Ижкар+5 °C
21 куарусён 2019 Кӧснунал
16+

Выль нылпи садэз усьтӥзы Ижкарын

  • 620
  • 0
Ижкар / Удмуртия
Выль нылпи садэз усьтӥзы Ижкарын
Туспуктэм: Удмуртиысь тӧролэн но кивалтэтлэн пресс-службазы

Ижкарысь Баранов нимо ульчаын 20 номеро нылпи садлэсь кыкетӥ юртсэ усьтӥзы. Лэсьтӥськон ужъёслы федерал, улосвыл но кар коньдэтъёсысь 210 миллион манет быдтӥзы.

Выль юртэз пуктыны 2013-тӥ арын кутскизы, но коньдон тырмымтэен сэрен 2016-тӥ арын ужъёсты дугдытӥзы. 2017-тӥ арын Удмуртилэн тӧроез Александр Бречалов Росси кивалтэтэ юрттэт курыса вазиськиз. Коньдон резерв фондысь висъязы. Озьы кылем арын толшоре лэсьтӥськисьёс отчы вылысь пыризы.

Куинь этажъем юрт 220 интылы чакламын. Нырысетӥ этажын покчиослы группаос, эм висъет но хозблок луозы. Кыкетӥ этаже покчи но шор группаос пырозы, сиськонни, эм висъет но ватсаса тодон-валанъёс сётон кабинет интыяськозы. Выль нылпи садлэн аспӧртэмлыкез - STEM-дышетонъя лаборатория.

Таӵе нылпи садэз ёросамы туж кема возьмамы. <…> Ми школалэсь азьвыл ик STEM-дышетонэз пыӵатӥськомы – со робототехника, компьютеризация, мультиграфия
Ирина Калабина, 20 номеро нылпи садлэн кивалтӥсез

Куинетӥ этаже бадӟым нылпиослэн но школалы дасяськон группаос, крезьгуръя но спортъя залъёс интыяськизы. Ваньмаз висъетъёсы умой мебель, шудонъёс но туала тӥрлык басьтӥзы. Коридоръёсы гинэ но магнит доскаос, суреданы тӥрлык пуктӥзы.

Ижкарысь Баранов нимо ульчаын нылпи садэз усьтон

8 фото

Нылпи садлэн интывылаз спортэн вырын площадка но поръяны 12 вӧл-вӧл участокъёс.

Татын пушъёзы но азинскозы со быгатонлыкъёс, кудъёсызлы луыса азьланяз пиналъёсмы элькунмес быдэс дуннеын возьматозы
Анастасия Муталенко, Удмуртиысь кивалтэтлэн тӧроезлэн воштӥсез

Баранов нимо урамысь выль нылпи сад коньывуонэ рос-прос ужаны кутскоз.

Али ми берпуметӥоссэ кулэ ужкагазъёсты дасяськомы. Малпасько, куарусёнэ пиналъёсты дышыны шуыса кутыны кутскомы ни
Ирина Калабина, 20 номеро нылпи садлэн кивалтӥсез

Туннэ Ижкарын нылпи садъёсы черодын 6 сюрслэсь трос куинь аресозь пиналъёс. Ваньзылы инты висъян понна 220 интыем 30 садъёс пуктыны кулэ.

Ижкарлэн тӧроез Олег Бекмеметьев вераз, али Сельхозвыставка микрорайонын 116 интылы нылпи сад пукто шуыса. Солэн кылъёсызъя, карлэн школаосты но нылпи садъёсты пуктон пумысен азьланезлы ужанрадлыкез вань.

Ми пусйимы музъемъёсты, кытын генпланъя но лэсьтӥськон куронъёсъя нылпи садъёс но школаос пуктыны луэ. Матысь дыре ми с чакланъёсты Удмуртиысь кивалтэтын эскеромы но пусъёмы, кытын но ку лэсьтӥськыны ужпумъёс пуктомы
Олег Бекмеметьев, Ижкарлэн тӧроез

Ватсалом, Росси азьмуртэн кичӧлтэм «Демография» йӧскалык ӵектосъя Удмуртиын яслиосын нылпи садъёс пуктыны ужпум сылэ. Ар пумозь элькунын ясли группаосын 2 сюрслэсь трос интыос кылдозы. 

Тодэ вайытом, 2019-тӥ арын толсуре Удмуртиысь 10 ёросъёсын но каръёсын нылпи садъёс усьтыны чакламын

Наши партнеры

Наверх
Вниз