100 лет государственности Удмуртии
Ижкар+4 °C
1 -тӥ оштолэзь 2020 Вирнунал
16+

Удмуртиысь дышетскисьёс нырысьсэ улосвыл ӵектосъёсты но программаосты улонэ пыӵатонэ пыриськозы

  • 749
  • 0
Ижкар / Удмуртия
Удмуртиысь дышетскисьёс нырысьсэ улосвыл ӵектосъёсты но программаосты улонэ пыӵатонэ пыриськозы
Туспуктэм: «Проектный офис удмуртских школьников» ӵектослэн пресс-службаез

Удмуртиысь 8-11 классъёсын дышетскись пиналъёс нырысьсэ улосвыл ӵектосъёсты но программаосты быдэсъянэ пыриськозы. Солы дасяськон понна «Проектный офис удмуртских школьников» ӵектос улсын «Стажировка в проект» дышетон программа ужаны кутске. Со сярысь ӵектослэн пресс-службаез ивортэ.

Элькун тӧролэн но кивалтэтлэн администрациысьтызы ӵектосъёсъя улосвыл офисэн кивалтӥсьлэн Диляра Маликовалэн верамезъя, сыӵе опыт туж тунсыко луоз.

Программа пыр нылпиос калыкмылэсь улонзэ умойгес карон вылысь малпам йӧскалык ӵектосъёслэн пуштросэнызы тодматскыны, асьсэлэсь малпанъёссэс шараяны но соосты азьланяз улонэ пыӵатон понна ӵектонъёссэс вераны быгатозы
Диляра Маликова, Удмуртиысь тӧролэн но кивалтэтлэн администрациысьтызы ӵектосъёсъя улосвыл офислэн кивалтӥсез
 

Программае пыриськон понна куриськонъёсты 2020-тӥ арын 5-тӥ южтолэзёзь чӧлсконпусъя куто. Быръёнэз ортчем пиналъёс понна 23-28 южтолэзе егитъёслэн «Ёлочка» лагерязы дышетон рыдъяськоз. Дышетскисьёсты копирайтинг, smm, графика дизайн, ӵектос менеджмент ӧнеръёсын тодматозы.

Пиналъёс понна лекциос, практикая занятиос, воркшопъёс, семинаръёс радъялозы, азинлыко кейсъёсын но элькунамы улонэ пыӵатӥськись мерлыко но йӧскалык лулчеберетъя ӵектосъёсын тодматозы

Лагерь смена ортчем бере дышетскисьёс тодон-валанзэс зэмос ӵектосъёсты но программаосты улонэ пыӵатонын кутозы. Соос пӧлын Мерлыко продюсированиея «Журавейник» центрлэн но Евразиысь калыкъёслэн ассамблеязылэн нодъямзы улсын быдэстӥськись «Дети Евразии» ӵектос, «ДАУР ТВ», Интыысь инициативаосъя «Сообщество» фондлэн, «Удмурт дунне» элькун газетлэн ӵектосъёссы, «Проектный офис удмуртских школьников» ӵектослэн, Кузебай Герд нимо йӧскалык гимназилэн программаоссы но мукет.

Котькуд ӧнеръя 4-5 адямилэсь кылдытэм командаослэсь практика ужзэс ӵектослэн нодъясез чаклалоз. Оштолэзь-куартолэзь ӵоже пиналъёс ӵектосъя ужрадъёс дасяны, командаен ужаны, текстъёс гожъяны, логотипъёс, афишаос, реклама постеръёс лэсьтыны, интернетын ӵектосъёсты азинтыны дышетскозы.

Программалы йылпумъянъёс берпуметӥ семинарын лэсьтозы. Экспертъёслэн но нодъясьёслэн чакламзыя устооссэ дышетскисьёсты улосвыл ӵектосъёсты но программаосты улонэ пыӵатон уже ӧтёзы но кадръёсъя резерве пыртыны ӵектозы.



Наверх
Вниз