Литература берыктонъя улосвылкуспо вожвылъяськонлэн нырысетӥ люкетаз 600 пала ужъёс вуизы

6-тӥ тулыспалэ литератураез берыктонъя «Перевод в поле многоязычия» VIII улосвылкуспо вожвылъяськонлэн нырысетӥ люкетэзлы йылпумъянъёс лэсьтӥзы. «Чеберлыко текстэз кунгожсьӧр кылысь анай кылэ берыктон» ӧръя таяз арын котькулэсь трос ужъёс вуизы. Со сярысь Удмуртиысь Йӧскалык лыдӟетъюртлэн кунгожсьӧр кылъёсъя литератураен ёзэтэз «Фейсбукысь» мерлыко вотэсбамаз ивортэ.

Удмуртиысь, Татарстанысь, Марий Элысь, Чувашиысь, Пермь но Нижний Новгород улосвылъёсысь, озьы ик нырысьсэ Москваысь, Пензаысь, Ростов-на-Донуысь, Белгородысь но Екатеринбургысь 545 пиналъёс но егитъёс 593 берыктонзэс келязы. Кылем арен ӵошатыса, со 415 ужлы тросгес. 

Асьме конкурс тодмогес луэ, пыриськисьёслэн лыдзы будэ, соин ик ыстэм ужъёслэн но лыдзы будэ. Трослы паськытаз вожвылъяськонлэн географиез

Радъясьёс англи, немец, француз кылъёсын аспӧртэм чеберлыко произведениосысь 4 сюрс 500 пусозь быдӟалаем текстъёсты берыктыны ӵектӥзы. Тужгес но трос берыктонъёс туэ вуизы англи кылысь ӟуч кылэ (365). Ужъёслэн лыдзыя кыкетӥ интыын немец кылысь ӟуч кылэ берыктонъёс (46), куинетӥ интыын англи кылысь бигер кылэ берыктэм текстъёс (42). Англи кылысь удмурт кылэ берыктэм 20 уж вуиз.

Нырысь-вылысь эскерем бере жюри 496 ужъёсты вожвылъяськонэ лэзиз. 97-зэ экспертъёс конкурслэсь палэнтӥзы: тросэз соос пӧлысь огшоры, литературая тупатъянъёстэк, берыктэмын, озьы ик ӵем пумисько янгышанъёс, куке произведениын одӥг мурт пӧртэм сямен нимамын.

«Парсьпи текстын яке Снортер, яке Шнайдер, яке Буря нимамын. Нош мистер Снукс озьы ик мистер Носатик ним нуллэ. «The Bumble-Bee and the Rabbit» текстын валтӥсь герой огдыре майсы но, муш но, куке шӧкыч но шуэмын», — валэктэмын ивортонын.

«Чеберлыко текстэз кунгожсьӧр кылысь анай кылэ берыктон» люкетлэн вормисьёсыз:

Англи кылысь удмурт кылэ берыктон

• I инты:

— Никита Платонов, Пичи Пурга черкогуртысь гимназия, Удмуртия;

— Алина Бектемирова, Манзарас черкогуртысь С. А. Атямов нимо шоръёзо школа, Татарстан;

• II инты:

— Дарья Тотоева, Изгуртысь шоръёзо школа, Удмуртия;

— Ольга Александрова, Цыпья черкогуртысь шоръёзо школа, Татарстан;

• III инты:

— Татьяна Кузьмина, Бобья-Учаысь шоръёзо школа, Удмуртия;

— Иван Петров, Выль Мӧньяысь школа, Удмуртия;

Со сяна, экспертъёс Пороз школаысь Степан Добряковлэсь но Пичи Пургаысь гимназиысь Вероника Яковлевалэсь ужъёссэс дунъязы. 

Немец кылысь удмурт кылэ берыктон

• I инты:

— Любовь Михайлова, Ижкарысь Кузебай Герд нимо йӧскалык гимназия, Удмуртия;

— Наталья Рыбакова, Удугучинысь шоръёзо школа, Удмуртия;

• II инты:

— Нина Семёнова, Ижкарысь Кузебай Герд нимо йӧскалык гимназия, Удмуртия.

Мукет кылъёсъя вормисьёсты чӧлсконъя учкыны луэ.

Ватсалом, «Перевод в поле многоязычия» литературая берыктон конкурсэз Удмуртиысь йӧскалык лыдӟетъюрт элькунысь Дышетонэз азинтонъя институтэн ӵош радъя. Вожвылъяськон Приволжск федерал округысь 7–9-тӥ но 10–11-тӥ классъёсын дышетскисьёс но удысужлыко дышетсконниосысь студентъёс пӧлын ортчытӥське. 

Та дыре конкурслэн кыкетӥ люкетэз мынэ. Пиналъёс но егитъёс ӟуч кылысь котькыӵе кылэ берыктэм ужзэс 1-тӥ оштолэзёзь ыстыны быгато. Собере куинетӥ люкетэз кутскоз, отын пӧртэм кылъёсын кылъёсын ивортодэт сайтъёсысь текстъёсты ӟуч кылэ берыктоно луоз.