Ижкар+19 °C
7 -тӥ пӧсьтолэзь 2020 Пуксён
16+

Удмурт классъёс усьтӥськозы Глазкарын но Можгаын Удмуртилэн кунлыкезлы даур тырмон аре

  • 116
  • 0
Ижкар / Удмуртия
Удмурт классъёс усьтӥськозы Глазкарын но Можгаын Удмуртилэн кунлыкезлы даур тырмон аре
Туспуктэм: Майя Бывальцева

Удмуртилэн кунлыкезлы 100 ар тырмон аре Глазкарын но Можгаын удмурт кылэз дышетонэн тямыс классъёс усьтӥськозы. Котырес дырпусэз пусйыны дасяськонъя но ортчытонъя ужась группалэн кенешоназ 17-тӥ инвожое со сярысь элькунысь дышетонъя но тодосъя министр Светлана Болотникова вераз, ивортэ улосвыл тӧролэн но кивалтэтлэн пресс-службазы.

Удмурт кылэз Глазкарысь 17 номеро школаысь 1А но 2А классысь пиналъёс дышетыны кутскозы. Котькуд ар удмурт кылэз анай кылэз сямен дышетонъя одӥг класс ватсаськоз. Со сяна, 3-5 классъёсын дышетскисьёс понна факультатив радъялозы

Дышетон программаез сяна, выль дышетскон арысен 17 номеро школаын лулчеберетъя но кылъя пӧртэм ужрадъёсты кутскозы. Вордскем шаерлэн этнографиезъя но историезъя музей висъет, удмурт кылэз дышетонъя нимысьтыз кабинет усьтыны малпало. Эшшо удмурт театр студия но крезьгуро ансамбль кылдытозы, котькуд ар тодосъя конференциос ортчытъялозы.

Со сяна, школалэсь нырысетӥ но кыкетӥ этажъёссэ удмурт тусо карозы, нимпулъёсты ӟуч но удмурт кылъёсын гожтозы.

Школаысь дышетӥсьёс оско, анай кылэз дышетыны мылкыд сётоз Удмуртилэн уйпал ёросъёсысьтыз пиналъёс понна финн-угор творчествоя «Звон Италмаса» улосвыл фестиваль. Сое радъяны коньдон дышетсконни Глазкарысь Лингвистикая центрен ӵош Азьмуртлэн грантъёсъя фондысьтыз 370 сюрс манет утӥз.

Озьы ик школаын улосвыл медиацентр усьтыны но элькунлэн уйпалысьтыз пиналъёс понна профильной сменаос ортчытъяны, Кыккылолкъя центр кылдытыны малпало.

Тодэ вайытом, туэ тулыспалэ Глазкарын удмурт кылэз дышетонъя гимнази классъёс, нош азьланяз - Флор Васильев нимо йӧскалык гимназия усьтон сярысь вераськизы вал. 

Можгаын удмурт классъёс Можгаысь 1, 5, 9, 10 номеро школаосын усьтозы. Со куать классъёс, отын 130 пиналъёс дышетскозы

Удмурт кылэз дышетонэз выльысь улӟытон понна школаосы 1-4 классъёс понна «Ӟеч-а, бур-, удмурт кыл!» учебникъёс вуизы. Озьы ик кружокъёс нуыны пособиос басьтӥзы.

Муниципал кылдытэтысь кивалтӥсьёс карын прогимназия усьтон но «Воршуд» элькун ужрадэз ортчытон ужпумез эскеро.

Котырес лыдпусэз пусъён аре дышетскисьёсты тодосъя «100-летие государственности Удмуртии: исторические вехи и перспективы развития» калыккуспо конференцие пыриськыны ӧтё. Сое туэ сӥзьыл ортчытыны чаклало.

Тодэ вайытом, Удмуртилэн кунлыкезлы 100 ар тырмонэз пусъён улсын Ижкарысь Кузебай Герд нимо йӧскалык гимназиын тупатъян ужъёс мыно.

Ватсалом, юбилейлы сӥзем ужрадъёсты санитар куронъёсты чакласа ортчытозы.



Наверх
Вниз