Ижкар+15 °C
18 -тӥ куарусён 2020 Удмуртарня
18+

Ижкарысь Кузебай Герд нимо гимназилэн кивалтӥсез: ӵуказеез туж шудо луоз гимназилэн

  • 641
  • 0
Ижкар / Удмуртия
Ижкарысь Кузебай Герд нимо гимназилэн кивалтӥсез: ӵуказеез туж шудо луоз гимназилэн

Ижкарысь Кузебай Герд нимо кун йӧскалык гимназия 25 ар тырмонзэ пусйиз. 30-тӥ шуркынмонэ Удмуртиысь йӧскалык театрлэн юртаз ортчем сӥё-дано ужрадэ гимназилы кутскон сётӥсьёс, дышетӥсьёс, пиналъёс но анай-атайёссы, элькун министерствоослэн ыстэм муртъёссы, сьӧрлось ӧтем куноос люкаськизы.

Та нуналэ трос шуныт кылъёс, тау каронъёс чузъяськизы йӧскалык гимназилэн нырысетӥ кивалтӥсезлы Ольга Шиловалы. Солэн нырысетӥ 10 аръёс ӵоже кивалтэмез улсын дышетсконни юнмаз, кулэлыксэ возьматыны быгатӥз.

Улыса-улыса, малпаса-малпаса, мон кызьы сое вормиськем? Дӥсьтонэ но тырмем, кужыме но тырмем нюръяськыны ваньмыныз шуод-а, мар-а. Но юрттӥсьёс но вал, туж валазы монэ, малы ке шуоно вылӥ кивалтӥсьёс ӧй ке юрттысалзы, ӧй ке саклык висъясалзы, мон сое усьтыны ӧй быгатысал. Котьку но, дыр, артэ кулэ адямиос, кудъёсыз тонэ валало, кудъёсыз сёто тыныд сюрес
Ольга Шилова, Кузебай Герд нимо гимназилэн нырысетӥ кивалтӥсез

Ольга Шилова али но ваньзэс сямен гимназиын дышетскем пиналъёсты нимын-нимын тодэ. Соос мынам улонэ но дӥсьтонэ, шуэ.

1995-тӥ арын, гимназилэн нырысетӥ ужан араз, нырысетӥ классэ мынӥз кырӟанъя калыккуспо вожвылъяськонъёслэн лауреатсы, «Шулдыр ӝыт» ансамбльлэн чеберлыкъя кивалтӥсез Наталья Ушакова. Нырысетӥ луыны секыт вал, тодаз вае со. Соку дышетонын эскеронъёс трос вал, тросэз дышетӥсьёс соку гинэ ужаны кутскизы, аслаз юртэз но рос-прос ӧй вал ай. Но гимназия валтӥсьсэ сётӥз – удмурт кылэз яратон, пусйиз Наталья Ушакова.

Со пыӵатӥз яратон удмурт анай кыллы, малы ке шуоно мон гимназиозь тодӥ одӥг-ог кыӵе ке кылъёсты удмурт кылын, но гимназиын именно мон тодӥ, мар со удмурт кыл, мон дышетӥ та кылэз, яратӥ та кылэз. Азьланяз но, али но ужын, мыным со туж-туж юрттэ. И, конешно, гимназия сётӥз мыным зэмос эшъёсме. <…> Дышетӥсьёслы тау. Нырысетӥ дышетӥселы Татьяна Михайловна Волковалы
Наталья Ушакова, Кузебай Герд нимо гимназилэн выпускникез

Озьы ик Герд гимназиын дышетскиз «Шулдыр ӝыт» ансамбльын мукетыз кырӟась - Эльвира Панченко. Солэн верамезъя, дышетсконни одӥг бадӟым семья кадь вал, эшъяськонзы али но азьланьтӥське.

Гимназия пыр удмурт дуннеез усьтӥз ӟуч нылаш Дарья Шиляева. Удмурт кыл быдэс улонме воштӥз, шуэ со. Ас вакытаз нылаш «Шундыкар» но «Вамыш» лагерьёсы, пӧртэм удмурт ужрадъёсы мылко-кыдо пыриськиз. Али со Португалиын улэ, Лиссабонысь католической университетын «Политология но калыккуспо кусыпъёс» ӧръя 2-тӥ курсын дышетске. Яратоно гимназиезлэсь вордскем нуналзэ пусйыны Ижкаре юри лыктӥз.

9-тӥ классозь отын дышетски, удмурт кылэз дышетӥ, со понна туж-туж тау карисько мынам удмурт кылъя дышетӥсезлы Широбокова Валентина Григорьевналы. Со возьматыны быгатӥз, удмурт кыл со туж тунсыко шуыса, со туж кулэ мар ке шуыса. Со бордысь, дышетӥсь бордысь, потӥз сыӵе бадӟым тунсыкъяськонэ удмурт кылэн, оглом удмурт культура доры кыстӥськонэ. <…> Туж трос калыкез тодӥ удмурт кыллы, удмурт культуралы луыса
Дарья Шиляева, Кузебай Герд нимо гимназилэн выпускникез

Кузебай Герд нимо гимназиен юн кусыпъёсыз Удмуртилэн Кун Кенешысьтыз тодосъя, дышетонъя, лулчеберетъя, йӧскалык но егитъёсын ужан политикая ялан ужась ӧрилэн кивалтӥсезлэн, «Удмурт Кенеш» огазеяськонлэн тӧроезлэн Татьяна Ишматовалэн. Ог вакытэ со отын ужаз, отчы дышетскыны ветло нылпиосыз.

Одӥгез люкетэз сюлэмылэн отын, со отысь люкиськыны нокызьы уг быгаты, медаз но люкиськы. <…> Мынам туж потэ вал со гимназия мед луоз сыӵе инты, кытын удмурт пиналъёсмы шӧдо асьсэзыс семья пушкын кадь, вылӥ тодон-валан быгато басьтыны но со дыре ик удмуртлык пӧлын мед будыны быгатозы шуыса
Татьяна Ишматова, Кун Кенешысь ялан ужась ӧрилэн кивалтӥсез, «Удмурт Кенеш» огазеяськонлэн тӧроез

Кылдэмез дырысен йӧскалык гимназиен матысь кусыпъёс возе Удмурт кун университетысь Удмурт кылосбуръя, финно-угроведениея но журналистикая институт (азьвыл удмурт кылосбуръя факультет). 1990-тӥ аръёсы гимназиын аспӧртэмлыко колледж кылдытӥзы вал, отын пиналъёс англи кылэз муромытыса дышетӥзы. Али институтлэн инъет луись кафедраез ужа.

Милям студентъёсмы одно ик потало отчы практикае, тодматско азьмынӥсь методикаосын. Соин ик мон шуысал ми мылысь-кыдысь келяськомы студентъёсмес гимназие, угось отын соос басьто выль тодон-валанъёс. <…> Милям котьку но институтамы вань гимназиысь дышетскисьёс, соос тыршо утьыны гимназилэсь сётэм традициоссэ но пыриськыны тыршо пӧртэм ужрадъёсы. Озьы ик соос возьмато удмурт кылэз, лулчеберетэз кунгож сьӧрын но, собере, выль тодон-валан басьтыса, берытско ми доры но, куд-огез озьы ик берытско асьсэ гимназиязы но
Наталья Кондратьева, УдГУ-ысь Удмурт кылосбуръя, финно-угроведениея но журналистикая институтлэн кивалтӥсез

Озьы ик валче ужрадъёс но радъялляло. Кылсярысь, туэ кыкетӥзэ ни экономика тодосъя докторлы Юрий Перевощиковлы сӥзем визьбур вожвылъяськон ортчытӥзы.

Ог дасо аръёс талэсь азьвыл, гимназиен Анжелика Михеева кивалтон дыръя, Таллинысь Нымме гимназиен эшъяськыны кутскизы. Кык дышетон юртъёсысь дышетӥсьёс ог-огзы дорын усьтэм урокъёс ортчытъяло, учебникъёсын вошъясько. Со сяна, Эстониысь пиналъёс «Шундыкаре» но вуылӥзы. Удмурт гимназилэн вордӥськем нуналаз Ижкаре эстон дышетсконнилэн кивалтӥсезлэн воштӥсез Карин Клеммер но англи кылъя дышетӥсь, финн-угор ӵектосъёсъя координатор Керсти Сеппер лыктӥзы. Соослэн верамзыя, пиналъёссы туж умой тодо, кытын интыяськемын Удмуртия, кинъёс со удмуртъёс.

Туэ Удмуртиысь делегация вуылӥз, соос (пиналъёс – ред.) ваньзы «Ӟечбуресь!» шуизы, кылсярысь, урамысен но, угось соос тодмазы. Шахтин пӧрась школаямы быдэс нунал вал, соос удмурт сиёнъёсты сиизы, со ми понна паймымон вал, пиналъёс туннэ но тодазы ваё на
Керсти Сеппер, Таллинысь Нымме гимназиысь англи кылъя дышетӥсь

Гимназиын ужасьёсты но пиналъёсты ӟечкылаз Удмуртиысь йӧскалык политикая министр Лариса Буранова. Та кун ёзэслы туэ озьы ик 25 ар тырмиз. Ми кыктоос кадь, пусйиз министр.

Удмуртиысь кун йӧскалык политика Кузебай Герд нимо йӧскалык гимназитэк ӧвӧл, малы ке шуоно гимназия со огшоры дышетон юрт, огшоры школа гинэ ӧвӧл. Йӧскалык гимназия котькуд калык понна, озьы ик удмуртъёс понна но, - со вуоноезлы оскон. Со кыллэн та музъем вылын улонэзлы оскон, <…> пиналъёс - быдэс калыклэн осконэз
Лариса Буранова, Удмуртиысь йӧскалык политикая министр

Кун Думаысь депутатлэн Алексей Загребинлэн верамезъя, 25 ар тырмонзэ пусйыса, гимназилэн выль вакытэз кутске. Адями арлыдэн ӵошатоно ке, табере со бадӟым ни, солэсь тросгес юалозы но.

Дышетон юртлэн кивалтӥсез Татьяна Волкова верамъя, азьланяз соос эшшо тросгес олимпиадаосы, вожвылъяськонъёсы пыриськыны тыршозы. Со гимназилы гинэ кулэ ӧвӧл, асьсэлы пиналъёслы но, озьы соослэн ас кужымзылы осконзы будэ, шуэ кивалтӥсь. Озьы ик со дышетӥсьёслы, анай-атайёслы тау кариз но пусйиз, гимназия Кузебай Гердлэсь нимзэ юнме уг нуллы. Соос, Герд сямен ик, лёгем сюрессы вылысь уз коже, пуктэм ужпумъёссэс пумозяз быдэсъялозы.

Ӵуказеез туж шудо луоз гимназилэн. <…> Гимназия озьы ик азинскоз, вамышъялоз азьлань. Кызьы ми вераськомы: милям бурдъёсмы вӧлъямын, ми лобиськомы азьлань
Татьяна Волкова, Кузебай Герд нимо гимназилэн кивалтӥсез

Тодэ вайытом, 2019-тӥ арын Ижкарысь Кузебай Герд нимо удмурт йӧскалык гимназия Дышетон ужъюртъёслэн V огъяросси адӟытоназы вормисьёс пӧлы пыриз. Озьы ик туэ гимназилэн «Проектный офис удмуртских школьников» ӵектосэз Егитъёслэн ӵектосъёссыя Росмолодёжлэн огъяросси конкурсаз вормисе потӥз, нош сӥзьыл ини элькунысь куинь школаосысь пиналъёс со ӵектос улсын лэсьтэм проектъёссэс улонэ пыӵатыны грантъёс утӥзы.



Наверх
Вниз