Ижкар+10 °C
19 -тӥ куарусён 2020 Кӧснунал
18+

Этнографи диктант гожтыны ӧтё Удмуртиын улӥсьёсты

  • 389
  • 0
Ижкар / Удмуртия
Этнографи диктант гожтыны ӧтё Удмуртиын улӥсьёсты
Туспуктэм: Григорий Фомин

1-тӥ шуркынмонэ Удмуртиын «Бадӟым этнографи диктант» калыккуспо акция ортчоз. Тестэз очной но заочной амалъёсын ортчыны луоз. Со сярысь журналистъёслы Удмуртиысь йӧскалык политикая министр Лариса Буранова ивортӥз.

Кунамы улӥсьёслэн этнокультурной тодон-валанзы, мон малпамъя, трос йӧслыкъем кунын тупаса но огсыр улонэз кылдытонлэн инъетэз луэ. Со бадӟым данъяськон, уго ӵектос асьмелэн удмурт музъем выламы малпамын вал, али со паськыт вамышъя, со бадӟым кылкутон
Лариса Буранова, Удмуртиысь йӧскалык политикая министр

Диктант 1-тӥ шуркынмонэ котькуд улосвылын интыысь дыръя 11 часын кутскоз. Ижкарын пыриськисьёсты 33 интыын возьмалозы, валтӥсез соос пӧлысь – Калыкъёслэн эшъяськон юртсы. Отчы люкаськемъёс мастер-классъёсы пыриськыны быгатозы. Акция школаосын но вылӥ дышетон юртъёсын, лыдӟетъюртъёсын но ёрос центръёсын ортчоз. Туннэ нуналлы Удмуртиын 233 интыос пусъемын, огез соос пӧлысь - Тол Бабайлэн юртъерез.

Со сяна, 1-4 шуркынмонэ тестэз онлайн амалэн но ортчыны луоз

Диктантэ 30 юан пыртэмын, заочной амалэн тест ортчисьёслы вань 30 юанъёс быдэс кунмыя луозы. Очно гожтӥсьёслы 20 юанъёс федерал, 10 – улосвыл. Диктантын троссэ 100 балл люканы луоз.

Очной амалэн тест гожтӥсьёслы йылпумъянъёсты 12-тӥ толсуре гинэ шараялозы, нош тестированиез заочной амалэн ортчисьёс баллъёссэс соку ик адӟозы. 

Диктантэ пыриськыны Европаысь, Африкаысь но бускель  21 кунъёс мылкыд каризы ини

Кунгож сьӧрын диктантэз посольство бордын ужась дышетон юртъёсын гожтыны луоз. Вань юанъёс ӟуч кылын сётэмын. Интыосты пусъён 29-тӥ коньывуонозь сайтын ортче. Отын ик онлайн-диктант но гожтыны луоз.

Кылем арын Удмуртиын шоро-куспо балл 55 вал, кунъя но диктантэз «куиньлы» гожтӥзы. Али кык федерал удысэтъёс - Йӧскалык ужъёсъя федерал агентство но Россиысь Просвещениея министерство - дышетон юртъёсын уже кутон понна методикая ӵектонъёс, этнографияя материалъёс дасяло.

Тодэ вайытом, кылем арын очной амалэн диктантэ 10 сюрслэсь трос адями пыриськиз. Шоро-куспо арлыдзы – 36 арес. 



Наверх
Вниз