Ижкар+3 °C
21 -тӥ коньывуон 2020 Вирнунал
18+

Выль ӟуч-удмурт кыллюкамен тодматӥзы Ижкарын

  • 725
  • 0
Ижкар / Удмуртия
Выль ӟуч-удмурт кыллюкамен тодматӥзы Ижкарын
Туспуктэм: vk.com (Дом Дружбы народов / Калыкъёслэн Эшъяськон юртсы)

27-тӥ толшоре Ижкарысь Калыкъёслэн эшъяськон юртазы Удмуртилэн кунлыкезлы 100 ар тырмонлы поттэм выль кык томъем ӟуч-удмурт кыллюкамен тодматон ортчиз. Отчы тодосчиос, гожъяськисьёс, дышетӥсьёс, книга поттӥсьёс, журналистъёс, мер ужасьёс люкаськизы. Ужрадэ ивортодэтъя «Удмуртия» агентстволэн корреспондентэз но вуылӥз.

Выль кыллюкамез поттон бордын Историяя, кылъя но литературая удмурт институтысь тямыс ӧнерчиос ужазы. Люкаськемъёс ваньзы ик та бадӟым ужез кема возьмам шуыса пусйизы. Уго талэсь азьвыл берпуметӥез ӟуч-удмурт кыллюкам 63 ар талэсь азьло 1956-тӥ арын потӥз вал, отчы 40 сюрс пала кылъёс пыризы. Нош выль кыллюкам 55 сюрслэсь трос кылъёсты удмуртэ берыктэ. Со сяна, куд-огъёсызлы валэктон но сётэ.

Гожъяськись, литератураез эскерись, журналист Александр Шкляев та кыллюкамез поттон «бадӟым культурной событие» луэ шуыса пусйиз.

Куке 1956-тӥ арын потӥз ӟучо-удмурто словарь, сое Георгий Архипович Архипов, соку егит кылбурчи но тодосчи, шуиз - та русско-русский словарь. Тросэз, пе, ӟуч кылъёс ӟуч сямен ик берыктэмын. Нош табере туж трос тодон-валан люкамын ини асьме лингвистъёсын, кылчиосын. И соос туж трос ужазы ини. Кӧня диалектъёс люкамын, кӧня обработать каремын азьвыл потэм литературной источникъёс. Ваньмыз табере со обобщить каремын ини, выль кылъёс пыремын удмурт кылэ. Ваньзэ сое люкаса, туж бадӟым сыӵе тоӵ-тоӵ книга поттӥзы
Александр Шкляев, гожъяськись, литератураез эскерись

Тодосчилэн кылъёсызъя, кыллюкам вань литераторъёслы, лыдӟисьёслы, кылысь кылэ берыктӥсьёслы, удмуртысь ӟуче но, ӟучысь удмуртэ но, туж бадӟым кивалтос луоз.

Презентация русско-удмуртского словаря

6 фото

Удмуртиысь йӧскалык политикая министр Лариса Бурановалэн верамезъя, та нунал бадӟым праздник - «дуннее кема возьмам нылпимес поттӥськом». Туннэ, та уж вылэ пыкъяськыса, удмурт кылэз туала интернет вӧлметэ пыӵатон ужпум сылэ шуыса вераз.

Удмурт кыл – туала, со туннэ но али, со улэп, со музейысь шер пумиськылӥсь маке, архивысь ӧвӧл. Соин со адямилэн вань улон ӧръёсаз кутӥськыны кулэ
Лариса Буранова, Удмуртиысь йӧскалык политикая министр

Кыллюкам бордын ужась тодосчиос соку ик удмурт кыллэсь йӧскалык корпуссэ кылдытон бордын тыршизы. Отчы выль ӟуч-удмурт кыллюкам но 2008-тӥ арын потэм удмурт-ӟуч кыллюкам, озьы ик удмурт кылын гожтэм статьяос пыризы.

Озьыен, али, кин удмурт кыл бордын ужа яке кинлэн удмурт кылэз дышетэмез потэ, со быгатэ пырыны интернетэ, одӥг-кык кнопка бичаса яке одӥг кыл гинэ бичаса панеле, шедьтыны быгатэ переводъёсты. Куд-ог кылъёслэн ог 10-15 но, яке кыӵе ке ӟуч предлогъёсын 25 но, переводъёссы. Адямилы, кудӥз ляб тодэ удмурт кылэз, ӟучысь берыктыны сое туж каньыл луоз
Сергей Маскимов, Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая удмурт институтысь тодосъя ӧнерчи

Со сяна, кызьы вераз Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсез Михаил Альес «Яндекс» компаниен кылысь кылэ электрон берыктӥсь кылдытон пумысен тупанкыл гожтэмын ини.

Отын нейросетьёс, искусственной интеллект технологиос вылэ пыкъяськыса, выль кыллюкамысь даннойёс кутӥськозы. Соин ик творческой коллективен быдэстэм ужез мултэс вылӥ дунъятэк туж шуг. Асьмеос йӧскалык элькунын улӥськом, озьыен кылэз азинтон юанъёс тужгес валтӥсьёсыз луо
Михаил Альес, Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсез

Пусъём, кыллюкам Удмуртиысь йӧскалык политикая министерстволэн юрттэменыз «Удмуртия» книгапоттонниын кык сюрс тиражен потӥз. Кызьы вераз издательстволэн кивалтӥсез Юрий Кузнецов, матысь дыре огазеяськонъёс но ужъюртъёс кыллюкамъёсты дунтэк басьтыны быгатозы. Озьы ик со вань мылкыд карисьёслы но вузаськоз.

Тодэ вайытом, удмурт кыллэн нуналаз кыллюкамез кылдытӥсьёс уженызы журналистъёсты тодматӥзы вал.



Наверх
Вниз