Ижкар+22 °C
11 -тӥ пӧсьтолэзь 2020 Кӧснунал
16+

Глаз ёросысь школа Россиысь 100 устоосыз школаос пӧлы пыриз

  • 548
  • 0
Санкт-Петербург / Россия
Глаз ёросысь школа Россиысь 100 устоосыз школаос пӧлы пыриз
Туспуктэм: vk.com (Управление образования Глазовского района)

Удмуртиысь Глаз ёросысь Куреггуртысь школа «Россиысь устоосыз 100 школаос» («100 лучших школ России») огъяросси конкурслэн лауреатэз луиз. Со сярысь Глаз ёросысь дышетонъя управленилэн «ВКонтакте» мерлыко вотэсысь огиназ ивортэмын.

«Россиысь устоосыз 100 школаос» вожвылъяськонлы йылпумъянъёс 25-28 коньывуонэ Санкт-Петербургын дышетонъя «Школа будущего» VIII огъяросси форумын лэсьтӥзы. 

Кызьы вераз Куреггурт школаысь удмурт кылъя дышетӥсь Маргарита Чибышева, со одӥг ар гинэ ужамзылы дунъет ӧвӧл, «сыӵе бадӟым вормонъёс арысь аре люкасько, лыкто».

Школамы туж данъяське выпускникъёсынымы. Собере со выпускникъёсмы асьмелэсь гурт хозяйствомес но возё. Берлояз гурт хозяйствоосын ужасьёслы сӥзем праздникын одӥгез ужасьмы - Гудочкин Александр Игнатьевич, школамес быдтыса со ужа колхозамы, пусъемын Россиысь гурт удысын сӥё-дано ужась нимын. Со-а дунъет ӧвӧл?! Со школалэн но ужамез шуыса малпаськомы. Собере озьы ик анай-атайёсын зол кусып возьыса ужаськомы. <…> Озьы ик нылпиослэн ужамзы но
Маргарита Чибышева, Глаз ёросысь Куреггурт школаысь удмурт кылъя дышетӥсь

Солэн верамезъя, 2017-тӥ арын 9-тӥ классын дышетскисьсы, Антон Журавлёв, ёросазы «Арлэн дышетскисез» луиз. Кылем арын 7-тӥ классы «Самый классный класс» ним басьтӥз. Озьы ик 2018-тӥ арын школаысьтызы коллективез Глаз ёрослэн данъян пул вылаз пыртӥзы.

Собере школаямы ортчытӥськомы котькуд аре удмурт шаерлэн нуналэзлы сӥзьыса ужрад, пиналъёс станциысь станцие ветлыса удмурт шаермылэн историеныз но тодматско, культураеныз но тодматско. Собере ёросамы но, мукет ёросэ но потӥмы ини «Зарни шыкыс» фестиваленымы. Именно удмурт шаерын улӥсь калыкъёслэн культураенызы тодматонэн, сыӵе ужрадъёс, малпасько, сёто тӥни сыӵе азинлык
Маргарита Чибышева, Глаз ёросысь Куреггурт школаысь удмурт кылъя дышетӥсь

Куреггуртысь школалэн кивалтӥсез Александра Туктарева, «Россиысь устоосыз 100 школаос» вожвылъяськонлэсь зарни медальзэ сяна, «Директор 2019 года» гадьпус басьтӥз.

Зэм ик но, кивалтӥсь бордысь туж трос потэ. Кудӥз-огез, оло, йырзэ но кур каре куддыръя зол но юа шуыса, но кивалтӥсьлы туэ сыӵе кулэ луыны. Ачиз но пример возьматэ: оло, уй-нуналзэ школаын ортчытэ. Собере, солэсь адӟем карыса, коллектив но палэнэ уг кыльы
Маргарита Чибышева, Глаз ёросысь Куреггурт школаысь удмурт кылъя дышетӥсь

Тодэ вайытом, 25-тӥ коньывуонэ Можгаысь 10 номеро школалы Сергей Александрович Маев генерал-полковниклэсь нимзэ сётӥзы



Наверх
Вниз