100 лет государственности Удмуртии
Ижкар+3 °C
30 -тӥ южтолэзь 2020 Вордӥськон
16+

Удмурт дауркылъёсъя «Хроники батыра» комикс кылдытон бордын ужало Удмуртиын

  • 852
  • 0
Ижкар / Удмуртия
Удмурт дауркылъёсъя «Хроники батыра» комикс кылдытон бордын ужало Удмуртиын
Туспуктэм: vk.com (Кадры будущего для регионов Удмуртия)

Удмуртиысь пӧртэм школаосысь бадӟым классъёсын дышетскись куинь нылашъёс удмурт дауркылъёсъя «Хроники батыра» комикс кылдытон бордын ужало. Ивортодэтъя «Удмуртия» агентстволэн корреспондентэз со нылъёсын но  нодъясенызы - Тьюторъёслэн улосвылкуспо ассоциацизылэн Удмуртиысь ёзэтэлэн кивалтӥсеныз, быгатонлыко пиналъёсты дышетонъя «ТАУ» улосвыл центрысь тьюторъёслэн службаенызы кивалтӥсен - Татьяна Митрошинаен вераськиз.

Эгра ёросысь Зура школаын 11-тӥ классын дышетскись Софья Князевалэн но Сюмси ёросысь Митрейшур (Дмитрошур) школаын 10-тӥ классын дышетскись Софья Соловьёвалэн комикс лэсьтыны малпанзы кылем арын куарусёнэ «ТАУ» центрлэн лагерь сменаяз кылдӥз. Соос борды Сарапулысь лингвистикая 20 номеро гимназиын 9-тӥ классын дышетскись Ксения Залозная итӥськиз.

Милям комиксмы удмурт калыклэн историеныз но лулчеберетэныз тунсыкъяськонэз будэтонлы ӧръямын, малы ке шуоно али Россиысь калыкъёслэсь лулчеберетъёссэс но кылъёссэс утён но азинтон бордын шугъяськонъёс пумисько. Озьы ик со йӧскалык политикаез азинтонын выль амалъёс шедьтон понна малпамын
Ксения Залозная, «Хроники батыра» комикс бордын ужась
 

Ксения Залозная, Софья Князева но Софья Соловьёва
vk.com (Кадры будущего для регионов Удмуртия)

Комикслэсь сценарийзэ Софья Соловьёва гожтӥз. Солэн верамезъя, «Хроники батыра» комикс эшъяськон сярысь луоз. Идна батыр, Удмуртиез утён понна, выль эшъёсыныз – Эбгаен но Кионэн – огазеяськыса нюръяськоно луэ. Озьы соос ӵошен батыръёс луо. Мадёс кужмо муртъёслы но зэмос эшъёс кулэ шуыса возьматэ.

Комикслэсь философизэ но верано, дыр. Куке Идна Удмуртие вуэ, со таӵе веранэз кылэ: «Потон тон шедьтод отысь, кытын усьтӥськоз тынад сюлэмыд». Со кылъёс Идналы меӵак верало кадь, кызьы солы дораз берытсконо. Со эшъёсызлы усьтӥськыны кулэ
Софья Соловьёва, «Хроники батыра» комикс бордын ужась
 

Софья ватса, сценарийзы быдэсак дауркылъёс вылын лэсьтэмын ӧвӧл, отысь геройёслэн сямъёссы, выросъёссы гинэ басьтэмын. Озьы ик Удмуртилэн лулчеберетэз вылэ ӧжытак пыкиськемын. Комиксэ удмурт шӧмез пыӵатыны, этнографи инъетсэ тупатыны нылъёслы Ижкарысь Туризмъя но чеберлыко киужъя йӧскалык центрысь ӧнерчи Анна Образцова юрттэ.

Татьяна Митрошиналэн верамезъя, «Хроники батыра» ӵектос быдэсак нылъёслэн тунсыкъяськонъёссы бордысь потӥз.

Соослы финно-угроведение ӧр, оло, сокем тунсыко но ӧй вал, но ми со бордысь кошким. Куке ми соослэсь тунсыкъёссэс шараяны кутским, валамон луиз, соос дизайнэз кельшыто шуыса, вань пиналъёс сямен, анимелы, корейской суредъёслы синмасько. Соку ужпуммы кылдӥз лэсьтыны ӵектос, кудӥз соослы быгатонлыксэс эскерыны юрттоз
Татьяна Митрошина, «Хроники батыра» комиксэз суредась нылъёслэн нодъясьсы

Кык Софьяос дизайнэн выро ке, Ксения Залозная туж усто проект-менеджер луэ, шуэ нодъясьсы. Со уг суредаськы, но со нылашъёсты огазея, ужзэс радъя, нодъясенызы кусып возе но зол команда кылдытэ.

Со, шуэ, мон дизайнер луыны уг малпаськы. Со юрист, следователь луыны дасяське. Но мыным, шуэ, туж кельше ужез радъяны, кусыпъёс кылдыны
Татьяна Митрошина, «Хроники батыра» комиксэз суредась нылъёслэн нодъясьсы
 

Нылъёслэн суредъёссы
vk.com (Кадры будущего для регионов Удмуртия)

Кемалась ӧвӧл, ӵектосэ эшшо одӥг нылаш итӥськиз – Сарапулысь 18 номеро лицейын 9-тӥ классын дышетскись Елизавета Ильина. Со суредъёсты буяны но геройёслэсь верам кылъёссэс суреданы юрттэ.

Али нылъёс комикслэсь нырысетӥ тусъетсэ (образец) лэсьтон бордын ужало. Бӧрысь «ТАУ» центрын вить экземпляр поттозы но Стратеги инициативаосъя агентстволэн «Кадры будущего для регионов» вожвылъяськоназ пыриськозы.

Азьляняз ӵектосэз Удмуртиын вузаны луысал шуыса малпаськом, со сяна, оло, мерч (ӵектослэн тодметлыкеныз пӧртэм вузъёс – ред.) лэсьтом но электрон версизэ поттом
Елизавета Ильина, «Хроники батыра» комикс бордын ужась

Со сяна, нылашъёс комиксэз мукет кылъёсы берыктон сярысь но малпасько, нош али со ӟуч кылын гинэ луоз. Озьы ик мультипликация пумысен но малпанзы вань.

Нодъясьсы оске, нылъёс ӵектоссэс одно быдэстозы, уго соос туж зол «висё» со понна. Со сяна, умой юрттӥсьёссы вань. Ӵектос кужмо соку, куке котькудӥз отчы пыриськись аслэсьтыз рользэ вала, пусъе Татьяна Митрошина. Солэн верамезъя, комиксэз йылаз-пумаз 18-тӥ оштолэзьлы вуттыны кулэ, соку ӵектоссэс утён ортчоз. 

Нялтас вераса, быгатонлыко пиналъёслы «ТАУ» центрын пӧртэм ӵектосъёсты улонэ пыӵато. Соос пӧлысь эшшо одӥгез тунсыко ӵектос – «Билингва». Пиналъёс, центрысь туала технологиосъя ужась арбериосты ужазы кутыса, Кузебай Герд нимо гимназиысь кыккылолыкъем но одӥгкылолыкъем 40 пиналъёслэсь йырвизьзылэсь ужамзэ эскеро.

Соослэн мукет реакцизы (кыккылолыкъем пиналъёслэн – ред.) Йырвизьзы умойгес ужа. Быгатысал-а азьло пинал сыӵе эскерон лэсьтыны? Со быгатысал гожтыны теория, кытысь ке но лыдӟиз кыккылолыкъем пиналъёс одӥгкылолыкъем пиналъёслэсь висъясько шуыса, нош нылпиосты татысь арбериосын эскеронъёс – зэмос результатъёс возьмато
Татьяна Митрошина, «Хроники батыра» комиксэз суредась нылъёслэн нодъясьсы

Ватсалом, центр пиналъёс понна пӧртэм лагерь сменаос ортчытэ. Отчы пыриськисьёс тодон-валан люканы, ӵектос гожтон уже пыриськыны, ас тунсыкъёссэс валаны быгато. 

Тодэ вайытом, азьвылгес удмурт дӥсь Мюнхенысь суредасьлы выль уж кылдытыны мылкыд сётӥз.



Наверх
Вниз