Ижкар+10 °C
19 -тӥ куарусён 2020 Кӧснунал
18+

Выль ясли усьтӥзы Ува каргуртын ёрослы 85 ар тырмонлы

  • 414
  • 0
Ува / Удмуртия
Выль ясли усьтӥзы Ува каргуртын ёрослы 85 ар тырмонлы
Туспуктэм: Удмуртиысь тӧролэн но кивалтэтлэн пресс-службазы

Удмуртиысь Ува каргуртын 80 интылы «Умка» ясли усьтӥзы. Нылпи садлэн ужаны кутскон нуналэз ёрослэн 85 ар тырмонэзлы тупаз.

Ёросын улӥсьёс зэм но туж трос лэсьтӥзы, та нылпи сад мед кылдоз шуыса. <…> Муниципал кылдытэтлэн тӧроез – со нырысетӥ адями, кин соиз яке таиз ӵектос улонэ мед пыӵалоз сюлмаськыны кулэ. Татын, Ува ёросын, кытын тӧро ачиз ужъёс мынэмез чакласа возиз, ужъемышъёсты адӟиськом
Ярослав Семёнов, Удмуртиысь кивалтэтлэн тӧроез

Садэ 1 но ӝыны аресысен 3 аресозь нылпиосты басьтозы. Группаосты пумен люкалозы. 27-тӥ толшоре ини яслие нырысетӥ ньыль пиналъёс вуозы. Мукетъёсыз медосмотр ортчемзы бере лыктозы.

Тулыспалэ мыном ини. Ужаны потыны кулэ. Потэ ини. Кыдёкын ум улӥське – бускель микрорайонын. Милемлы вить минут машинаен мыноно. Черодъя но ӵапак сюрим – туж шумпотӥськом
Екатерина Панова, анай

Юртын крезьгуръя занятиослы но спортэн вырыны огазеям зал, пӧраськон, мисьтаськон интыос но эм висъетэз вань. Ясли санитарно-эпидемиологической заключение, дышетон ужез нуыны лицензия басьтӥз ини.

Йӧскалык ӵектосъёслэн валтӥсь ужъемышсы – со асьмелэсь улон ӟечлыкмес будэтон. Тани ясли но сое возьматэ. Выль нылпи садын яркыт, чебер, шуныт, ӟечлыко тӥрлык
Светлана Болотникова, Удмуртиысь дышетонъя но тодосъя министр

Яслилэсь юртсэ 2019-тӥ арын Россилэн азьмуртэныз кичӧлтэм «Демография» йӧскалык ӵектос улсын пуктӥзы.

Юртлэн огъя дуныз – 85 миллион манет. Со пӧлысь 51 миллион манетлэсь федерал коньдэтысь висъязы, 34 миллионзэ - элькунысь

Ува ёрослэн тӧроез Владимир Головин лэсьтӥськисьёслы ӝог но ӟечлыко ужамзы понна тау кариз. Ясли быдэс ёрослы зэмос кузьым шуыса пусйиз. Берло кык ар ӵоже Уваын эшшо кык ясли пуктӥзы но усьтӥзы. Путёвкалы кулэяськись пиналъёслэн черодзы 240 адямилы кулэсмиз.

Йӧскалык ӵектос улсын Удмуртиын нылпи садъёсын 2 сюрс 160 интыос кылдытӥзы. 2020-тӥ арын эшшо 760 инты усьтыны чаклало

Со ӝытэ ик «Юность» лулчеберет юртын ёрослэн 85 ар тырмонэзлы сӥзем адӟытон ортчиз. Куноос ёросын сиён-юон поттӥсь тужгес бадӟым предприятиослэсь вузъёссэс веръяны но басьтыны быгатӥзы: йӧл но сӥль поттӥсь комбинатлэсь, нянь пыжись заводлэсь продукцизэс, санаторийысь минерал ву но косметика, буёлъёс но киужъёс.

Сӥё-дано концертын ёросысь дано муртъёслы Удмуртилэн кивалтэтэзлэн тӧроез Ярослав Семёнов таукарон гожтэтъёс но данъетъёс сётӥз. 



Наверх
Вниз