Ижкар-5 °C
8 -тӥ южтолэзь 2021 Вордӥськон
18+

Удмуртиысь дышетӥсьёслы но визьнодасьёслы калык педагогикая семинар ортчиз Лудорвайын

  • 601
  • 0
Лудорвай / Удмуртия
Удмуртиысь дышетӥсьёслы но визьнодасьёслы калык педагогикая семинар ортчиз Лудорвайын
Туспуктэм: Анжелика Тихонова

5-тӥ толсуре Дэри ёросысь Лудорвайысь шоръёзо школаын Удмуртиысь Дышетон удысысь йӧскалык ужпумъёсты эскеронъя тодос институт элькунысь дышетӥсьёс но визьнодасьёс понна «Этнопедагогика формирований языковой личности дошкольника и младшего школьника» темая научно-практической семинар ортчытӥз. Со сярысь ивортодэтъя «Удмуртия» агентстволэн корреспондентэзлы институтысь тодосъя валтӥсь ӧнерчи Зоя Суворова вераз.

Ми туж шумпотӥм, быдэс элькунысь 75 адями лыктӥз шуыса. Шер озьы луэ, 30-40 адями лыктэ, нош 75 адями лыктӥз бере, ми малпам, темамы сюлэмшугъяськытӥсь луэ шуыса
Зоя Суворова, Удмуртиысь Дышетон удысысь йӧскалык ужпумъёсты эскеронъя тодос институтысь тодосъя валтӥсь ӧнерчи

Ӧнерчилэн верамезъя, Лудорвайысь школа институтлэн огез инновациосъя площадкаез луэ. Соин ин но семинарез татын ортчытыны малпазы.

Тани та школа, тросэз школаос озьы ик, туж яратыса ужа шаертодонъя, калык сямъёсъя, калык чакланъёсъя, калык календарья. Кивалтӥсез но Мерзлякова Надежда Николаевна ачиз удмурт кылэз но литератураез нуэ, туж яратыса но быгатыса. <…> Со туж поддержать каре дышетӥсьёсты но, визьнодасьёсты но, кин удмурт кылэз нуэ. Соин ик та ласянь милемлы капчи, малы ке шуоно кивалтӥсь вала кулэлыксэ та ужлэсь
Зоя Суворова, Удмуртиысь Дышетон удысысь йӧскалык ужпумъёсты эскеронъя тодос институтысь тодосъя валтӥсь ӧнерчи

Ачиз Зоя Суворова ужрадэ люкаськем дышетӥсьёслы но визьнодасьёслы калык педагогикалэсь валатонзэ, кызьы калык педагогика, ӟеч сямъёсты пыӵатыны сяна, пиналъёслэсь кылтӥрлыксэс но малпаськон радзэс азинтыны юрттэ вераз.

Котькуд кыл – со быдэс лулчеберет, котькуд кыл – со аспӧртэм малпаськон рад. Малы ке шуоно малпаськонлэн йӧскалык аспӧртэмлыкез вань
Зоя Суворова, Удмуртия Дышетон удысысь йӧскалык ужпумъёсты эскеронъя тодос институтысь тодосъя валтӥсь ӧнерчи

«Пинал ӟечгес вераське ке, солэн малпаськон радыз но азинске», - шуэ ӧнерчи. Соин ик али валтӥсь ужпум – удмурт кылэз дышетыны мылкыд сётон бордын.

Пичиен-пичиен, шапыкен-шапыкен, пӧртэм-пӧртэм амалъёсын выриськом пиналъёслэсь но, анай-атайёслэсь но удмурт кылэз дышетыны мылкыдзэс ӝутыны
Зоя Суворова, Удмуртиысь Дышетон удысысь йӧскалык ужпумъёсты эскеронъя тодос институтысь тодосъя валтӥсь ӧнерчи

Семинаре люкаськем дышетӥсьёс но визьнодасьёс понна Лудорвай школаысь 1-тӥ, 2-тӥ, 3-тӥ классъёсын но нылпи садын усьтэм занятиос ортчытӥзы. Озьы ик Лудорвай школалэн анай-атайёсын, тужгес но песянайёсын, Лудорвай музеен огазьын ужамез сярысь вераськизы.

Со сяна, Лудорвайысь, Дэбесысь, Эграысь, Зураысь, Алнашысь, Якшур-Бӧдьяысь ӧнерчиос пиналъёсты удмурт кылын вераськытон пумысен ужазы кутӥськись пӧртэм-пӧртэм амалъёссы сярысь вераськизы.

Ужрадэз йылпумъяса, Лудорвай школаын дышетскем калык суредась Пётр Ёлкин адӟытонэныз тодматӥз. Озьы ик школаын бадӟым классъёсын дышетскись нылъёс Дэри ёросысь удмуртъёслэсь ас вурем дэремъёссэс возьматӥзы. 



Наверх
Вниз