Ижкар-24 °C
6 -тӥ толсур 2021 Вордӥськон
18+

Удмурт кылъя но литературая электрон учебникъёсын тодматӥзы Ижкарын

  • 716
  • 0
Ижкар / Удмуртия
Удмурт кылъя но литературая электрон учебникъёсын тодматӥзы Ижкарын
Туспуктэм: Наталья Тетерина

27-тӥ шуркынмонэ, Удмурт кыллэн нуналаз, Дышетон удысысь йӧскалык ужпумъёсты эскеронъя тодос институтысь ӧнерчиос Удмуртиысь дышетӥсьёсты, визьнодасьёсты, дышетскисьёсты, студентъёсты но вань тунсыкъяськисьёсты удмурт кылъя но литературая электрон учебникъёсын тодматӥз. Озьы ик люкаськемъёс дышетон книгаослэн авторъёсынызы пумиськыны быгатӥзы.

Кызьы шуиз ивортодэтъя «Удмуртия» агентстволэн корреспондентэзлы институтлэн кивалтӥсез Надежда Ураськина, туннэ нуналлы удмурт кылъя но литературая электрон учебникъёс покчи классъёслы но инъет ёзо школалы дасесь ни. Али бадӟым уж соосты калыке вӧлмытонъя нуиське.

Вань сыӵе мылкыд карисьёс – кивалтӥсьёс, дышетӥсьёс – соос милемыз куро асьсэос инновационной площадка луыса басьтӥськыны. Со радын милям апробация мынэ. Али тани Изгурт школаез пример чотын басьтыны луоз, малы ке шуоно соос туж тунсыко ужало, туж мыло-кыдо басьтӥськизы
Надежда Ураськина, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсез

Кивалтӥсьлэн кылъёсызъя, электрон учебникъёс дышетӥсьлы туж бадӟым юрттэт луо. Огшоры учебникен ӵошатыса, соослэн пуштроссы узыргес.

Нырысь ик со аудио: покчи классын ӝогверанъёс, бадӟым классъёсын отын туж тунсыкоесь спектакльёсысь люкетъёс. Нылпи, шуомы, ӝыны люкетэз учке но солэн мылкыдыз ӝутске учкыны, мар азьланяз луэ спектакльын, солэн лыктэмез потэ театре. <…> Собере отын вань астэ эскерон сэрег. Отын котькуд нылпи котькуд тема бере ассэ эскерыны быгатэ
Надежда Ураськина, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсез

Со верамъя, туннэ нуналлы электрон учебникъёсын ужаны институт пыр гинэ луэ, малы ке шуоно соос федерал перечне пыртэмын ӧвӧл на. Вань мылкыд карись школаосын институтысь ӧнерчиос огкылысь ужало. Кылсярысь, туннэ нуналлы Дэри но Алнаш ёросъёсысь, Вотка карысь дышетсконниос электрон учебникъёсты уже куто. Надежда Ураськина оске, 2019-тӥ арын 1-тӥ толшорозь удмурт кылъя но литературая электрон учебникъёсты федерал перечне пыртозы шуыса. Соку удмурт кылэз дышетӥсь вань школаос соосын ужаны быгатозы .

Ватсалом, Удмурт кыллэн нуналэзлы сӥзьыса, Дышетон удысысь йӧскалык ужпумъёсты эскеронъя тодос институтысь ӧнерчиос «Чузъяськы, удмурт кыл!» флешмоб ялӥзы. Со понна вань мылкыд карисьёс «Удмурт кылын вераськиськом, удмурт кылын лыдӟиськиськом, удмурт кылын гожъяськиськом, удмурт кылын данъяськиськом» кылъёсын видео гожтыны но сое мерлыко вотэсъёсы интыяны кулэ.

«Удмурт кыллэн нуналэз» темая вань иворъёс


Наверх
Вниз