Удмуртиысь 30-лэсь трос студентъёс «Финн-угор калыкъёслэн узырлыксы» калыккуспо форуме куриськон сётӥзы

24–26 куартолэзе Йошкар-Олаын радъяськись «Финн-угор калыкъёслэн узырлыксы» калыккуспо форуме Удмуртиысь 30-лэсь трос студентъёс куриськон сётӥзы. Соос пӧлын Удмурт кун университетын но Глазкарысь пединститутын дышетскисьёс. Со сярысь ивортодэтъя «Удмуртия» агентстволы Пор кун университетысь Йӧскалык лулчеберетъя институтлэн кивалтӥсезлэн воштӥсез, ужрадлэн оргкомитетэзлэн ёзчиез Элина Гусева вераз.

Ужрад Россиысь финн-угор улосвылъёсысь но Европаысь кунъёсысь студентъёслэсь но аспирантъёслэсь финн-угор удысын тодосъя ужъемышъёсынызы но эскерон опытэнызы вошъяськон понна кусыпъёссэс юнматон вылысь радъяське. Форум улсын 10 секциос радъямын луозы. Озьы ик мастер-классъёс но творчествоя площадкаос ужалозы. 

Элина Гусевалэн кылъёсызъя, туннэ нуналлы ваньмыз 150-лэсь ятыр студентъёс пыриськыны мылкыд каризы. Россиысь вань финн-угор улосвылъёсысь дышетскисьёслэсь сяна, куриськонъёс Австриысь, Эстониысь, Венгриысь но Германиысь вуизы. Радъясь верамъя, пыриськисьёслэн лыдзы арысь аре будэ.

Малпало лыктыны Австриысь, Эстониысь, Венгрия кулэ луыны но Германия — со мукет кунъёсысь. Озьы ик (Россиысь — ред.) ваньмыз финн-угор улосвылъёс. <…>Тани ми ньыль форум ортчытӥм ни, кылем арын тужгес трос (пыриськисьёс — ред.) вал

Кызьы шуиз ивортодэтъя «Удмуртия» агентстволы Удмурт кун университетысь Удмурт кылосбуръя, финно-угроведения но журналистикая институтысь Удмурт литературая но Россиысь калыкъёслэн литературазыя кафедраысь доцент, кылосбур тодосъя кандидат Галина Глухова, УдГУ-ысь студентъёс та форуме туж яркыт пырисько, тужгес но удмурт кылосбуръя институтын дышетскисьёс.

Милям университет туж яркыт отчы пыриське. Ветло пӧртэм-пӧртэм институтъёсысь асьме вузысь, но приоритет сётӥське удмурт кылэз тодӥсьёслы, финно-угор форум бере. Соин ик милям тросгес мыно, пырак удмурт кылосбуръя (институтысь — ред.) студентъёс мыно отчы

Солэн верамезъя, «Финн-угор калыкъёслэн узырлыксы» форуме Удмурт кун университетысь 15–20 адями ветлэ, соос пӧртэм секциосы пыриськыны тыршо. Удмуртиысь студентъёс тодосъя ужрадысь ӵемысь нырысетӥ степенё дипломъёсын берто.

Туннэ нуналлы тодмо ӧвӧл на, кӧняез куриськон сётэм студентъёс форуме пыриськыны быгатозы. Удмурт кылосбуръя, финно-угорведения но журналистикая институт радъясьёсын — Пор кун университетэн — трос аръёс ӵоже юн кусып возе бере, асьме вузлы та ужрадэ квота тросгес сётӥське, пусйиз Галина Глухова.

Милям институтлы тросгес квота сётӥське, малы ке шуоно ми туж юн соосын кусып возиськомы студентъёсын вошъяськонъя но. Тӥни сое ваньзэ — дышетскон процессэз но мукетсэ — лыдэ басьтыса, милемлы квота тросгес сёто

Ватсалом, редколлегилэн пумкылъянэзъя Форумысь материалъёс тодосъя бичетын поттэмын луозы. Статьяосты Тодосъя электрон библиотекае пыртозы.