100 лет государственности Удмуртии
Ижкар+12 °C
1 -тӥ инвожо 2020 Вордӥськон
16+

«Кузебай Герд – нылпиослы» книга адӟытон ужалоз Ижкарысь Кузебай Герд нимо гимназиын 21-тӥ тулыспалэ

  • 452
  • 0
Ижкар / Удмуртия
«Кузебай Герд – нылпиослы» книга адӟытон ужалоз Ижкарысь Кузебай Герд нимо гимназиын 21-тӥ тулыспалэ
Туспуктэм: Григорий Фомин

21-тӥ тулыспалэ Ижкарысь Кузебай Герд нимо гимназиын (Петров нимо урам, 19) Удмуртиысь Йӧскалык лыдӟетъюртлэн фондысьтыз книгаосын «Кузебай Герд – нылпиослы. Кузебай Герд - детям»  адӟытон ужалоз. Со XXII Герд лыдӟонъёс улсын радъяськоз, ивортэ лыдӟетъюртлэн пресс-службаез.

Адӟытонын возьматэмын луозы Кузебай Гердэн 1920-тӥ арын дасям нылпиослы «Муш» удмурт журнал, 1924-тӥ арын потэм «Шуныт зор» но 1929-тӥ арын потэм «Выль сюрес» учебникъёс, кудъёсаз Герд ӟуч но удмурт кылбурчиослэсь но гожъяськисьёслэсь произведениоссэс люказ. Озьы ик соин поттэм удмурт кылын арифметикая, геометрияя, котыр дуннея (окружающий мир – ред.) книгаосын тодматскыны луоз.

Возьматонэз ХХ даурлэн кыкетӥ ӝыныяз-XXI даурлэн нырысетӥ ӝыныяз поттэм нылпиослы книгаос паськытатозы. Отчы пырозы «Пичиослы салам» (1965) но «Туриос» (1969) кылбуръёсын бичетъёс, школае мыныны дасяськись пиналъёслы «Вуюись» (1985) но «Шунды» (1987) хрестоматиос, семьяен лыдӟыны «Зарни дэремен шунды» (2006) но «Азвесь кышетэн толэзь» (2007) бичетъёс. Яркыт вылбамъёсынызы но суредъёсынызы синмез кыскозы 2011-тӥ арын потэм «Кузь кук Дарья» но «Бакча котырын» нылпи книгаос.

Пусйыны кулэ, туннэ хрестоматиосты кылдытӥсьёс Кузебай Гердлэсь ужъёссэ туала дышетскон программаосы пырто. Кылсярысь, адӟытонын 1992-тӥ арын потэм 1-тӥ но 2-тӥ классъёслы «Покчи эше» хрестоматия, 2003-тӥ арын потэм «Котырысь улон но мон», 5-тӥ-11-тӥ классъёсын дышетскисьёслы пӧртэм аръёсы потам «Удмурт литература» книгаос луозы. Гердлэн ужъёсыз ӵем гинэ «Луч», «Кизили», «Вордскем кыл», «Кенеш» журналъёсын потало.

Тодэ вайытом, 2019-тӥ арын Герд лыдӟонъёс Ижкарысь Кузебай Герд нимо йӧскалык гимназиын 21-тӥ тулыспалэ ортчозы шуыса пумкылъянэз радъясь комитетлэн кенешоназ кутӥзы. Конференцилэн темаез – «Кузебай Гердлэн выль удмурт интеллигенциез будэтон удысын тыршемез». Озьы ик ужрадын Кузебай Герд нимо йӧскалык премиез сётозы.

Ватсан

Кузебай Герд (Кузьма Павлович Чайников) вордӥськиз 1898 арын. Удмурт кылбурчи но гожъяськись, лингвист но дышетӥсь, кылысь кылэ берыктӥсь но мер ужъёсты быдэсъясь. Удмурт нылпи литературалы одӥгез кутскон сётӥсь. Улонысь кошкиз 1937-тӥ арын.


Наверх
Вниз