100 лет государственности Удмуртии
Ижкар+14 °C
31 -тӥ куартолэзь 2020 Воскресенье
16+

Воткаысь куинь нылпи садъёсын корка пырон пусйизы

  • 558
  • 0
Вотка / Удмуртия
Воткаысь куинь нылпи садъёсын корка пырон пусйизы
Туспуктэм: votkinsk.ru

Туннэ, 14-тӥ тулыспалэ, Воткаын куинь нылпи садъёсты сӥё-дано усьтӥзы. Со сярысь Удмуртиысь дышетонъя но тодосъя министерстволэн пресс-службаез ивортэ.

Яслиослэсь юртъёссэс типовой ӵектосъя «Демография» йӧскалык ӵектос улсын пуктӥзы, ваньмыз 80 интылы чакламын. Котькудаз физкультура зал, эм кабинет, кӧлон интыос, шудон висъетъёс, туала куронъёслы тупась сиськонни вань.

Покчи но анай-атайёссэс корка пыронэн Удмуртиысь кивалтэтлэн тӧроезлэн воштӥсез Анастасия Муталенко ӟечкылаз.

Куке ми «Демография» йӧскалык ӵектосэ пыримы, яслиослы дась ӵектосъёс ӧй вал. Ӵектос кылдытыны кӧня ке толэзь кулэ луиз. Одӥг аресысен куинь аресозь покчиослэсь черодэз воштон понна таӵе бадӟым лэсьтӥськон ӧй на вал. 80 интылы ӵектосэз эскерим, 27 выль яслиос пуктӥм
Анастасия Муталенко, Удмуртиысь кивалтэтлэн тӧроезлэн воштӥсез

Воткаын куиньзэ ик юртэз али ужась нылпи садъёслэн интывылазы пуктӥзы. Озьы Киров нимо ульчаысь 1 номеро нылпи садлэн выль юртэз кылдӥз. Конанка микрорайонын улӥсьёслэн кык полэс шумпотозы. 25 номеро нылпи садлэн табере кык ёзъёсыз: Светлой ульчаысь 6 но 8 номеро юртъёс. Интыысь тӧрлыкъёс пусъё, ӝок паськытась выль микрорайонын соослы кулэяськон тужгес но бадӟым вал.

Кар администрацилэн тӧроезлэн мерлыко ужпумъёсъя воштӥсез Жанна Александрова верамъя, куинь аресысен сизьым аресозь пиналъёслы ваньзылы нылпи садъёсы путёвкаос сётэмын, нош кык толэзьысен куинь аресозь покчиосты басьтоно ке, 10-тӥ толшорлы черодын 1 сюрс 788 адями сылэ вал.

1,5 аресысен 3 аресозь пичи пиналъёсты интыян ласянь ужпум вань. Сыӵе пиналъёс черодын 700-лэсь трос. Вераны кулэ, ваньмыз анай-атайёс дышетскон ар шорын яслие лыктыны мылкыд ӧз каре. Куд-огез валтӥсь люкылонэз возьмало, со куартолэзе ортчоз. Озьы ке но, Киров нимо ульчаысь ясли быдэсак тырмытэмын, вань 80 путёвкаос сётэмын
Жанна Александрова, Вотка кар администрацилэн тӧроезлэн мерлыко ужпумъёсъя воштӥсез

Со сяна, туэ южтолэзе Воткаын ньылетӥзэ, Школьной ульчаын, нылпи садэз-яслиез пуктон ужъёсты йылпумъялозы. 2021-тӥ арын Квариснской ульчаын сад пуктыны малпало на.

Тодэ вайытом, 6-тӥ тулыспалэ Эгра каргуртын кык выль яслиосты  усьтӥзы.



Наверх
Вниз