Ижкар+16 °C
4 -тӥ пӧсьтолэзь 2020 Кӧснунал
16+

Россиысь калыкъёслэн кылъёссыя, лулчеберетсыя огъяроси викторинае пыриськыны ӧтё Удмуртиын улӥсьёсты

  • 1224
  • 0
Ижкар / Удмуртия
Россиысь калыкъёслэн кылъёссыя, лулчеберетсыя огъяроси викторинае пыриськыны ӧтё Удмуртиын улӥсьёсты
Туспуктэм: Руслан Нуриахметов

21-тӥ тулыспалэ, Анай кыллэн калыккуспо нуналаз, Россиысь калыкъёслэн кылъёссылы, соослэн лулчеберетсылы но историзылы сӥзем огъяросси викторина ялӥзы. Со сярысь ужрадэз огез радъясь «Профессионалы в сфере образовательных инноваций» союз (Обрсоюз) ивортэ.

«Народы России: расселение, родные языки, культура и быт» викторинае дышетскисьёс, студентъёс но ваньмыз анай кылъёсын тунсыкъяськисьёс пыриськыны быгато. Со понна ЯзыкиНародов.рф сайтэ пырыны но пусйиськыны кулэ.

Ужрадлы юанъёсты кылтодон, история, культурология, кылосбур но улосвылъёсты эскерон удысъёсысь ӧнерчиос дасязы. Радъясьёслэн верамзыя, викторина кунмылэн кылъя но йӧслыкъёсъя пӧртэмлыкеныз тодматскыны мылкыд сётоз.

Викторина зэмзэ но ӵыдонтэм пӧрмиз. Таӵе акциос дышетскисьёслы калыклэн лулчеберетэныз но йылолъёсыныз тунсыкъяськыны, выль тодон-валанъёс басьтыны мылкыд сёто
Юлия Соловьёва, Обрсоюзлэн вице-президентэз

Ужрад 2020-тӥ арын коньывуонозь мыноз. Йылпумъянъёс огъяросси форумъёсын, викториналэн очной люкетъёсаз, лэсьтозы. Вормисьёсты 22-тӥ шуркынмонэ, Кыллюкамъёслэн но энциклопедиослэн нуналазы, шараялозы. Вань пыриськисьёс нимъям сертификатъёс басьтозы, нош вормисьёслы дуно кузьымъёс сётозы.

Викторинаез «Профессионалы в сфере образовательных инноваций» союз но Россиысь калыкъёслэсь кылъёссэс азинтонъя институт радъяло.

Тодэ вайытом, Анай кыллэн калыккуспо нуналаз Ижкарын удмурт поэтри-слэм ортчиз. Нош удмурт кылэз тодӥсь 9-11 классъёсын дышетскисьёс но колледжъёсысь, университетъёсысь студентъёс покчиослы литератураез ӟучысь удмурт кылэ берыктонъя «Лулчеберет выж: ӟуч - удмурт» вожвылъяськонын быгатонлыкъёссэс эскерыны быгато.



Наверх
Вниз