21 -тӥ коньывуон 2020 Вирнунал
18+

Удмурт кылъя дунтэк курсъёс ужаны кутскизы Можгаын

  • 86
  • 0
Можга / Удмуртия
Удмурт кылъя дунтэк курсъёс ужаны кутскизы Можгаын
Туспуктэм: Руслан Нуриахметов

Можгаын 11-тӥ ползэ ни удмурт кылъя дунтэк курсъёс ужаны кутскизы. Таяз радэ отчы 10 адями гожтӥськиз. Со сярысь ивортодэтъя «Удмуртия» агентстволы курсъёсты нуись, Можгаысь Т. К. Борисов нимо педколлеждысь дышетӥсь Татьяна Иванова вераз.

Шумпотоно, вань педколледжысь но ветколледжысь студентъёс – 17, 18, 20 аресъем. Вань ужасьёс – 36-46 аресъёс, вань пенсионеръёс – 60-61 аресъёс. Соос ваньзы сямен ӟучомем удмуртъёс, одӥг ӟучез вань
Татьяна Иванова, Можгаын удмурт кылъя курсъёсты нуись

Татьяна Иванова ужаз пӧртэм амалъёсты кутэ. Дышетскем яке ужам бере курсъёсы лыктэмъёслы лекция гинэ лыдӟыны шонер ӧвӧл, шуэ дышетӥсь. Соин ик урокъёсын шудо но, суредасько но.

Шудон пыр тросгес ортчытӥськомы, круге султыса ортчытӥськомы. Тани, куке соосын вераськиськод, листокъёссы, кылъёссы азязы, соос отчы учкыны тыршо, нош куке круге потӥськом, листокъёс ӧвӧл ни, соку зэмос тыршо ни, мар вал ай со шуыса, йыразы кельтыны. Котькуд кылэз выговаривать кариськом, ог-огзылэсь кылзӥсько шонер верамзэс. Нырысетӥ урокъёсын соос эшшо уг кыло, шонер верало-а, уг-а со удмурт аффрикатаосмес но яке ӧ но ӥ букваосын кылъёсыз. Нош собере, кӧня ке урок ортчемъя, валаны кутско «ӧ та шонертэмгес вераз кадь» шуыса
Татьяна Иванова, Можгаын удмурт кылъя курсъёсты нуись

Мон сюлмам шаерчи, дыр, шуэ Татьяна Иванова. Соин ик котькуд курсъёсын со Удмуртилэн но удмуртъёслэн историзы, лулчеберет, нимо-дано адямиос сярысь одно ик вераны тырше. Удмурт кылэз дышетыны лыктэмъёс, кылсярысь, Трофим Борисовен, Кузебай Гердэн, Ашальчи Окиен, Григорий Верещагинэн тодматско.

Удмурт шаерлэсь, удмурт калыклэсь историзэ, дано адямиоссэ тодытэк, тон удмурт калыкез но, удмурт шаерез но дунъяны уд дышы. Мынам потэ, мед соос именно гажаны, валаны мед дышозы та удмурт калыкез. Асьмелэн лыдмы кулэсме ке но, отын вань аслаз культураез. Конешно, мон одно ик возьматӥсько дӥськут тема дыръя Виноградовлэсь пужыоссэ но кӧня ке, чалма сярысь но верасько, малы айшет но кулэ, уксё тӥрлык но
Татьяна Иванова, Можгаын удмурт кылъя курсъёсты нуись

Озьы ик Татьяна Иванова кылзӥсьёссэ туала удмурт гожъясьёсын тодматыны тырше. Йӧскалык сиён-юонъёс сярысь но вератэк уг кельты. Дышетскыны лыктэмъёс ог-огзылы тунсыко рецептъёссэс верало. Курсъёсын тужгес тодмо кырӟанъёсты дышето – «Лымы тӧдьы» но «Ум люкиське».

72 час сётӥське та курслы. Со дыр ӵоже соос удмурт сямен чебер вераськыны уз быгатэ. Но удмурт калыкез гажаны, сое валаны турттыны, вот солы можно дышетыны
Татьяна Иванова, Можгаын удмурт кылъя курсъёсты нуись

Курсъёс педколледжын ортчо бере, Татьяна Иванова кылзӥсьёсты дышетсконнилэн музеяз но нуллэ, татын дышетскем тодмо адямиос сярысь вера. Колледжлэн юртэз но пусйымон – со Можгаысь одӥгез нырысетӥосыз пӧлысь из юрт, пуктэмын 90 ар талэсь азьвыл.

Мон туж бадӟым тау шуисько азьло директормылы Пискунов Николай Аркадьевичлы но алиезлы - Владимиров Григорий Спиридоновичлы. Соос лэзё милемыз колледже аудиторие люкаськыны. Соос лэзё монэ котькыӵе учебникъёсыз кутыны, библиотекаысь но, мынам татын котьмае кутэме луэ. Луэ кутэме видеоез но учкыны, телевизор кутэме луэ. Кытчы ке мыноно луысал ке, мукет интыын ортчытъяно луысал ке, мон сое ваньзэ сьӧрам кызьы нуом. Татын мынам вань луонлыке
Татьяна Иванова, Можгаын удмурт кылъя курсъёсты нуись

Татьяна Сергеевна Ивановалэн дышетон стажез 41 ар ни, педколледжын 35-тӥ арзэ ужа. 1990-тӥ аръёсы со студентъёс понна «Разговорный курс удмуртского языка» урокъёс нуны кутскиз. Ачиз ик солы программа гожтӥз, кудзэ дышетонъя министерствоын юнматӥзы но мукет педучилищеосын соя ужазы.

Собере Татьяна Иванова Можгаын вань мылкыд карисьёслы курсъёс радъяны ӧдъяз. Солэн верамезъя, дышетонъёсы быдэс семьяен но ветлӥсьёс вал. Озьы ик ужзыя калыкен кусып возись ӧнерчиос удмурт кылэз тодыны тыршизы. Куд-огез бӧрсьысь кык курсъёсы но пыриськылӥзы.

Азьло курсъёсы ветлӥзы кык батюшкаос, врачьёс. Одӥг курсъёсы ветлӥз Вавожысь врач, только кутским вал нырысетӥ курсэз. Та палан курсъёс ӧй вал на, и со Вавожысь кык толэзь ветлӥз арнялы кык пол машинаен. Можгаысь врач-гинеколог ветлӥз, «мыным со кулэ» шуиз. <…> Кин ке лыктэ кыкетӥзэ. Кыкетӥзэ лыктыкузы соослэн юанъёссы кылдо ни. Солы но шумпотоно. Нырысетӥ курсын вераськод маке, ну, озьы кулэ и всё. А татын соослэн юанзы кылдэ – малы озьы? Озьыен, со не просто ветлэ, а малпаське
Татьяна Иванова, Можгаын удмурт кылъя курсъёсты нуись

Дышетскон пумын кылзӥсьёслы курсъёсты ортчемзы сярысь сертификат сётыны «Удмурт Кенеш» огазеяськонлэн Можга ёзэтысьтыз кивалтӥсьёс вуыло. Со сяна, карысь газетын, телевидениын ужасьёс соосын интервью гожто. Сыӵе саклык дышетскисьёслэсь мылкыдзэс ӝутэ. 

Берло аръёсы удмурт кылъя курсъёс Удмуртиысь йӧскалык политикая министерство юрттэмен радъясько. Элькунысь удмурт кылъя дышетӥсьёслэн «Выжы» огазеяськонзылэн кивалтӥсез Ангелина Решетникова курсъёсты нуисьёс понна педсоветъёс радъя. Отын дышетӥсьёс ужан амалъёссы, кыӵе ке выль шедьтосъёссы сярысь верасько.

Тодэ вайытом, Ижкарысь Кузебай Герд нимо йӧскалык гимназиын дышетскись «ВКонтакте» мерлыко вотэс понна ӟуч кылъёсты удмуртэ берыктӥсь чат-ботэз кылдытӥз



Наверх
Вниз