Ижкар+9 °C
16 -тӥ куарусён 2021 Покчиарня
18+

Кык мультфильм но тодосъя документальной фильм берыктӥзы Удмуртиын «Яратоно удмурт кыл» фестивале пыриськисьёс

  • 603
  • 0
Кез / Удмуртия
Кык мультфильм но тодосъя документальной фильм берыктӥзы Удмуртиын «Яратоно удмурт кыл» фестивале пыриськисьёс
Туспуктэм: vk.com (Фестиваль удмуртского языка "Яратоно Удмурт Кыл")

Кез ёросысь «Живица» этнокомплексын 30-тӥ инвожоысен 7-тӥ пӧсьтолэзёзь ортчем «Яратоно удмурт кыл» фестивале пыриськисьёс кык мультфильмез но тодосъя документальной фильмлэсь ӝынызэ удмурт кылэ берыктӥзы. Ивортодэтъя «Удмуртия» агентстволы со сярысь вераз фестивалез радъясь Евгения Лекомцева.

Удмурт кылын вераськисьёс кык мультикез берыктӥзы, куараен гожтӥзы. Одӥгзэ субтитръёсын фестивальын возьматӥзы. «Антарктида» тодосъя документальной фильмез ӝыныезлэсь троссэ берыктӥзы. Ӝоген, матысь арня-кык, удмурт кылын пор выжыкыл луоз на
Евгения Лекомцева, «Яратоно удмурт кыл» фестивалез радъясь

Солэн кылъёсызъя, фестивале 47 адями но 5 дышетӥсьёс пыриськизы. Ӵукнаысен удмурт кылэз дышетон мынӥз, лымшор бере мастер-классъёс, тодматонъёс кутскылӥзы, ӝытзе тылскем дорын кырӟаса пукылӥзы, спектакль яке концерт учкизы.

«Таяз ардэ милям трос пиналъёс вал, соин ик кык нылпи группа ужаз но соослы чаклам ужрадъёс трос вал», - пусйиз Евгения Лекомцева.

«Яратоно удмурт кыл» фестивале Ижкарысь, Глазкарысь, Дэбес, Шаркан, Кез, Ува, Сьӧлта ёросъёсысь, Санкт-Петербургысь, Москваысь, Чувашиысь Шумерля карысь пыриськисьёс лыктӥзы. Дышетӥсьёс пӧлын вал Франциын но Италиын улӥсь тодосчиос.

Озьы ик фестивальлэн ужрадъёсаз Мыпкчиньыпи (Сосновый Бор) гуртысь но Кезысь пиналъёс но арлыдоос вуылӥзы. Озьыен, арня ӵоже 150 пала адями ужрадъёсамы вуылӥз, пусйиз Евгения Лекомцева.

Удмурт кылэз яратӥсьёс Кез ёросысь Кулига черкогуртэ старообрядческой лулчеберетъя «Истоки КАкие МЫ?» фестивале но Шаркан ёросысь Быгы гуртэ финн-угор сиён-юонъя «Быг-Быг» фестивале вуылӥзы. Быгыын пӧранъя вожвылъяськонэ но мини-футболъя ӵошатсконэ пыриськизы.

Евгения Лекомцева верамъя, пумен вуоно фестиваль сярысь но вераськонъёс нуизы ни. Кылсярысь, дышетӥсь луыса лыктыны соглаш актриса но режиссёр Ольга Александрова (туэ со «Куинь сюан гуръёс» моноспектакльзэ возьматӥз), озьы ик луолэсь суредъёс но мультфильмъёс лэсьтӥсь Людмила Батуева.



Наверх
Вниз