Ижкар+18 °C
29 -тӥ куарусён 2020 Пуксён
18+

Вить выль мастерскойёс кылдытозы Асанысь техникумын йӧскалык ӵектосъя утэм грант чотын

  • 102
  • 0
Асан / Удмуртия
Вить выль мастерскойёс кылдытозы Асанысь техникумын йӧскалык ӵектосъя утэм грант чотын
Туспуктэм: asanovo-att.ru

Алнаш ёросысь Асанысь аграрно-технической техникумын «Образование» йӧскалык ӵектос улсын басьтэм 40 миллион манетлэсь трос грант чотын вить выль мастерскойёс кылдытозы: ветеринария, геномной инженерия, гурт возёс биотехнологиос, сити-фермерство, гурт возёс машинаосты уже кутон. Со сярысь улосвыл тӧролэн но кивалтэтлэн пресс-службазы ивортэ.

Озьы техникумын WorldSkills чемпионатъёс но выль компетенциосъя возьматон экзаменъёс ортчытъяны, шор ёзо но ватсаса ӧнерлы дышетонъя программаосты паськытатыны луонлык кылдоз. Дышетсконниын пиналъёс но, бадӟымъёс но тодон-валанъёс басьтыны быгатозы. Техникуме аспӧртэм техника но тӥрлык басьтӥзы: NewHolland трактор, УЗИ-сканер, скал кыскись робот, агронавигатор, пресс-подборщик.

Пусъём, Асанысь техникум сяна, грантъёс Ижкарысь лэсьтӥськонъя техникум, Уваысь ӧнерлыко колледж, Можгаысь агропромышленной колледж но Сарапулысь дышетӥсьёсты дасянъя колледж утӥзы. Соос оглом 152 миллион манетлэсь трос коньдон басьтӥзы.

Вить пӧлысь куинез огазеяськонъёс гурт вӧзес ӧръя ужало – та удысъя Удмуртия тужгес трос грантъёс басьтӥз! Ӵошатон понна: кылем арын Удмуртия экономикая но технологияя колледжез гинэ выльдыны коньдон басьтӥз, дышетсконниын выль мастерскойёс толсуре усьтӥськизы
Александр Бречалов, Удмуртилэн тӧроез

Ватсалом, 2021-тӥ арын Ижкарын «Центр опережающей профессиональной подготовки» усьтозы. Со Радиоэлектроникая но ивортодэт технологиосъя техникум бордын ужалоз. Центр «школа – колледж – вылӥ дышетсконни» сӧзнэтын кусыпъёсты юнматыны, ӧнерчиосты дасянэз кужмоятыны, ӧнер дышетсконниослэсь предприятиосын кусыпъёссэс выльдыны луонлык сётоз.

Тодэ вайытом, Удмуртиысь вить шор ёзо ӧнер дышетсконниосын туала мастерскойёс кылдытыны коньдон вуоз шуыса тодмо луиз вал кылем ар пумын. 



Наверх
Вниз