Ижкар+10 °C
25 куартолэзь 2019 Кӧснунал
16+

Покчи классъёслы удмурт кылъя учебникъёс федерал лыдметэ шедизы

  • 485
  • 0
Москва / Россия
Покчи классъёслы удмурт кылъя учебникъёс федерал лыдметэ шедизы
Туспуктэм: Майя Бывальцева

Покчи классъёслы удмурт кылъя учебникъёс но лыдӟон книга федерал лыдметэ (перечене) шедизы. Кун аккредитацияя дышетон программаосъя ужась школаосын кутыны ӵектэм учебникъёсын лыдмет сярысь косонэз (приказ) Россиысь просвещениея министр Ольга Васильева 2018-тӥ арын 29-тӥ толсуре кинюртӥз. Со сярысь федерал удысэтлэн сайтэз ивортэ.

Учебникъёсын федерал лыдмет куиньлы люкемын. Инъет луись люкетаз 910 учебник пыртэмын. Озьы ик ляб тазалыко пиналъёс понна дышетон книгаосын, улосвыл но йӧскалык пуштросэн учебникъёсын люкетэз вань.

Куинетӥяз удмурт кылын «Букварь», удмурт кылэз тодӥсь но тодӥсьтэм пиналъёслы «Удмурт кыл» но «Ӟеч-а, бур-а, удмурт кыл!» учебникъёс, озьы ик «Лыдӟон книга» пыризы. Ваньмыз соос «Удмуртия» издательствоен поттэмын.

1-4, 5-9 классъёслы удмурт кылъя но литературая дышетон программаос инъет луись шоръёзо дышетон программаослэн реестразы пыртэмын.

Ватсалом, удмурт кылъя учебникъёс 5-9 классъёслы но дась, но соос эскеронъёсты ортчымтэ на. Кылем арын Удмуртиын 10-тӥ но 11-тӥ классъёсын дышетскисьёслы но удмурт кылъя учебникъёс кылдытӥзы.

Тодэ вайытом, федерал лыдметэ пыртымтэ учебникъёсты уже кутыны уг яра, соин ик дышетӥсьёс соосын лушкем сямен ужано луизы. Та ужпумез миым гудырикошконэ элькунысь удмурт кылъя но литературая дышетӥсьёслэн Можга ёросын ортчем форумазы но ӝутӥзы.  

Наши партнеры

Наверх
Вниз