Ижкар+11 °C
1 -тӥ коньывуон 2020 Покчиарня
18+

Удмуртъёслэн кылдэмзы сярысь выльдыса поттэм книгаен тодматӥзы Ижкарын

  • 497
  • 0
Ижкар / Удмуртия
Удмуртъёслэн кылдэмзы сярысь выльдыса поттэм книгаен тодматӥзы Ижкарын
Туспуктэм: Майя Бывальцева

Кылосбур тодосъя докторлэн, УдГУ-ысь профессорлэн, протодиаконлэн Михаила Атамановлэн «Происхождение удмуртского народа» книгаезлэн кыкетӥ изданиеныз тодматон ортчиз 13-тӥ оштолэзе Удмурт кун университетын. Ужрадэ тодосчиос, лулчеберет удысысь ӧнерчиос, вузысь дышетӥсьёс но студентъёс люкаськизы.

«Происхождение удмуртского народа» монография Михаил Атамановлэн одӥгез валтӥсез тодосъя ужез луэ. Отын удмуртъёслэн кылдэмзы этнография, лингвистика, археология, антропология ласянь эскеремын но возьматэмын. Тодматонэ лыктэм тодосчиос монографилы туж вылӥ дунъет сётӥзы.

Адямилэн котьма ласянь адӟонэз, шӧдонэз тӥнь та книгаын адӟиське, и мур со. Со сое пӧртэм книгаосын бугыръяськыса, ваньзэ-ваньзэ лэсьтэмын пыр-поч. Учке ай, даже со воршудъёсты чаклам ужез солэн. Со зэмзэ но котькуд адямилы кулэ луись книга, котькуд адями шедьтоз аслэсьтыз выжызэ: кытысь со потэмын, кытын со, кытысь солэн гуртаз кинъёс-кинъёс вань — со ведь туж тунсыко. Озьы асьмеос быгатӥськомы (тодыны -ред.) удмуртъёслэн кинъёсын кусыпъёсмы вань, кытын улӥллям асьмелэн вашкала ӵыжы-выжыосмы, кыӵе каръёс отын вылӥллям, кудпалась лыктэмын
Галина Шушакова, кылосбур тодосъя кандидат

Михаил Атамановлэн та книгаез татын улӥсьёслы, элькунысьтымы тодосчиослы гинэ ӧвӧл, быдэс дуннелы дуно луэ, малы ке шуоно туж ӟечлыко, вылӥ удысужлыко гожтэмын, пусйиз УдГУ-ысь доцент, истори тодосъя кандидат Татьяна Юдина.

Та монографиын шер пумитано материал люкамын, со бордын пыр-поч ужамын но асьмелы рос-прос но бадӟым выль суред возьматэмын — удмурт калыклэн кылдэмез. Кӧня ке дасо аръёс талэсь азьвыл ми удмурт калык сярысь трос ик вераны ум быгатӥське вал, малы ке шуоно таӵе огазеям уж ӧй вал. Вал нимаз статьяос, публикаос гинэ, таӵе бадӟым ужъёс ӧй вал. Соин ик Михаил Гавриловичлэн ужез асьме элькунмы, татын улӥсьёс понна гинэ ӧвӧл, дуннеын но дуно луэ
Татьяна Юдина, истори тодосъя кандидат

Со пусйиз, удмурт калыкен тунсыкъяськон туннэ бадӟым. Атамановлэн та монографиез туннэ пӧртэм кунъёсысь лыдӟетъюртъёсын вань — Англиын, США-ын, Финляндиын но Европаысь мукет кунъёсын.

монографиен тодматон
Выльдэм издание трос ватсанъёс пыртэмын Фото: Майя Бывальцева © udmurt.media

«Куке тодӥськод аслэсьтыз лулчебереттэ но бускеледлэсь лулчеберетсэ, соку калыкъёс эшъяськыса, ог-огзэс валаса уло. Удмуртия та ласянь аспӧртэм улосвыл, малы ке шуоно татын калыкъёс зэмзэ но тупаса уло. Асьмелэн Удмурт Элькун — со удмуртъёслэн, озьыен, ми та калык сярысь тросгес тодыны кулэ», — вераз Татьяна Юдина.

Монографилэн кыкетӥ изданияз бадӟым инты басьтэ лингвистика. Кылэз эскерон туж юн герӟаськемын историен — кытын, кинэн артэ улӥзы удмуртъёс, пусъе Историяя, кылъя но литературая удмурт институтысь тодосъя ӧнерчи, «Урал кылъёс» ӧнеръя философияя доктор Людмила Карпова.

Одӥгез сыӵе ужпум луэ, кытысь потэмын Глазов котырысь но Грак котырысь удмуртъёслэн вераськоназы ə̑ кутӥськись гласной — кə̑тын, кə̑тчы. Со чебер гинэ, визьмо сое валэктыны быгатӥз — со герӟаськемын бесерманъёсын, бесерман калыклэн влияниез улсын пӧрмиз та вераськетъёсын та аспӧртэмылко куара. Михаил Гаврилович сое валэктӥз воршудъёсты лыдэ басьтыса, собере исторической документъёсты лыдэ басьтыса — кытын, кызьы улӥзы удмуртъёс. Тани, шуом, Алнаш котырын ик одӥг гуртын верасько ы шуыса, мукет гуртын — ə̑, мукетаз куиньзэ но куто. Вот со ваньмыз герӟаськемын именно бесерман калыкен. Одӥг статьяез солэн солы сӥземын та книгаяз
Людмила Карпова, Историяя, кылъя но литературая удмурт институтысь тодосъя ӧнерчи

Пусъёмы, Михаил Атамановлэн «Происхождение удмуртского народа» монографиез нырысьсэ поттэмын вал 2010-тӥ арын. Кыкетӥ изданияз трос ватсанъёс пыртэмын но воштэмын. Книгаез «Удмуртия» издательстволэн вузкаронниысьтыз басьтыны луэ.


Наверх
Вниз