Ижкар-3 °C
23 -тӥ тулыспал 2020 Воскресенье
16+

Нылпи садын визьнодасьёслы пиналъёсты удмурт кылын дышетон понна «Зарни бугор» сузьет поттӥзы Удмуртиын

  • 351
  • 0
Ижкар / Удмуртия
Нылпи садын визьнодасьёслы пиналъёсты удмурт кылын дышетон понна «Зарни бугор» сузьет поттӥзы Удмуртиын
Туспуктэм: vk.com (БНУУР НИИ НО (официальная страница))

Удмуртиын нылпи садъёсы ветлӥсь 3-7 аресъем удмурт пиналъёсты анай кылынызы дышетон понна «Зарни бугор» визьнодан сузьет поттӥзы. Пособиосты Дышетон удысысь йӧскалык ужпумъёсты эскеронъя тодос институтысь ӧнерчиос дасязы. Соослэн пуштроссы но аспӧртэмлыксы сярысь ивортодэтъя «Удмуртия» агентстволэн корреспондентэзлы огез кылдытӥсь, институтысь тодосъя валтӥсь ӧнерчи Елена Николаева вераз.

«Зарни бугор» визьнодан сузьетэз нырысьсэ поттӥзы. Со 3-7 аресъем нылпиослэсь калыкен огинын улыны быгатэмзэс, удмурт кылзэс, тодонлыксэс, чеберлык валанзэс азинтон, тазалыксэс утён но юнматон ужпумъёслы сӥземын. Сузьет вань туала куронъёслы тупатыса лэсьтэмын но удмурт пиналъёсты нылпи садъёсын быдэсак удмурт кылын будэтыны луонлык сётэ.

Отчы пыре программа, со сузьет пушкы, методикая пособие пыре, хрестоматийной пособиос но электрон хрестоматия пыро. Ньыль люкетэз луэ. <…> Огъя вераса, со ваньзэ, марлы дышето нылпиосты 3 аресысен 7 аресозь, валэктэ, дышетэ но пуштроссэ возьматэ
Елена Николаева, «Зарни бугор» визьнодан сузьетлэн огез кылдытӥсез

Визьнодан сузьет вить книгаен потӥз, котькудаз программа но методикая пособие пыртэмын. Отын пӧртэм арлыдо пиналъёсын ужан амалъёс но ужпумъёс сяна, анай-атайёсын ужан сярысь но гожтэмын. Со сяна, нылпиослэсь луонлыкъёссэс шараян понна «Нылпимы шумпоттэ яке сюлэмшугъяськытэ» нимаськись люкет нимаз висъямын.

Визьнодасьёслы юрттэт чотын конспектъёс, шудонъёс, шулдыръяськонъёс пыртэмын. Таосыз бордын авторъёслы, Елена Николаевалы, Анна Бородиналы но Галина Васильевалы, нылпи садъёсысь визьнодасьёс но ужаны юрттӥзы.

Вань пуштроссэ ми нылпи садъёсын ужасьёсын валче чакласа потӥмы. Аппробация ортчытӥмы
Елена Николаева, «Зарни бугор» визьнодан сузьетлэн огез кылдытӥсез

Со сяна, пумаз пичияк удмурт-ӟуч кыллюкам но ватсамын.

«Зарни бугорез» уже кутон пумысен ӧнерчиос семинаръёсазы но статьяосазы валэкто. Институтысь ӧнерчи та визьнодан сузъетлы кулэяськон вань шуыса пусъе.

Ми ужаськом нылпи садъёсын, эскериськом, удмурт нылпиос асьмелэн элькунамы вань на ай, удмурт кылын дасяськыны-ужаны луонлыкъёссы вань, соин ик ужасьёс но кулэяськисьёсыз вань
Елена Николаева, «Зарни бугор» визьнодан сузьетлэн огез кылдытӥсез

Туннэ нуналлы «Зарни бугор» 450 тиражен поттэмын.

Со визьнодасьёслы прак киязы сётымон гинэ поттэмын. Мон малпасько, кинлы ке ӧз сюры ке яке валаса ӧз вуттэ, со потэ но вуоз доразы шуыса, быгатозы выльысь куронэн вазиськыны. Соку сое ватсаса тиражен поттозы шуыса малпасько
Елена Николаева, «Зарни бугор» визьнодан сузьетлэн огез кылдытӥсез

Ватсалом, Елена Николаевалэн кылъёсызъя, азьвыл та визьнодан сузьет институтлэн сайтаз электрон амалэн ӵектэмын вал. Но кагаз вылын поттэмен валче сое отысь басьтӥзы. Али отчы, визьнодасьёслы юрттэт мед луоз шуыса, программазэ гинэ кельтӥзы на.

Тодэ вайытом, 5-тӥ толсуре Лудорвайын институт элькунысь дышетӥсьёс но визьнодасьёс понна «Этнопедагогика формирований языковой личности дошкольника и младшего школьника» темая научно-практической семинар ортчытӥз.

Наши партнеры

Наверх
Вниз