэ ачиз валаны кутске ке, учкылэ ни: кытысь мон, кыӵе гуртысь мынам мемие, кытысь потэмын, кызьы шуод, асьме ӵыжы-выжыосмы?
Юрий Перевощиков

Котырес лыдпуссэ пусйись тодосчи жаляса вера, туннэ нуналлы трос мае эскерыны кулэ, эскерисьёс гинэ ӧвӧл. Соин ик пумиськонын Юрий Перевощиков тунсыко учыръёс сярысь вераз, оло, кинлэн ке йыраз кылёз но солэн эскерыны мылкыдыз кылдоз.

Пумиськон дыръя ик тодосчилэн ужъёсыз «Юрий Перевощиковлэн университетъёсыз» адӟытонэн тодматскыны луиз. 

Ватсалом, экономика тодосъя докторлы, профессорлы Юрий Перевощиковлы 90 арес тырмиз 2018-тӥ арын 13-тӥ толшоре. 



Наверх
Вниз