Ижкар+1 °C
13 -тӥ оштолэзь 2021 Пуксён
18+

90 пиналъёс Юрий Перевощиков нимо визьбур вожвылъяськонэ пыриськизы Удмуртиын

  • 652
  • 0
Ижкар / Удмуртия
90 пиналъёс Юрий Перевощиков нимо визьбур вожвылъяськонэ пыриськизы Удмуртиын
Туспуктэм: Александр Корепанов

Туннэ, 8-тӥ шуркынмонэ, Удмурт кун университетлэн лыдӟетъюртаз Юрий Перевощиков нимо визьбур вожвылъяськон (троеборье) ортчиз. Удмуртилэн пӧртэм ёросъёсысьтыз 90 пиналъёс люкаськизы. 

Кызьы вераз ивортодэтъя «Удмуртия» агентстволы ужрадэз одӥгез радъясь, университетысь дышетӥсь Александр Корепанов, удмурт кылъя, экономикая но обществознания тодон-валанъёссэс эскерыны 130 дышетскисьёс мылкыд каризы, но транспорт сюрымтэен ог 40 пиналъёс визьбур вожвылъяськонэ лыктыны  ӧз быгатэ.

Вуэмын Шаркан, Якшур-Бӧдья, Балезино, Ува, Вавож, Пичи Пурга ёросъёс но Ижкарысь школаос. Тросгес Ижкарысь дышетскисьёс, малы ке шуоно тросэз ёросъёсмы ик – Глаз, Дэри ёросъёс – транспортэн ӧз пӧрмы но соос ӧз быгатэ вуыны
Александр Корепанов, Удмурт кун университетысь дышетӥсь

8-11 классъёсын дышетскись нылпиос понна юанъёсты Удмурт кун университетысь дышетӥсьёс дасязы. Экономикая но обществознания заданиосты Экономикая но кивалтонъя институтысь ӧнерчиос гожтӥзы, нош удмурт кылъя – Удмурт кылосбуръя, финно-уговедениея но журналистикая институтын ужасьёс.

Юрий Перевощиков нимо визьбур многоборьеын вормем 11-тӥ классын дышетскисьёслы УдГУ-ысь Экономикая но кивалтонъя институтэ пырыкузы огъя кун экзаменъёсъя баллъёссы вӧзы 10 балл ватсаськоз. Удмурт кылосбуръя, финно-угроведениея но журналистикая институтэ («Филология» но «Педагогическое образование» ӧнеръя бакалавриатэ) пырисьёслы – 5 балл. Кызьы валэктӥзы институтын, удмурт кылъя но литературая олимпиадаосын вормемъёс но та ӧнеръёсъя дышетскыны пырыкузы 5 балл басьто.

Кызьы шуиз Экономикая но кивалтонъя институтлэн кивалтӥсезлэн юрттӥсез Надежда Пинегина, 8-9 классъёс понна соос капчигес юанъёс дасязы, малы ке шуоно та пиналъёс обществознаниез дышетыны кутскемын гинэ ай, нош экономикаез тросэз тодмет чотын уг ик дышето. 10-11 классъёсын дышетскисьёслы юанъёс огъяросси олимпиада ёзысь кутэмын ни.

Вань отын тестовой юанъёссы но, задачаосты сэрттон-пертчон но, озьы ик творческой юанъёслы валэктон сётон, кылсярысь, кыӵе налогъёсты тӥ палэнтысалды но малы? <…> Оскисько, пиналъёс вань визьзэс но творчествозэс кутӥзы татын
Надежда Пинегина, Экономикая но кивалтонъя институтлэн кивалтӥсезлэн юрттӥсез

Удмурт кылъя юанъёс куинь люкетлы висъямын вал, шуэ Удмурт кылосбуръя, финноугроведения но журналистикая институтлэн кивалтӥсез Наталья Кондратьева. Нырысетӥ люкетаз грамматикая юанъёс пыризы, кыкетӥяз – мерлыкын кутӥськись кылъёсты тодонзэс эскерон, нош куинетӥез – сётэм темая эссэ гожтон.

Та ласянь эссэ удмурт яке ӟуч кылын гожтыны быгато, малы ке шуоно берло аръёсы трос удмурт кылын гожъяськыны быгатӥсьтэм пиналъёс. Соос анай-атаенызы верасько, но гожъяськемзы школаын дышетэмын ӧвӧл. Сыӵе пиналъёслэн удмурт кылэз дышетыны мылкыдзы мед бурдъяськоз шуыса, соос быгато асьсэлэсь малпанъёссэс ӟуч кылын вераны. Таяз арын тема сётэмын вал 10-11 классъёслы – «Удмурт кыллэн туала мерлыкын кутӥськемез», 8-9 классъёслы – «Анай кыллэн мынам улонам интыез»
Наталья Кондратьева, УдГУ-ысь Удмурт кылосбуръя, финно-угроведениея но журналистикая институтлэн кивалтӥсез

Ува ёросысь Булай школаысь 8-тӥ классын дышетскись Анастасия Кутянова понна удмурт кыл яратоно тодмет луэ, соин ик нылаш тодон-валанъёссэ визьбур вожвылъяськонын эскерыны малпаз.

Удмурт кылэз яратӥсько, обществознаниез но. Дасяськи арня пала, дыр. Экономика милям школаямы ӧвӧл, экономикаен мон дасяськи дышетӥсьёсын ӵош. Умой гожтӥ, дыр. Удмурт кылын но обществознаниен умой, тани экономикаез умой уг тодӥськы но уг тодӥськы, кызьы луоз
Анастасия Кутянова, Булай школаын дышетскись

Анастасия Кутянова верамъя, азьланяз со улонзэ удмурт кылэз дышетонэн герӟаны малпа. Нылашлэн потэ, удмурт кыл мед утиськоз но улонын мед кутӥськоз шуыса.

Пичи Пурга черкогуртысь гимназиын 10-тӥ классын дышетскись Лидия Некрасовалы «Интеллектуальное многоборье» ужрадын экономикая юанъёс тужгес шуген сётӥськизы. Нылаш малпамъя, куд-огезлы со шонер валэктон сётӥз, нош кудъёсаз ке янгышъёс но луыны быгато.

Мон тужгес но яратӥсько удмурт кылэз, нош экономика но обществознание мон понна кыдёкынгес. <…> Азьланяз, оло, улонме журналистикаен герӟало
Лидия Некрасова, Пичи Пурга гимназиын дышетскись

Шаркан ёросысь Кыква шоръёзо школаысь удмурт кылъя но литературая дышетӥсь Елена Ложкина вожвылъяськонэ кык дышетскисьсэ ваиз. Со малпамъя, ӵапак та нылашъёс тужгес тупало экономикая, обществознания но удмурт кылъя многоборьее. Ужрадлэн пайдаез сярысь вераса, дышетӥсь пусъе, та выллем вожвылъяськонъёс пиналъёслы азьлань сюрессэс бырйыны юртто шуыса.

Пиналъёс палэнэ потало ке, соос маке но выльзэ асьсэлы басьто, синъёссы но азьлане кадь учко, сюрес бырйыны юрттэ
Елена Ложкина, Кыква школаысь дышетӥсь

Ватсалом, Юрий Перевощиков нимо визьбур вожвылъяськонлы йылпумъянъёсты 23-тӥ шуркынмонэ шараялозы. Радъясьёс та многоборьеез азьланяз но ортчытъяны малпало. Чакланъёсъя, ужрадэ школаын дышетскисьёс сяна, студентъёс но пыриськыны быгатозы.

Тодэ вайытом, визьбур многоборье Удмуртилэн кунлык нуналэзлы тупатэмын но удмуртъёс пӧлын нырысетӥезлы экономика тодосъя докторлы Юрий Перевощиковлы сӥземын.



Наверх
Вниз