Ижкар+22 °C
11 -тӥ пӧсьтолэзь 2020 Кӧснунал
16+

Ижкарысь Кузебай Герд нимо йӧскалык гимназия Россиысь устоосыз дышетсконниос пӧлы пыриз

  • 533
  • 0
Ижкар / Удмуртия
Ижкарысь Кузебай Герд нимо йӧскалык гимназия Россиысь устоосыз дышетсконниос пӧлы пыриз
Туспуктэм: vk.com (БОУ УР "УГНГ им. Кузебая Герда")

Ижкарысь Кузебай Герд нимо удмурт йӧскалык гимназия Дышетон ужъюртъёслэн V огъяросси адӟытоназы вормисьёс пӧлы пыриз. Кызьы вераз ивортодэтъя «Удмуртия» агентстволы гимназилэн кивалтӥсез Татьяна Волкова, виртуальной адӟытонын соос калык лулчеберет ӧръя ужаменызы тодматӥзы.

Милям этнокультурной образование валтӥсь луэ бере, ми возьматӥмы, кызьы вань уровеньёсын – нылпи садысен кутскыса, ватсаса тодон-валан сётонозь, милям со быдэстӥське. Ми возьматӥм системаез, кыӵе милям емышъёсмы вань ини. Собере отын нимаз критерийёс вал эшшо, кызьы ми, кылсярысь, егит дышетӥсьёсын ужаськом. Возьматӥм выпускникъёсмес, кудъёсыз ӵапак калык культура удысэн герӟаськемын
Татьяна Волкова, К. Герд нимо удмурт йӧскалык гимназилэн кивалтӥсез

Солэн кылъёсызъя, гимназиялэн ужамез сярысь адӟытонэз рос-прос дасяны тыршизы. Нимысьтыз радъясь комитет кылдытыса, пӧртэм ужрадъёсысь дипломъёссэс, туспуктэмъёссэс, видоероликъёссэс бырйизы.

Табере сыӵе презентационной материалмы милям вань. Кык пайдаез луиз: сыӵе рос-прос презентационной материал ми бичаны быгатӥмы, систематизировать каримы, мукет ласянь, тани конкурсэ пыриськимы. Милям табере мылкыдмы туж бадӟым азьланяз но конкурсъёсы пыриськыны. <…> Рос-прос, командаен ужаса, луэ трос умойзэ лэсьтыны. <…> Ужпумъёсмы туж трос. Умой ужаны ӧжыт, сое возьматыны быгатыны кулэ. Соин ми али дышетскиськом возьматыны асьме ужмес
Татьяна Волкова, К. Герд нимо удмурт йӧскалык гимназилэн кивалтӥсез

Татьяна Волковалэн верамезъя, Дышетон ужъюртъёслэн V огъяросси адӟытонэ материалъёсты 2018-тӥ арысь 10-тӥ коньывуонысен 2019-тӥ арысь 20-тӥ тулыспалозь люказы. Отчы быдэс кунысь 19 сюрс 446 дышетсконниос пыриськизы. Тулыспалысен ӧнерлыко жюри ужаз, котькуд стенд понна куара сётон мынӥз. Ваньмыз пӧлысь сюрс устоосэ бырйизы.

Вормемзы сярысь удостоверение дышетсконние вуиз ни. Ӝоген дипломез но сертификатэз возьмало. Адӟытонэз ортчытонлэн одӥгез ужпумез дышетон юртъёслэсь ваньбурзэс юнматонэн герӟаськемын бере, Татьяна Волкова гимназия мар ке пайдаё тӥрлык басьтыны быгатоз шуыса оскемзэ вераз. 



Наверх
Вниз