100 лет государственности Удмуртии
Ижкар+19 °C
31 -тӥ куартолэзь 2020 Воскресенье
16+

Китай кылъя огъя кун экзамен нырысьсэ сётозы Удмуртиын 2020-тӥ арын

  • 431
  • 0
Ижкар / Удмуртия
Китай кылъя огъя кун экзамен нырысьсэ сётозы Удмуртиын 2020-тӥ арын
Туспуктэм: Григорий Фомин

2019-2020 дышетскон аре нырысьсэ Удмуртиын китай кылъя огъя кун экзамен сётозы. Со сярысь Ижкарысь 56 номеро гимназиын пресс-конференциын журналистъёслы элькун кивалтэтлэн тӧроезлэн воштӥсез Анастасия Муталенко вераз.

Туэ Ижкарысь одӥг дышетскись китай кылъя огъя кун экзамен сётыны кариськиз. Валтӥсез, милям куронъёсты дырыз дыръя быдэстыны луонлыкмы вань
Анастасия Муталенко, Удмуртиысь кивалтэтлэн тӧроезлэн воштӥсез

Туэ Удмуртиын огъя кун экзаменэз дас одӥгетӥ классъёсын дышетскись 6 сюрс 894 пиналъёс, шоръёзо ӧнер дышетскониын тодон-валан басьтӥсь 193 адями но азьло аръёсы школаез йылпумъям 604 егитъёс сётозы. Укмысэтӥ классэз йылпумъясь 16 сюрс пала пиналъёс ньыль тодметъя йылпумъясь кун экзаменъёсы пыриськозы.

Арысь аре со лыдпус уг воштӥськы, ӧжыт гинэ солань-талань шудэ. Милям экзамен ортчытыны 53 интыосмы, со металлорамкаен, видеофиксациен нимысьтыз классъёс. Туэ выльдӥськон – укмысэтӥ классъёсты быдтӥсьёслы йылпумъясь кун экзамен ортчытон понна 127 интыос ватсасько. Озьы ик тазалыксыя ӧжыт быгатонлыкъем но сӧсыр пиналъёслы доразы но эм огазеяськонъёсын экзамен сётыны интыос вань
Анастасия Муталенко, Удмуртиысь кивалтэтлэн тӧроезлэн воштӥсез

Кивалтэтлэн тӧроезлэн воштӥсез верамъя, экзамен сётон интыосты куронъёсъя дасян понна туэ элькун коньдэтын 50 миллион манет чакламын. 2020-тӥ арын укмысэтӥ классэз быдтӥсьёслэн физикая но химияя экзамензылэн практика люкетэз лаборатори опытъёс лэсьтыса ортчоз. Али кулэ луись арбериос но реактивъёс басьто. Элькун коньдэтын солы 53 миллион манетлэсь трос коньдон висъямын.

Озьы ик Анастасия Муталенко тодэ вайытӥз, Удмуртилэн тӧроезлэн Александр Бречаловлэн косэмезъя 2019-тӥ арысен йылпумъясь но огъя кун экзаменъёсты радъянэ но ортчытонэ пыриськись дышетӥсьёслы компенсация тыриське. Дышетӥсьёс одӥг экзамен понна 600-ысен 3 сюрс манетозь басьто. Со вакытэ ик соослэн шор уждунзы но кыле. Кылем дышетскон арын со понна 44 миллионлэсь трос коньдон быдтӥзы. 2020-тӥ арысен компенсациез пиналъёсты экзаменэ нуись-вайись дышетӥсьёслы но тырозы.

Удмуртиысь дышетонъя но тодосъя министр Светлана Болотникова экзаменлы ас мылкыд каремъя быръем тодметъёс пӧлын котьку сямен ик обществознание нырысетӥ интые потэ шуыса вераз. Со валамон, уго тодметъя баллъёсты тросаз вылӥ дышетсконниосы пырыку юало. Со сяна, тросэз пиналъёс физикаез но биологиез быръё.

Сыӵе суредэз ньылетӥ арзэ ини чакласьком: 46 процентэз обществознаниез быръё, 26 процентэн кыкетӥ инты басьто физика но биология, информатикаез 1 сюрс 250 пиналъёс быръё (18 процент). Озьы ик туэ 11-тӥ классэз тросэз йылпумъясьёс математикая профильной уровенез бырйизы - 4 сюрс 282 адями, со 62 процент луэ
Светлана Болотникова, Удмуртиысь дышетонъя но тодосъя министр

Пресс-конференциын вераськисьёс пусйизы, ӟеч дышетскисьёслы медаль сётон куронъёс чурытгес луизы ке но, сое басьтӥсьёслэн лыдзы йылэ шуыса.

Куронъёс 2019-тӥ арын воштӥськизы. Табере медаль басьтон понна ӟуч кылъя но профилья математикая огъя кун экзаменын 70 баллэсь трос люкано яке инъет луись математикая «вить» басьтоно. Кылем арын милям 514 медалистъёсмы вал, 2018-тӥ арын – 504
Светлана Болотникова, Удмуртиысь дышетонъя но тодосъя министр

Министр пусйиз, огъя кун экзамен сётӥсь котькуд нылпи 100 балл люканы быгатэ шуыса. Со понна тодметэз туж ӟеч тодоно, азяд ужпум пуктыны но висъям дыр ӵоже ужаны быгатоно. Озьы ик астэ чаклано – пиналъёс троссэ янгышъёссэс тупатыны быгатысалзы, ужзэс бланке гожтон азьын рос-прос эскерысалзы ке.

Элькунамы 100 балл басьтӥсьёслэн лыдзы йылэ. 2015-тӥ арын соос 27 адями вал, 2019-тӥ арын – 52. Соос пӧлысь сизьымез – гурт школаосын дышетскисьёс. Одӥгез – сукыр пиналъёслэн школа-интернатазы дышетскись. 2018-2019 дышетскон аре малпамтэ шорысь химияя 100 балл басьтӥсьёс трос вал – 17 адями. Озьы ик Удмуртиын нырысьсэ физикая 100 балл басьтӥсьёс кылдӥзы. Ижкарысь 6 номеро гимназиысь но 57 номеро школаысь кык дышетскисьёс кык тодметъя 100 балл люказы
Светлана Болотникова, Удмуртиысь дышетонъя но тодосъя министр

Пусъём, туэ огъя кун экзаменэз дырызлэсь вазь сётон вакыт 20-тӥ южтолэзе кутске, валтӥсь вакыт – 25-тӥ куартолэзе, ватсаса вакыт – 4-тӥ куарусёнэ. Укмысэтӥ классэз быдтӥсьёс пӧлын дырызлэсь вазь экзамен сётон вакыт 21-тӥ оштолэзе кутскоз, валтӥсь вакыт – 22-тӥ куартолэзе, ватсаса вакыт – 4-тӥ куарусёнэ. 



Наверх
Вниз