Ижкар+1 °C
13 -тӥ оштолэзь 2021 Пуксён
18+

Юрий Перевощиков нимо визьбурлыко многоборьеын вормисьёсты пусйизы Ижкарын

  • 691
  • 0
Ижкар / Удмуртия
Юрий Перевощиков нимо визьбурлыко многоборьеын вормисьёсты пусйизы Ижкарын
Туспуктэм: Наталья Тетерина

23-тӥ шуркынмонэ Удмурт кун университетлэн лыдӟетъюртаз Юрий Перевощиков нимо визьбурлыко многоборьеын вормисьёсты пусйизы. Удмурт кылъя, экономикая но обществознания эскеронъёсын тужгес трос балл люкам 8-11 классын дышетскись 33 пиналъёслы дипломъёс но кузьымъёс сётӥзы.

Та тодметъёсъя тужгес визьмо нылпиосты «Удмурт Кенеш» огазеяськонлэн тӧроез, Удмуртиысь Кун Кенешлэн депутатэз Татьяна Ишматова ӟечкылаз. Со пусйиз, таӵе выль амал удмурт кылэз утьыны но вӧлмытыны юрттэ.

Ми валаськом, экономика, обществознание – сыӵе тодосъёс, со тодметъёс, кудъёссэ туннэ одно ик тодыны кулэ, соос азинско. Но татчы удмурт кылэз пыртӥм шуыса – со, мон малпамъя, кылэз утён ужпумын бадӟым юрттэт
Татьяна Ишматова, «Удмурт Кенеш» огазеяськонлэн тӧроез, Удмуртиысь Кун Кенешлэн депутатэз

Озьы ик вормисьёслы удмуртъёс пӧлын нырысетӥез экономика тодосъя доктор Юрий Перевощиков вазиськиз. Солэн кылъёсызъя, ӵемысь коньдон сьӧры уиськыса, тужгес пайдаёез палэнэ кыле. Соин ик тодосчи пиналъёслы, ортчемзэ но туалазэ лыдэ басьтыса, визьмо улыны сӥзиз.

Егитъёслэн ужпумзы: истори учыръёсты сак лыдӟыны, учкыны но валаны - совето тодосчиос визьтэмесь ӧй вал. <…> Экономика тодос азьвыл но туала куронъёс вискысь шорзэ шедьтыны кулэ. <…> Та ивортонэным мон курисько, тӥляд визьды, коньдон сьӧры уиськыса, медаз ышы шуыса
Юрий Перевощиков, экономика тодосъя доктор

Пусъём, многоборьелэсь вормисьёссэ котькуд тодметъя нимаз бырйизы. Со сяна, тужгес трос балл люкам командаосты пусйизы. Тросэз пиналъёс кык, куинь, ньыль диплом басьтӥзы. Нош тужгес устоосыз пиналъёс «Абсолютный чемпион» ним басьтӥзы, соос куинь тодметъя огъя тужгес трос балл люказы.

Визьбурлыко многоборьеын куинь тодметъёсъя тужгес трос балл люкамъёс:

  • 8-тӥ класс – Диана Спиридонова, Кузебай Герд нимо йӧскалык гимназия;
  • 9-тӥ класс – Денис Стефашин, Кузебай Герд нимо йӧскалык гимназия;
  • 10-тӥ класс – Яна Рычкова, Шаркан шоръёзо школа;
  • 11-тӥ класс – Алёна Мохова, Дэри ёросысь Подшивал шоръёзо школа.

Дэри ёросысь Подшивал школаын 11-тӥ классын дышетскись Алёна Мохова многоборьеын вань вормисьёс пӧлысь огназ гинэ вань 5 номинациосын дипломъёс басьтӥз. Кызьы со шуиз ивортодэтъя «Удмуртия» агентстволэн корреспондентэзлы, ужрадэ пыриськон азьын кема ик дасяськоно ӧз луы, малы ке шуоно со умой дышетске.

Сыӵе ик кема дасяськоно ӧз луы, малы ке шуоно мон котьку но дась, дышетскисько умой. Озьыен, тодон-валанэ мыным тырмиз
Алёна Мохова, визьбурлыко многоборьеын вормись

Нылаш верамъя, экономика, обществознание но удмурт кыл пӧлысь тужгес яратоно тодметэз – со анай кыл.

Удмурт кыл – со мынам вордскем кылы, мон сое туж яратӥсько. Вань улонме мон малпасько герӟаны удмурт кылын, пырыны удмурт филология факультетэ. Мон элькун олимпиадаосы но котькуд ар ветлӥсько, интыосы но вань
Алёна Мохова, визьбурлыко многоборьеын вормись

Балезино ёросысь Исак школаын 11-тӥ классын дышетскись Андрей Лебедев 3 диплом басьтӥз. Удмурт кылъя но обществознания со нырысетӥ интыын, нош экономикая – куинетӥ. Дышетскись верамъя, та вормонъёс понна нырысь ик дышетӥсьёслы тау кароно.

Тау дышетӥсьёслы. Косо – лэсьтӥсько. Ӧй ке косысалзы, мае ке лэсьтысал-а? Зэм ке вераса, мон удмурт кылъя гинэ дасяськи. Школаын верай вал, обществознаниен но экономикаен мынам урод шуыса. Озьыен, сокем урод ӧвӧл, вормисьёс пӧлы шеди бере
Андрей Лебедев, визьбурлыко многоборьеын вормись

Та тодметъёсъя сокем умой тодон-валанъёс возьматэ ке но, Андрей Лебедевлэн улонзэ техника удысэн герӟамез потэ. 11-тӥ классэз йылпумъямез бере пияш Ижкарысь техникая кун университетэ «Ракетостроение» ӧнеръя дышетскыны пырыны малпа.

Нялтас вераса, 11-тӥ классын дышетскисьёс многоборьеын удмурт кылъя 1-тӥ инты басьтэмзы понна УдГУ-ысь Удмурт кылосбуръя, финноугроведения но журналистикая факультетэ пырыкузы огъя кун экзамен вӧзы ватсаса 5 балл басьтозы. Экономикая но обществознания призёръёслы Экономикая но кивалтонъя институтэ пырыкузы 10 балл ватсаськоз.

Тодэ вайытом, Юрий Перевощиков нимо многоборьее Удмуртиысь ог 90 пиналъёс пыриськизы. Визьбур вожвылъяськон Ижкарын 8-тӥ шуркынмонэ ортчиз. 



Наверх
Вниз