Ижкар+19 °C
7 -тӥ пӧсьтолэзь 2020 Пуксён
16+

Огъя кун экзаменъёсты ортчытонъя тупатэм расписаниез шараязы Удмуртиын

  • 376
  • 0
Ижкар / Удмуртия
Огъя кун экзаменъёсты ортчытонъя тупатэм расписаниез шараязы Удмуртиын
Туспуктэм: Григорий Фомин

2020-тӥ арын огъя кун экзаменъёсты но вылӥ дышетсконниосты абитуриентъёсты кутонэз ортчытон ужпумъёсъя удыскуспо кенешонын экзаменъёслэсь выль расписанизэс шараязы. Со сярысь 26-тӥ куартолэзе Удмуртиысь дышетонъя но тодосъя министерство ивортӥз.

29-тӥ но 30-тӥ инвожое нырысь-валысь эскерон экзаменъёс ортчозы, соку экзаменэз ортчытон ужанрадлыкез чаклалозы.

Огъя кун экзамен шекъёстэк мед ортчоз, экзаменэ лыктэм дышетскисьёс аудиториосын асьсэды кышкыттэм мед шӧдозы шуыса, со вань сӧзнэтэз тупатыны луонлык сётоз
Сергей Кравцов, Россиысь калыкез дышетонъя министр

Роспотребнадзорен но Рособрнадзорен шараям ӵеконъёсъя, асьсэос очной амалэн огъя кун экзаменъёс 3-тӥ пӧсьтолэзе кутскозы. Озьыен, тодметъёсъя тодон-валанъёс ортчозы:

3-тӥ пӧсьтолэзе – география, литература, информатика;

6-тӥ но 7-тӥ пӧсьтолэзе – ӟуч кылъя;

10-тӥ пӧсьтолэзе – профильной математикая;

13-тӥ пӧсьтолэзе – история, физика;

16-тӥ пӧсьтолэзе – обществознание, химия;

20-тӥ пӧсьтолэзе – биология, кунсьӧр кылъёсъя гожтон люкетэз;

22-тӥ но 23-тӥ пӧсьтолэзе – кунсьӧр кылъёсъя вераськон (устной) люкетэз;

Резерв нуналъёс пусъемын: 24-тӥ пӧсьтолэзе – вань тодметъёсъя, ӟуч кылъя но кунсьӧр кылъёсъя сяна, но 25-тӥ пӧсьтолэзе – вань тодметъёсъя

Кин тырмыт луись мугъёсъя пӧсьтолэзе экзаменъёсты сётыны уз быгаты, гудырикошконэ ватсаса дыр чакламын. Огъя кун экзаменъёсты ортчытон валтӥсь но ватсаса нуналъёс пусъемын озьы, вань пиналъёс вылӥ дышетсконниосы ужкагазъёс сётыны мед вуттозы шуыса.

3-тӥ гудырикошконэ географияя, литературая, информатикая, биологияя, историяя но кунсьӧр кылъёсъя (вераськон люкетэз) экзаменъёсты сётыны луоз. 7-тӥ гудырикошконэ – обществознаниея, химияя, физикая, профильной математикая но кунсьӧр кылъёсъя (гожтон люкетэз). 8-тӥ гудырикошкон – вань тодметъёсъя резерв нунал.

Вылӥ дышетсконниосын абитуриентъёсты кутон люкетэн ортчоз. Дышетонэз 1-тӥ куарусёнысен кутскыны оско.

Кенешонэ пыриськисьёс нимысьтыз саклык висъязы дышетӥсьёслэсь эрикрадъёссэс утёнлы. Вуоно толэзе, экзаменъёс кутскон азьын, школаын ужасьёслы шутэтскыны сётозы шуыса чаклало.

Тодэ вайытом, 2020-тӥ арын огъя кун экзаменъёсты вылӥ дышетсконниосы пырыны малпась пиналъёс гинэ сётозы, мукетъёсызлы аттестатазы оценкаосты арлы йылпумъянъёсъя пуктозы. 11-тӥ классэз йылпумъясьёс понна Удмуртиысь школаосын чингыли берпуметӥзэ жингыртон ужрад 30-тӥ куартолэзе онлайн амалэн ортчоз



Наверх
Вниз