100 лет государственности Удмуртии
Ижкар+15 °C
28 -тӥ куартолэзь 2020 Покчиарня
16+

Удмуртиысь агроклассъёс дышетскон арзэс йылпумъязы

  • 299
  • 0
Ижкар / Удмуртия
Удмуртиысь агроклассъёс дышетскон арзэс йылпумъязы
Туспуктэм: Удмуртиысь гурт возёсъя но сиён-юонъя министерстволэн пресс-службаез

Удмуртиысь гурт возёсъя но сиён-юонъя министерствоен кылем арын коньывуонэ усьтэм агроклассъёсын нырысетӥ дышетскон арзы йылпумъяськиз. 14-тӥ куартолэзе министерствоын онлайн амалэн кенешонын вераськизы, мар пӧрмиз, нош мар ӧз. Со сярысь удысэтлэн пресс-службаез ивортӥз.

Агроклассъёсын дышетскисьёс понна теорияя но практикая 35 занятиос ортчытӥзы. Пиналъёсты ужась гурт возёс предприятиосы нуллӥзы – Вотка ёросысь «Мир», Сарапул ёросысь «Русская нива», «Сарапул молоко» огазеяськонъёсы, теплициаосын «Завьяловский» комбинатэ, Ижкарысь ипподроме. 

2020-тӥ арын пандемиен сэрен дышетсконзэс агрокахатонэн йылпумъяны ӧз луы, но котькуд пинал сертификат басьтоз. Министерство, пиналъёслэн гурт возёс ӧнер басьтыны но азьланяз ужаны пырыны луонлыксы тросгес мед луоз шуыса, котькуд дышетскон юртэ ӵектон гожтэтъёс келялоз. Уго ӵапак со понна ик «Агропром огъетлы ӧнерчиос – школа парта сьӧрысен» («Кадры для АПК – со школьной скамьи») ӵектос улонэ пыӵатӥське.

Онлайн-пумиськонэ пыриськемъёс пусйизы, валтӥсез – пиналъёсты гурт возёс ӧнеръёсын тунсыкъяськытыны быгатӥзы.

Пиналъёсын кенешыса, мон валай, мар со понна лэсьтоно. Зэмзэ ке верано, отын дышетӥсьёслэн туж бадӟым ужзы – ваньмыз потэ соослэн пудо вордонын выль выжы уськытон уж, эмбрионъёсты понон технологиос но мукетыз сярысь верамзы бордысь. Валтӥсез – ас пример вылын мылкыдзэс ӝутон
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр

Пусъём, Ольга Абрамова ассэ но дышетӥсь ужын эскериз.

Элькун лицей-интернатысь биологиен дышетӥсь, агрокласслэн кураторез Марина Иванова пиналъёс министрлэн воштӥсеныз Наталья Шавшуковаен лекциосты но фермаосы потанъёсты туж возьмазы шуыса пусйиз.

«Мир» возёсэ вуылэмзы туж кельшиз – кивалтӥсьсы 8 часын ӵукна вуиз, экскурсия ортчытӥз, пиналъёсын ӵош ужаз. Собере соос бурдъяськем мылкыдын классын опытъёс ортчытъязы, гидропоникаын ошиськись будосъёсты будэтӥзы, картофкаез выжыятӥзы, озьы мукет пиналъёслэсь но мылкыдъёссэс ӝутӥзы. Зэмзэ но, дышетӥсьёс бадӟым инты басьтӥзы. Милям та ӵектослэсь умой гинэ мылкыдъёсмы кылизы
Марина Иванова, Удмуртиысь элькун лицей-интернатысь биологиен дышетӥсь, агрокласслэн кураторез

Лицей-интернатысь огез дышетскись – Данил Юшков – агрономе дышетскыны пырыны малпа ини.

Та дыре 2020-2021 дышетскон арлы выль планъёс дасяло ини. Валтӥсез – элькунысь гурт школаосын эшшо кӧня ке агроклассъёс усьтон но гурт возёсъёс пӧлысь эшшо партнёръёс шедьтон. Глаз ёрос выль дышетскон арлы куриськон гожтӥз ини. Куарусёнэ отын Нюр (Кожиль) гуртысь но Кечпигуртысь (Удмуртские Ключи) школаосын агроклассъёс усьтозы.

Кызьы вераз Глаз ёрос администрациысь дышетонъя управленилэн кивалтӥсез Римма Пинегина, нырысь ик анай-атайёсын но дышетскисьёсын анкетаос гожъязы. Мылкыдзы вань. Пусйымон, Нюр гуртын но Кечпигуртын йыг-йыг возёсъёс ужало – «Кожильский» но «Коммунар». Кыкетӥезлэн кивалтӥсез Юрий Дягилев агрокласс усьтон понна нырысетӥосыз пӧлын ик дурбасьтӥз, соин валче ужан сярысь огкыл но гожтэмын ини.

Туала ивортодэт но биотехнологиос пиналъёслы туж кельшо. Нош милям ужпуммы та ужын – соослы возьматыны но кыскыны ӵапак со гурт возёсэ, кудӥз мыло-кыдо выльдӥське но вылӥ технологиосты кутэ. Удыс сярысь вуж малпанъёс вуныны кулэ
Римма Пинегина, Глаз ёрос администрациысь дышетонъя управленилэн кивалтӥсез

Ольга Абрамова агроклассъёсын дышетскисьёслы программа тупатъямын луоз шуыса оскытӥз. Со сяна, али сое огъя школа программае пыртыны луонлыкез эскеро. Дышетонъя туала технологиосын вырыны луонлык Удмуртиысь ӧнерлы азьпалтыса дышетӥсь центр усьтӥськемен валче кылдоз. Отчы туала ужан тӥрлыкъёс басьтон понна огъя 49 миллион манет висъялозы.

Кызьы вераз центрлэн кивалтӥсез Сергей Колесников, татын мылкыд карисьёсты сити-фермер луыны но дышетозы. Нош оглом со гурт возёсъя но сиён-юонъя министерстволэн «Агропром огъетлы ӧнерчиос – школа парта сьӧрысен» ӵектосэзлы котыр ласянь юрттэт сётоз.

Тодэ вайытом, 2019-тӥ арын Сарапул ёросысь Сигаево но Кигбаево школаосын, Дэри ёросъёсысь Италмас каргуртысь лицей-интернатын но Ижкарысь 83 номеро школаын усьтэм агроклассъёсын 101 пиналъёс дышетско. Агроклассъёс Юкаменск ёросын но усьтыны малпало



Наверх
Вниз