Ижкар+18 °C
24 гудырикошкон 2019 Кӧснунал
16+

Валентина Корепанова: анай кылэз тодмет чотын дышетӥсьёслэн лыдзы Удмуртиын йылӥз

  • 520
  • 0
Ижкар / Удмуртия
Валентина Корепанова: анай кылэз тодмет чотын дышетӥсьёслэн лыдзы Удмуртиын йылӥз
Туспуктэм: Анжелика Тихонова

1-тӥ гудырикошконэ Удмуртиысь Дышетонэз азинтонъя институтын анай кыллы дышетӥсьёслэн «Методическое объединение как ресурс профессионального развития учителя родного языка и литературы» семинарзы ортчиз. Ужрадэ ивортодэтъя «Удмуртия» агентстволэн корреспондентэз но вуылӥз.

Семинаре элькунысьтымы ёросъёсысь методикая огазеяськонъёсысь удмурт но бигер кылъёслы 21 дышетӥсьёс люкаськизы. Озьы ик ужрадэ Удмуртиысь дышетонъя но тодосъя министерствоысь ӧнерчи Валентина Корепанова пыриськиз. Со анай кылэз дышетонэн герӟаськем эсэплыко ужкагазъёслэн валтӥсь валатэтъёссы (положениоссы), анай кылэз анай-атайёслэн куриськонзыя дышетон, анай кылзэс дышетӥсьёслэн лыдзы сярысь вераз.

Удмурт, пор, бигер кылъёсты предмет чотын дышетӥсьёслэн огъя лыдзы азьвыл аръёсын ӵошатыса, кылем арын 700-лы пала йылӥз. Но со дыре ик милемыз сюлэмшугъяськытэ нырысетӥ классын анай кылзэс дышетӥсьёслэн лыдзы кулэсмиз шуыса
Валентина Корепанова, Удмуртиысь дышетонъя но тодосъя министерствоысь ӧнерчи

Нош лыдзы азьланяз но медаз кулэсмы, мед йылоз шуыса, анай-атайёсын валэктон уж нуыны кулэ.

Семьяын анай-атайёсын ужаны кулэ, соослэсь йӧскалык асваланзэс нырысь ик ӝутоно. Али, ку куриськон гожтыса табере (анай кылэз – ред.) дышето, анай-атайёс решение куто, со эшшо но актуально луэ
Валентина Корепанова, Удмуртиысь дышетонъя но тодосъя министерствоысь ӧнерчи

Валентина Корепановлэн кылъёсызъя, та ласянь вань удысэтъёс ӵошен ужаны кулэ: анай кылъёслэсь кулэлыксэс возьматыны, пӧртэм ласянь юрттыны, тунсыко, туала улонлы тупась луонлыкъёс кылдытыны.

Со сяна, анайёслы валэктыны кулэ, мар сётэ анай кылъёсты тодон пиналлэн азинсконэзлы.

Анай кыл нылпилы азинскыны юрттэ. Эскеронъёс но возьмато, пинал анай кылзэ тодэ ке, солэн улон шоры учконэз но мукет, со кылъёсты но мукетгес вала, со мукет лулчеберетъёсы пырыны дасьгес, соос мукетэсь луо, иностранной кылъёсты но соос капчиенгес дышето шуыса
Валентина Корепанова, Удмуртиысь дышетонъя но тодосъя министерствоысь ӧнерчи

Солэн верамезъя, Удмуртиысь школаосын анай кылэз дышетӥсьёс тырмо. Та ласянь шугъяськон шер гинэ кылдэ, угось Удмурт кун университет но арлы быдэ выль дышетӥсьёсты поттэ. Пиналъёсты дышетон учебникъёс но тырмыт. Со сяна, выльзэ поттон бордын но тыршо.

Кык вариативной учебникъёс удмурт кылъя - валасьёслы но валасьтэмъёслы. Валасьёслы - со кыл но литература. Отын удмурт кыл, лыдӟон книга начальной классъёсын, литература 5-9 классъёсын. Но мукетыз - ми сое тодман понна «Ӟеч-а, бур-а, удмурт кыл» шуиськом. Соиз ӵапак удмурт кылэз тодӥсьтэмъёслы, ӟучомемъёслы
Валентина Корепанова, Удмуртиысь дышетонъя но тодосъя министерствоысь ӧнерчи

Бигер кылэз но литератураез дышетон сярысь бигер кылъя но литературая дышетӥсьёслэн методикая элькун огазеяськонэнызы кивалтӥсь Расима Садыкова вераз. Туэ инвожое со Казаньын ортчем бадӟым семинар-кенешонэ пыриськиз. Татарстанын олимпиадаосын вормись пиналъёсты дасям дышетӥсьёсты грантъёсын пусъё шуыса вераз, со сяна, дышетӥсьёслы трос гинэ ӧнеръя вожвылъяськонъёс ортчытъяло.

Ижкарын укмыс гинэ бигер кыллы дышетӥсьёсмы. Соос пӧлысь ньылез, эшшо Юкаменск ёросысь пыриськизы ини со ӧнеръя вожвылъяськонъёсы. Вань вормисьёсмы но
Расима Садыкова, бигер кылъя но литературая дышетӥсьёслэн методикая элькун огазеяськонэн кивалтӥсь

Озьы ик семинарын «Вордскем кыл» журналлэн шоръёзо дышетонъя ёзэтлэн редакторез Ирина Тимирзянова ас ужъёсынызы тодматӥз. Та издание дышетӥсьёслэн нырысетӥ юрттӥсьсы луэ шуыны яра, отын тужгес тунсыкоосыз но пайдалыкоосыз уажан амалъёс печатласько. Журналлы вуоно арын 30 ар тырмоз, Ирина Тимирзянова соин валче ортчоно ужрадъёс сярысь но вераз.

Ужрадэз Дышетонэз азинтонъя институтысь Йӧслыкъя но лулчеберетъя дышетонъя центрысь методист, Тьютор практикаосты азинтонъя центрен кивалтӥсь Андрей Клементьев радъяз но нуиз.

Та семинар юрттоз дышетӥсьёслы выль дышетскон арлы методикая огазеяськонъёссылэсь планзэс лэсьтыны, валтӥсь ужрадъёсты пыртыны. Анай кылэз но литератураез дышетонэн герӟаськем ключевой событиосты, дышетӥсьёсты чаклан ужрадъёсты
Андрей Клементьев, Дышетонэз азинтонъя институтысь Тьютор практикаосты азинтонъя центрлэн кивалтӥсез

Солэн кылъёсызъя, методикая огазеяськон анай кылъя но литературая дышетӥсьёслы азинскыны но будыны юрттӥсь ӧнерлыкъя огазеяськон луэ.

Наши партнеры

Наверх
Вниз