100 лет государственности Удмуртии
Ижкар+22 °C
6 -тӥ инвожо 2020 Кӧснунал
16+

Тодосчи Алексей Арзамазов: удмурт кылэз тодӥсьёслы китай, япон но тюрк кылъёсты дышетыны капчигес

  • 1031
  • 0
Ижкар / Удмуртия
Тодосчи Алексей Арзамазов: удмурт кылэз тодӥсьёслы китай, япон но тюрк кылъёсты дышетыны капчигес
Туспуктэм: Григорий Фомин

Удмурт кылэз тодӥсьёслы китай, япон, корей но тюрк кылъёсты дышетыны капчигес, лыдъя кылосбур тодосъя доктор Алексей Арзамазов. Кызьы вераз тодосчи Вавожын ортчем «Герд лыдӟонъёс» дыръя ивортодэтъя «Удмуртия» агентстволэн корреспондентэзлы, грамматика ласянь но, удмурт кыллы укшась кылъёс ласянь но та кылъёс, ӟучен ӵошатыса, асьмелы матынгес луо.

Удмурт кылэз тодӥсь пиналъёс, ӟуч пиналъёсын ӵошатыса, соос капчигес пыро китай кыллэн дуннеяз. Куара ласянь но грамматика ласянь соослы капчигес валаны китай кыллэсь пуштроссэ. <…> Ми дышемын финн-угор кылъёс (ӵыжы-выжы кылъёсмы — ред.) шуыса. Тюрк кылъёс, япон, корей но асьмелэн ӵыжы-выжы луись кылъёсмы
Алексей Арзамазов, кылосбур тодосъя доктор

Та дыре кунсьӧр кылъёсты дышетон модае пыремын шуыны луэ. Туала адямиос, нырысь ик егитъёс, школаосын, озьы ик ас понназы но пӧртэм кунгожсьӧр кылъёсты дышето. Алексей Арзамазов кылэн быръён ласянь ӵектонъёссэ вераз.

«Удмурт кылэз тодӥсьёслы кенеш сётысал дышетыны китай кылэз но, япон кылэз но. <…> Япон кыл сярысь вераськыса, мон уг шуы трос огкадь луись кылъёс, но удмурт кыллы тупась кылъёс пумиськыло. Грамматика ласянь но мон ӧй шуысал туж капчи, но капчигес луысал дышетыны япон кылэз, тон удмурт сямен вераськиськод ке», — вераз Алексей Арзамазов.

Мукет кылъёсты дышетон сярысь вераса, тодосчи анай кыллы но саклык висъяз.

«Жаляса верано, вань сыӵе ышись кылъёслэн «Горд книгазы», <…> удмурт кыл отчы пыре. <…> Со сыӵе пусъет калыклы — удмуртъёслы удмурт кылэз утёно шуыса, удмурт кылэз дышетыны кулэ шуыса, удмурт сямен вераськыны кулэ шуыса. Малы ке шуоно адямиос ӧз ке вераське удмурт сямен, со ышоз. Кызьы будосъёс ышо, озьы ик кылъёс ышо», — йылпумъяз Алексей Арзамазов.

Тодэ вайытом, элькун «Герд лыдӟонъёс» Вавожын 15-тӥ тулыспалэ ортчизы. Конференцие 350 пала адями люкаськиз. Удмуртиысь тодмо но егит тодосчиос, дышетӥсьёс но пиналъёс пӧртэм ӧръёсъя 11 ивортонъёсын тодматӥзы.

Ватсалом, туэ Удмуртиысь но удмурт кылэз дышетӥсь мукет улосвылъёсысь удмурт кылъя но литературая дышетӥсьёслэсь устозэ методикая огазеяськонэз быръёзы. 



Наверх
Вниз