Ижкар-1 °C
29 -тӥ коньывуон 2020 Покчиарня
18+

Юрий Перевощиков нимо визьбур вожвылъяськонлы йылпумъянъёс лэсьтӥзы Ижкарын

  • 590
  • 0
Ижкар / Удмуртия
Юрий Перевощиков нимо визьбур вожвылъяськонлы йылпумъянъёс лэсьтӥзы Ижкарын
Туспуктэм: vk.com (Александр Корепанов)

Ижкарын бадӟым классъёсын дышетскисьёс пӧлын тодосчи, Трокай Борисов нимо йӧскалык премилэн лауреатэз Юрий Перевощиков нимо визьбур вожвылъяськонлы йылпумъянъёс лэсьтӥзы. Туэ ужрадэ 130 пиналъёс пыриськизы. Со сярысь ивортодэтъя «Удмуртия» агентстволы огез радъясез Александр Корепанов вераз.

Вожвылъяськон улсын пиналъёс куинь ӧръя ужъёс гожтӥзы: экономика, обществознание но удмурт кыл. Котькуд люкетэз быдэстыны 30 минут висъяськиз, ужъёс тест амалэн радъямын вал.

Удмурт кылъя туэ тест лэсьтоно вал. Собере кылъёсты ӟуч кылэ берыктоно вал, удмурт писпу нимъёсты, но сочинение гожтоно. Сочинение Удмурт элькунлэн кунлыкезлы 100 ар тырмонэн герӟамын вал. Темаез - «Удмурт кыллы синпелет». Потэ вал нылпиослэсь малпанзэс кылэммы, кулэ-а, ӧвӧл-а удмурт кыллы памятник, кытын со кулэ луыны но кыӵе со кулэ луыны шуыса
Александр Корепанов, визьбур вожвылъяськонэз огез радъясь

Пусйыны кулэ, сочинениез удмурт но, ӟуч но кылын гожтыны луиз. Но ӟучен гожтэм ужъёслы ӧжытгес балл сётӥзы.

Визьсынанэ котькуд классысь кык адямиен командаос пыриськизы. Озьы пиналъёслэн ужъёссылы нимаз но дунъет сётӥзы. Оглом вераса, вожвылъяськонын котькуд ӧръя ас чотын, оглом вань ӧръёсъя ас чотын но командаен вормисьёсты бырйизы. 

Туэ вормисьёс пӧлын Ижкарысь Кузебай Герд нимо гимназиысь но Пичи Пургаысь школаосысь пиналъёс тужгес трос луизы

Александр Корепановлэн верамезъя, ужрадэ пыриськись ёросъёс тросгес луо.

Туэ, шумпотымон, Грак ёрос но итӥськиз, кылем арын ӧй вал. Но мукет ёросъёс, кинъёс кылем арын пыриськизы, соосгес вал: Пичи Пурга ёрос, Кияса ёрос, Балезино ёрос, Шаркан ёрос, Вавож, Ува ёрос но Грак ёрос. Нош Ижкарысь озьы ик туэ пыриськизы 56-тӥ гимназия, Кузебай Герд нимо гимназия, 10 номеро школа, 100 номеро школа
Александр Корепанов, визьбур вожвылъяськонэз огез радъясь
 

Ужрад удмурт пиналъёслы экономика, кылосбур удысъёсты бырйыны мылкыд пыӵатон понна, Удмурт кун университетысь экономикая но удмурт кылосбуръя институтъёсы дышетскыны пырыны луонлыкъёссэс будэтон понна ортчытӥське. Угось 11-тӥ классын дышетскисьёс пӧлын вормисьёслы университетэ дышетскыны пырыкузы ватсаса кӧня ке балл сётӥське.

Удмурт кун университетын визьбур вожвылъяськон туэ кыкетӥзэ ортчиз ини. Кылем арын 90 пиналъёс пыриськизы ке, туэ 40 адямилы тросгес ни. Соин валче ужрадэз азьланяз но арлы быдэ ортчытыны чаклало.

Нылпиослэн мылкыдзы вань. Куд-ог ёросъёс туж трос мылкыд карисьёссы но шуизы, соин ик вуоно арын соос малпало ини ёросазы нырысь ортчытыны та конкурсэз, нош собере вормисьёсты ини элькунэ келяны
Александр Корепанов, визьбур вожвылъяськонэз огез радъясь
 

Пусъём, ужрадэз Кузебай Герд нимо гимназия, Удмурт кун университетысь Экономикая но управлениея институт но Удмурт кылосбуръя, финноугроведениея но журналистикая институтъёс радъязы. 

Тодэ вайытом, кемалась ӧвӧл тодосчилы Юрий Перевощиковлы Трокай Борисов нимо премия сётӥзы но нимзэ Удмуртилэн Данъян пул вылаз пыртӥзы



Наверх
Вниз