Ижкар+13 °C
16 -тӥ гудырикошкон 2020 Воскресенье
16+

Выль ӟуч-удмурт кыллюкамез кык томен поттозы Удмуртиын

  • 989
  • 0
Ижкар / Удмуртия
Выль ӟуч-удмурт кыллюкамез кык томен поттозы Удмуртиын
Туспуктэм: Майя Бывальцева

Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая удмурт институтысьтыз ӧнерчиосын дасям выль ӟуч-удмурт кыллюкам кык томен, оглом 2 сюрс пала бамен потоз. 27-тӥ шуркынмонэ, Удмурт кыллэн нуналаз, кыллюкамез кылдытӥсьёс журналистъёслы солэн аспӧртэмлыкъёсыз сярысь веразы.

Нырысь ик ӧм малпалэ вал кык томен со луоз шуыса, сомында люкаськоз шуыса. Но нырысь 56-тӥ арын потэм словарь <…> ӟуч-ӟуч луэмын. Вакытэз но сыӵегес вал, дыр, национальной кылъёсты соку туж ик вылэ ӧз ӝутэ вал, собере отын ӧжыт фактической материалэз, примеръёсыз, предложениосыз. Соин ик тазэ лэсьтонэз быдтон калэ вуыкумы уж туж трос луиз – 2 сюрс страница пала, соин ик кык томен кароно луиз
Леонид Ившин, Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя ӧнерчи, кыллюкамлэн кылкутӥсь редакторез

Нырысетӥяз 936 бамъем томе «О» букваозь кылъёс пыризы. Кыкетӥез 1 сюрс 16 бамъем луиз, отчы «П» букваысен кылъёс сяна, удмурт кыллэн кылрадъянэзъя (грамматикаезъя) очерк но инты нимъёсын лыдмет шедизы.

Историяя, кылъя но литературая удмурт институтэн берлозэ 1956-тӥ арын поттэм ӟуч-удмурт кыллюкамен ӵошатыса, таяз удмурт кыл ласянь узыргес луиз.

Выль кылъёс кылдытылӥм куддыръя, малы ке шуоно орфографической словарьын соос ӧй вал. Ӟучысь ӟуче берыктыны ке толкование амалэн, со туж кузь луэ, соин ик ми кытысь ке марзэ ке куштылӥм, кудзэ ке кылэз борды кыл лякылӥм
Леонид Ившин, Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя ӧнерчи, кыллюкамлэн кылкутӥсь редакторез

Выль кылъёс малпано луиз берло дыре кутӥськыны кутскем кылъёслы. Кылсярысь, тани «сеть» кыллы, кудӥз «интернет» валатонэн кутӥське. 

Асьмелэн «вотэс» кылмы вал, со «чонари вотэсэн» кутӥське вал, «паутина» шуонэн. Собере ми малпам но, «вотэс» шуыса берыктӥм «интернет» кылэз
Леонид Ившин, Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя ӧнерчи, кыллюкамлэн кылкутӥсь редакторез

Леонид Ившинлэн верамезъя, ӟуче мукет кылъёсысь асэстэм кылъёсты берыктонэн трос ӧз выре, соослы вакчияк валэктонъёс гинэ сётӥзы. 

Тросэзлы кылъёслы валэктон сётъям, малы ке шуоно ӟуч кыл азинске, туж трос значениосыз выль пото, соин ин огзэ мукетызлэсь висъян понна пичияк толкованиос сётэмын. Соин ик та словарьмес толковой но пичияк шуыны луоз
Леонид Ившин, Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя ӧнерчи, кыллюкамлэн кылкутӥсь редакторез

Выль кыллюкамен тодматскон
Выль кыллюкамен тодматскон Фото: Майя Бывальцева © udmurt.media

Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя валтӥсь ӧнерчи, кылосбур тодосъя доктор Людмила Карпова верамъя, калык кемалась куре ни вал таӵе кыллюкамез. Со бордын ужакузы тодосчиос азьвыл аръёсы потэм пӧртэм-пӧртэм кыллюкамъёсты, кигожтос синпелетъёсты лыдэ басьтӥзы.

Жаляса верано, асьмелэн трос кыллюкамъёсмы ӧвӧл. Соин ик, куке таӵе уж лэсьтӥське, со туж бадӟым инъет луэ асьме кылмес азинтыны но, мед со кылёз азьланяз вераськонын шуыса. <…> Али поттэм кыллюкам луоз узыргес, трослы узыргес. Ми со понна кер ум потэ, ми ум возьдаське со понна, кызьы со лэсьтэмын
Людмила Карпова, Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя валтӥсь ӧнерчи

Выль кыллюкам бордын институтысь тямыс тодосчиос ньыль ар ӵоже ужазы. Зэмзэ вераса, со туж ӧжыт, словарьёс лэсьтон бордын нимысьтыз лексикографической группа дасо аръёсын ужаны кулэ, вераз Леонид Ившин. Шугъяськонъёс кылдылӥзы выль кылъёсты шонер гожтон пумысен но.

Термино-орфографической комиссиос азьло золгес ик ужало вал, нош али та словарез лэсьтыкумы тужгес но секыт вал, выль кылъёс пӧрмытыса, ум тодӥське, кызьы гожтыны. Со разработать каремын ӧвӧл, кызьы соосты, сложной кылъёсты, гожтыны: ӵош-а гожтоно сое, нимаз-а гожтоно. Нокытысь сыӵе юрттэт ӧй вал. Кызьы гожтӥм, гожтӥм, озьы ик кылёз ни со, дыр, табере
Леонид Ившин, Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя ӧнерчи, кыллюкамлэн кылкутӥсь редакторез

Али Эскеронъёсъя удмурт федерал центрысь ӧнерчиос удмурт кыллэсь йӧскалык корпуссэ кылдытон бордын ужало. Выль кыллюкам, озьы ик 2008-тӥ арын потэм удмурт-ӟуч кыллюкам, со корпуслэн люкетъёсыз луозы. Калыклэсь лулчеберетъя кылёсбурзэ утён ласянь но со туж бадӟым инты басьтэ, пусйиз Центрлэн кивалтӥсезлэн воштӥсез, истори тодосъя доктор Людмила Бехтерева.

Ужпум шоры инъет кылдытон сямен учконо ке, <…> со кыллюкамъёс бордын ужлы но азинскон сётоз, малы ке шуоно татын вань фразеологической словарь, синонимъёслэн словарьзы, толковой словарь. Со ӧръёсты азинтыса, ми нимаз кыллюкамъёс лэсьтыны быгатӥськомы
Людмила Бехтерева, Эскеронъёсъя удмурт федерал центрлэн кивалтӥсезлэн воштӥсез

Выль кыллюкам элькунысь йӧскалык политикая министерство юрттэмен Удмуртилэн кунлык басьтэмезлы 100 ар тырмон улсын 2 сюрс экземплярен 2019-тӥ ар пумозь потоз. Озьы ик ар пумозь солэн электрон амалэз дась луоз. 



Наверх
Вниз