100 лет государственности Удмуртии
Ижкар+14 °C
31 -тӥ куартолэзь 2020 Воскресенье
16+

Удмуртиысь анай кылъя устоез дышетӥсь Дэри ёросысь школаын ужа

  • 443
  • 0
Ижкар / Удмуртия
Удмуртиысь анай кылъя устоез дышетӥсь Дэри ёросысь школаын ужа
Туспуктэм: Майя Бывальцева

17-тӥ толсуре Ижкарын «Анай кылъя устоез дышетӥсь» VII элькун вожвылъяськонлэн йылпумъян люкетэз ортчиз. Столичной лицее быръён люкет пыр потэм кужмоосыз удмурт но ӟуч кылъёсъя, озьы ик покчи классъёсын ужась куать дышетӥсьёс лыктӥзы.

Вожвылъяськонэ пыриськисьёс асэнызы тодматӥзы, мастер-класс ортчытӥзы, пресс-конференцие пыриськизы но асьсэлэсь творчество удысын быгатонлыкъёссэс возьматӥзы.

Яр ёросысь Бадӟымгурт школаысь Ольга Сунцова пиналъёсты 22 ар ни удмурт кыллэн аспӧртэмлыкеныз тодматэ, удмурт литератураез лыдӟыны мылкыд сётэ. Дыр ортчемъя со умой валаз ни, кызьы нылпиослэсь дышетскыны мылкыдзэс ӝутыны, мар соослы тунсыкогес потэ. Али школаын 52 пиналъёс дышетско, удмурт кылэз ваньзы дышето.

Шӧдӥськод ке та пинал уг быгаты шуыса, солэсь бурдъёссэ уд ни вандӥськы, ушъяськод кызьы ке, кытӥ ӟуч сямен но валэктӥськод. Ӧвӧл сыӵеосыз: мон уг лыкты, мон уг лэсьты. Кык пуктылэме огшоры ӧвӧл
Ольга Сунцова, Яр ёросысь Бадӟымгурт школаысь удмурт кылъя но литературая дышетӥсь

Дышетӥсьлэн кылъёсызъя, урокъёсын интернетэн туж ик уг выро, соос палан со умой-умой уг но куты ай. Ужазы куто азьвыл дасям дискъёсты, ярам, ноутбукъёссы, интерактивной досказы вань. Со дыре ик Ольга Сунцова учебникъёссы вужесь шуыса ӝожтӥськиз. Озьы ик кагаз уж пӧлы выемзы пумысен сюлмаськемзэ вераз.

Азьло аръёсы ужаськом вал нылпиосын, нош али бумагаен ужаськом. Сое куро, тае куро, озьы кулэ, тазьы кулэ, со программаосты гинэ но оломабыдӟа гожъяно. Азьло выриськод вал урок дасяны, кызьы тунсыко, али трос дыр быре ини бумагаослы
Ольга Сунцова, Яр ёросысь Бадӟымгурт школаысь удмурт кылъя но литературая дышетӥсь

Ольга Сунцовалэн верамезъя, удмурт ужрадъёсы со одно ик пыриськыны тырше, ёросазы-а, элькунын-а соос радъясько. Отысь но трос басьтӥськод, шуэ. Кӧня ке ар талэсь азьло Яр ёросын «Арлэн дышетӥсез» вожвылъяськонын ассэ эскериз, озьы ик финалэ шедиз.

«Анай кылъя устоез дышетӥсь» элькун вожвылъяськонлэн йылпумъян люкетаз

8 фото

Таяз арын нырысьсэ вожвылъяськонэ покчи классъёсты дышетӥсьёс но пыриськизы. Озьы Дэри ёросысь Юсь школаын ужась Елена Ивановалы но ассэ возьматыны луонлык кылдӥз. Со 1-4 классъёсын вань тодметъёсъя, озьы ик удмурт кылъя урокъёсты нуэ.

Пиналъёс удмурт кылэз тодӥсьтэмъёслы чаклам программая дышето. Елена Ивановалэн верамезъя, палэнскисьёс ӧвӧл, урокъёсы ваньзы мыло-кыдо ветло, соослы арняяз куинь час висъямын.

Мынам урокъёсам ӵемгес шудӥськом, кырӟаськом. <…> Классам 18 адями, ваньмыз дышето удмурт кылэз. Кин нырысетӥ классысен лыктэмын, соос быгато (вераськыны – ред.), валало, но выльёсыз вань, тани али 3-тӥ, 4-тӥ классэ лыктӥзы, соосын шуг. Но соос озьы ик удмурт кылэз дышето, мон соослы мукетгес заданиос сётъясько. Анай-атайёссы пумит ӧз луэ, мед тодозы удмурт гуртын уло бере, шуизы
Елена Иванова, Дэри ёросысь Юсь школаысь покчи классъёсты дышетӥсь

Кызьы тодмо, витетӥ классэ мынӥсь пиналъёслэн анай-атайёссы куриськон гожтыны кулэ, кыӵе кылэз дышетозы соослэн пиналъёссы анай кыл чотын. Соин валче Юсь школаын юалляськон ортчытӥзы.

Кин али выль дышетскисьёсы лыктӥзы, соос гинэ ӟучсэ шуизы, мукетъёсыз озьы ик - удмурт, кельше соослы
Елена Иванова, Дэри ёросысь Юсь школаысь покчи классъёсты дышетӥсь

Туэ тулыспалэ Елена Иванова ёросазы «Арлэн дышетӥсез» вожвылъяськонын ужъюлтошъёссэ но дунъясьёсты удмурт кылъя ужаменыз тодматӥз. Дышетонъя управлениысь ӧнерчиос синйылтӥзы, элькун конкурсэ пыриськыны ӵектӥзы, шуэ дышетӥсь.

Солэн верамезъя, вожвылъяськонлэн заочной люкетэзлы гинэ быдэс толэзьлэсь дасяськоно луиз. Нош финалын йӧно возьматӥськыны быдэс команда юрттӥз – семьяез, школаысь ужъюлтошъёсыз, дышетонъя управлениысь ӧнерчиос. Трос кужымез кулэ каре ке но, таӵе ужрадъёсы одно пыриськоно, шуэ Елена Иванова.

Сцена вылын но возиськыны, асме возьматыны, мукетъёссэ адӟыны, конечно, со бадӟым ужрад. Сэре адӟиське, что милям удмуртлыкмы азинске, шумпотӥсько таӵе ужрадъёслы
Елена Иванова, Дэри ёросысь Юсь школаысь покчи классъёсты дышетӥсь

Елена Иванова вераз, со олокыӵе но вожвылъяськонъёсы пыриськылэ шуыса, унояз удмурт калыкен тодматэ.

Туэ вожвылъяськонлэн заочной люкетаз удмурт, ӟуч, пор кылъя но литературая дышетӥсьёс, покчи классъёсты дышетӥсьёс пыриськизы. Кызьы вераз «Анай кылъя устоез дышетӥсь» вожвылъяськонлэн жюриезлэн тӧроезлэн воштӥсез Людмила Мустаева, котькудӥз маин ке но паймытыны быгатӥз.

Туж тыршись адямиос. Тыршо мар ке выльзэ шедьтыны, возьматыны. Ваньзы выль технологиос куто – компьютер технологиос, интернет технологиосты но басьто асьсэ ужазы. Ваньзы творческоесь, ваньзы кыӵе ке но шедьтон возьмато
Людмила Мустаева, «Анай кылъя устоез дышетӥсь» вожвылъяськонлэн жюриезлэн тӧроезлэн воштӥсез

Вожвылъяськонлэн йылпумъян люкетаз тужгес кужмоосыз, асьсэды возьматыны быгатӥсь, дӥсьтӥсь дышетӥсьёс шедизы. Озьы ке но, жюрилэн ёзчиосыз вормисез споръяськонъёстэк бырйыны быгатӥзы. Ваньзы тужгес трос трос балл пуктӥзы Дэри ёросысь Юсь школаысь Елена Ивановалы.

Туннэ ми адӟим туж аспӧртэмлыко адямиосты, котькудӥз аспӧртэмлыксэ ас сяменыз возьматӥз. Нош вормисез… мон татаын адӟи ужаз вань коллектив шуыса. Туж дасямын адями, туж гармонично, туж возиськемез луэ солэн, со адӟе, мар кулэ туала нылпиослы
Людмила Мустаева, «Анай кылъя устоез дышетӥсь» вожвылъяськонлэн жюриезлэн тӧроезлэн воштӥсез

Вуоно арын Елена Ивановаез анай кылъя, со пӧлын ӟуч кылъя, дышетӥсьёслэн огъяросси вожвылъяськоназы ыстозы

Мукетъёссэ дышетӥсьёсты пӧртэм номинациосъя дипломъёсын пусйизы:

- Яр ёросысь Бадӟымгурт школаысь удмурт кылъя но литературая дышетӥсь Ольга Сунцова - «Устоез мастер-класс»;

- Кизнер ёросысь Вуж Бӧдья школаысь удмурт кылъя но литературая дышетӥсь Наталья Ветрова - «Дышетӥсь-новатор»;

- Якшур-Бӧдья ёросысь Чернушка школаысь ӟуч кылъя но литературая дышетӥсь Инна Манакова - «Дышетӥсь-эскерись»;

- Якшур-Бӧдья ёросысь Ӵошкытысь Ф. А. Пушина нимо школаысь удмурт кылъя но литературая дышетӥсь Людмила Обухова - «Дышетӥсь-нодъясь»;

- Ижкарысь 17 номеро школаысь удмурт кылъя но литературая дышетӥсь Светлана Винокурова - «Дышетӥсьлэн вылӥ быгатонлыкъёсыз понна».

Ватсалом, 2008-тӥ арысен анай кылъя дышетӥсьёслэн элькун вожвылъяськонзы кык арлы огпол ортче. 2017-тӥ арын арын Дэри ёросысь ик Лудорвай школаысь Надежда Мерзлякова вормисе потӥз вал, нош кылем арын со анай кылъя дышетӥсьёслэн огъяросси конкурсазы вормиз. 2019-тӥ арын Алнаш ёросысь удмурт кылъя но литературая дышетӥсь анай кылъя дышетӥсьёслэн огъяросси мастер-классазы куинетӥ луиз

Тодэ вайытом, 2020-тӥ арын толшоре Удмуртиын «Арлэн дышетӥсез» («Педагог года») элькун вожвылъяськон кутскоз. 



Наверх
Вниз