Ижкар-7 °C
12 толсур 2018 Вирнунал
16+

Егит дышетӥсьёслы юрттон вылысь 19 миллион пала висъялозы Удмуртиын 2019-тӥ арын

  • 125
  • 0
Ижкар / Удмуртиын
Егит дышетӥсьёслы юрттон вылысь 19 миллион пала висъялозы Удмуртиын 2019-тӥ арын
Туспуктэм: Григорий Фомин

2019-тӥ арын егит дышетӥсьёслы юрттон вылысь Удмуртилэн коньдэтысьтыз 18 миллион 700 сюрс манет висъяны чаклало. Со сярысь 6-тӥ толсуре журналистъёслы элькунлэн Кун Кенешысьтыз тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез Татьяна Ишматова ивортӥз.

Солэн кылъёсызъя, Удмуртиын 2015-тӥ арысен ужась программа вуоно арын паськыталоз. Гуртысь егит дышетӥсьёслы сяна, юрттэт карысь ӧнерчиослы но сётозы.

Бюджетын али со коньдон висъямын: 8 миллион висъямын карын ужась дышетӥсьёслы но гуртъёсын ужась дышетӥсьёслы озьы ик чакламын 10 миллионлэсь тросгес коньдон. Ар ӵоже учком на, кулэлыкез луиз ке, эшшо будэтом на та лыдпусэз
Татьяна Ишматова, Кун Кенешысь ялан ужась ӧрилэн кивалтӥсез

Ишматова верамъя, юрттэт али ужаны кутскись дышетӥсьёслы сётӥськоз но куинь ар ӵоже тыриськоз. Нырысетӥ ужан аразы дышетон удысысь егит ӧнерчиос 40 сюрс манет басьтозы, кыкетӥ аре – 60 сюрс, куинетӥ аре – 80 сюрс.

Кызьы пусйиз Татьяна Ишматова, туннэ нуналлы Удмуртиын дышетӥсьёс уг тырмо. Тужгес но бадӟым кулэяськон химия, биология, физика но математика тодметъёсъя ӧнерчиослы. Ижкаръя лыдпусэз учконо ке, шоркарысь школаослы 300-лэсь трос дышетӥсьёс кулэ.

Тодэ вайытом, карын ужась егит дышетӥсьёслы юрттэт сётӥськоз шуыса туэ гудырикошконэ Удмуртилэн тӧроез Александр Бречалов вераз

Наши партнеры

Наверх
Вниз