Ижкар+1 °C
13 -тӥ оштолэзь 2021 Пуксён
18+

Кузебай Герд нимо йӧскалык гимназиен кивалтоз Татьяна Волкова

  • 697
  • 0
Ижкар / Удмуртия
Кузебай Герд нимо йӧскалык гимназиен кивалтоз Татьяна Волкова
Туспуктэм: vk.com (Татьяна Волкова)

Удмуртиысь Кузебай Герд нимо йӧскалык кун гимназилы кивалтӥсез быръёнъя вожвылъяськонын вормиз Татьяна Волкова. Элькунысь дышетонъя но тодосъя министерствоын конкурс ортчиз 29-тӥ толшоре, ивортэмын удысэтлэн нимлыко сайтаз.

Удмурт Элькунысь Дышетонъя но тодосъя министерстволэн конкурс ӧриезлэн пумкылъянэзъя, Конкурсын вормисен лыдъямын Волкова Татьяна Геннадьевна
Удмуртиысь Дышетонъя но тодосъя министерство

Кызьы веразы ивортодэтъя «Удмуртия» агентстволы дышетонъя министерствоын, Татьяна Волкова ужоскетаз пыроз ог кык арня ортчыса, азьвыл интыяз ужъёссэ сётэмез бере. Озьы ик ивортӥзы, вожвылъяськонэ 4 адями пыриськиз шуыса. Конкурсэ пыриськем Николай Ильин Кузебай Герд нимо йӧскалык кун гимназиен кивалтӥсьлэн интыужезъя Дышетонъя но тодосъя министерстволэн кадръёсъя резерваз пыртыны ӵектэмын.

Гимназилэн азьвыл кивалтӥсез Анжелика Михеева ужысьтыз кошкиз 2017-тӥ арын толсуре ас мылкыд каремезъя. Али кивалтӥсьлэсь ужзэ быдэсъя солэн воштӥсез Владимир Волков, веразы ивортодэтъя «Удмуртия» агентстволы дышетсконниын. 

ВАТСАН

Волкова Татьяна Геннадьевна. Вордӥськиз 1973-тӥ арын 27-тӥ гудырикошконэ Глаз ёросысь Пӧжы (Золотарёво) гуртын.  
Дышетскемез вылӥ. 1996-тӥ арын Удмурт кун университетысь Удмурт кылосбуръя факультетэз йылпумъяз, «удмурт кыл но литература, ӟуч кыл но литература» ӧнеръя; 2001-тӥ арын – Россиысь тодосъя академилэн Урал ёзэтысьтыз Историяя, кылъя но литературая удмурт институтлэсь аспирантуразэ, «Россиысь калыкъёслэн литературазы» ӧнеръя. Кылосбур тодосъя кандидат. 
1996-2012 аръёсы – Глазкарысь В. Г. Короленко нимо пединститутысь удмурт кылосбуръя но регионалистикая кафедраысь ассистент, валтӥсь дышетӥсь (2001-тӥ арысен), доцент (2006-тӥ арысен), кафедраен кивалтӥсь (2008-тӥ арысен). 
2012-2015 аръёсы – Удмуртиысь Дышетӥсьёслэсь тодон-валанзэс будэтонъя институтысь удмурт филологияя но йӧскалык кылъёсъя кафедраысь доцент.  
2015-тӥ арысен та дырозь – Удмурт Элькунысь тӧролэн но кивалтэтлэн администрациысьтызы Делопроизводствоя управлениысь эсэплыко ужкагазъёсын ужанъя ёзэтын консультант. 
2015-тӥ арысен Кыккылолыкъя «Билингва» удмурт центрен кивалтэ. Кык кылэз тодӥсь нылпиосын ужанъя «Нуныкай» ӵектослэн авторез.
Кузебай Герд нимо удмурт йӧскалык гимназия 1994-тӥ арын кылдытэмын. Та дыре отын 721 нылпиос дышетско, 41 дышетӥсьёс ужало.


Наверх
Вниз