Ижкар+1 °C
30 -тӥ шуркынмон 2021 Пуксён
18+

1-тӥ толсуре Удмуртиын 11-тӥ классын дышетскисьёс йылпумъясь сочинение гожтозы, со азьланяз огъя кун экзамен гожтыны лэзён луоз. Элькунысь дышетонъя но тодосъя министерстволэн пресс-службаез, «Российское образование» портал вылэ чӧлскыса, ужрадлэн валтӥсь люкетъёсыз сярысь ивортӥз.

Сочинение понна пиналъёслы «зачёт» яке «незачёт» пуктозы. «Незачёт» басьтӥсьёс но ужрадэ тырмыт луись мугъя вуымтэ муртъёс ужзэс 2022-тӥ арын 2-тӥ тулыспалэ яке 4-тӥ куартолэзе гожтыны быгатозы.

Тазалыксыя ӧжыт луонлыкъем адямиослэн но сӧсыръёслэн сочинение интые изложение гожтыны луонлыксы вань

Сочинениез гожтыны 3 час 55 минут висъяське (ляб тазалыко но сӧсыр пиналъёслы 1,5 часлы тросгес). Текстлэн быдӟалаез 350 кыллэсь ӧжыт медаз луы (тужгес ӧжытэз – 250 кыл), изложениелэн – 200 кыл (тужгес ӧжытэз – 150 кыл). 

Пиналъёс ужъёссэс вить пӧртэм ӧръёсъя гожтыны быгатозы. Соос туэ гудырикошконысен тодмо ини. Нош темаосты гожтон азязы гинэ тодозы.

Ӧръёс:

— Мынӥсь-ветлӥсь адями: сюрес адямилэн улоназ (зэмос сюрес, малпам, книгаысь);

— Цивилизация но технологиос – утиськон, ӧтён яке трагедия? (цивилизацилэн вормонъёсыз но кышкытлыкъёс, соин герӟаськем осконъёс но кышканъёс);

— Йыртэман но Кылкутон (йыруж но кылкутон мерлыко но нравственной явление сямен, возьытлык но кепыран, кылкутон но эпкылён);

— Книга (крезьгур, спектакль, фильм) – мон сярысь (дышетскисьлы ас понназ валтӥсь луись текст сярысь мылкыдъёсты веран);

— «Кому на Руси жить хорошо?» - кунмуртлэн юанэз (мерлыко шекъёс но мер зэмлык, секыт югдуре шедемъёслы юрттон амалъёсты утчан, обществоез но кунэз умоятон сюресъёсты утчан).

Тодэ вайытом, кылем дышетскон арын 98 процентэз сочинение гожтӥсьёс «зачёт» басьтӥзы вал. 

Иворъёс

Дэбес черкогуртысь Литовской ульчаын «Демография» йӧскалык ӵектос улсын 80 интылы выль ясли-сад усьтӥзы. 1-тӥ толсуре выль яслие 1-3 аресъем 50-лэсь ятыр пиналъёс мынозы. Со сярысь элькун тӧролэн но кивалтэтлэн пресс-службазы ивортӥз.

Элькунысь дышетонъя но тодосъя министр Светлана Болотникова туэ «Демография» йӧскалык ӵектос улсын 14 нылпи садъёс пуктӥсько шуыса пусйиз. Троссэ соос пӧлысь вуоно арын усьтозы.

Выль нылпи садэз уже кутыса, ми Дэбесын интыослы кулэяськонэз быдэсак ворсалом. 2021-тӥ арын нылпи садъёс пуктыны оглом 1,9 миллиард манет котыр висъямын. Ми трос нылпи садъёс пуктӥськом, озьы ке но черодъёс вань на - Ижкарын но Дэри ёросын
Светлана Болотникова, Удмуртиысь дышетонъя но тодосъя министр


Дэбесын нылпи садэз типовой ӵектосъя ӝутӥзы, со 80 интылы чакламын. Выль юртын пиналъёслы ньыль группаос, физкультуралы зал, эмъюрттэт сётыны висъет, кӧлон интыос, шудон висъетъёс, сиён пӧраны туала кухнязы вань.

Нылпи садын ужасьёс выль юртсылы туж шумпото.

Табере нылпи садамы югыт но шуныт. Шудонъёс пиналъёслы арессыя но лыдзыя быръемын Пӧран интымы туж умой, пӧрасьёсмы вань техникаез эскерыса вуизы ини. Нылпиослы кылиськон интыосын дӥськут куасьтон шкафъёс пуктэмын. Со туж умой, тани лымыё куазь дыръя поръямысь пырыса, кӧлон дырзы ӵоже вань дӥсьсы куасьме ини.
Елена Бывальцева, Дэбесысь 3 номеро нылпи садлэн выль юртэзлэн кивалтӥсез

Пиналъёслы сяна, нылпи садын ужасьёслы но умой луонлыкъёс кылдытэмын. Мисьтаськон интыын мисьтаськон но куасьтон машинаос, утюгаськон станок сыло. Крезьгуръя залын туала тӥрлык пуктэмын. Ваньмыз туж яркыт но чебер лэсьтэмын.

Матысь дыре, толсуре, 80 интылы эшшо одӥг ясли-садэз усьтозы, корка пыронэз Каракулино черкогуртын пусъёзы. 

Тодэ вайытом, Глазкарын выль спорт огъет пуктозы.

Удмуртиысь школаосты йӧскалык лулчеберетэз дышетонэз тужгес усто радъянъя огъяросси конкурсэ пыриськыны ӧтё. Со сярысь элькунысь дышетонъя но тодосъя министерстволэн пресс-службаез ивортӥз.

Конкурс йӧскалык лулчеберетэз дышетонын тужгес усто практикаосты, инновационной амалъёсты шараян понна, ас лулчеберетэз тодон, мукет выжысь адямиосты гажан пыр пиналъёсты азинлыко, кылкутӥсь будэтон понна ортчытӥське.

Вожвылъяськонэ школаос нимаз но, сетевой амалъя валче ужась коллективъёс ӵошен но пыриськыны быгато.

Конкурс кык ӧръя ортчоз: дышетон ӵектос но мерлыко видеоролик.

Нырысетӥяз ӧрын куинь номинация луоз:

  • шаертодонъя номинация: «Тропинки моей малой Родины» (дышетон туризмъя программаос кылдытон но улонэ пыӵатон);
  • лулчеберетъя но историяя номинация: «Обычаи и традиции гостеприимства моего народа»;
  • югдытон номинация: «Мой статус "Пишу грамотно"».

Нош мерлыко видеоролик ӧрын социокультурной но волонтёр ӵектосъёсъя «Организация безопасной образовательной среды в поликультурном регионе конкурс луоз.

Куриськонъёсты 2021-тӥ арын 30-тӥ шуркынмонозь кутозы. Ужъёслы дунъет 15-тӥ толсурозь лэсьтозы. Нош 21-тӥ толсуре йылпумъянъёсты шараялозы но вормисьёсты пусъёзы

Пыр-почгес ивор тодыны но куриськон келяны чӧлсконпусъя луэ.

Тодэ вайытом, 2021-тӥ ар кутсконын Удмуртиын анай кылэз дышетонэн устооссэ школаосты бырйизы вал. 

Пичи Пурга ёросысь Кечол шор ёзо школаысь Мария Абрамова кык кылъем эссе гожтонъя Москваысь «Билингва-2021» VII калыккуспо вожвылъяськонлэн I степенё лауреатэз луиз. Со «Моё наследие» номинацилэн «Язык – исповедь народа» темаяз вормиз. Со сярысь ивортодэтъя «Удмуртия» агентстволэн корреспондентэзлы Кечол шор ёзо школаысь удмурт кылъя но литературая дышетӥсь Маргарита Долганова вераз.

Мария Абрамова 10-12 аресъемъёс пӧлын кужымзэ мертаз. Но берло валамон луиз, солэн номинацияз пыриськисьёсты ваньзэсты оглом учкизы шуыса, уго II но III степенё лауреат нимъёсты 18 но 22 аресъем конкурсантъёслы сётӥзы. Озьы ке но, Мария пӧлазы кужмоез луиз.

Ми кылэз калыклэн лулсюлэмзэ усьтонэн шуыны луоз-а шуыса кутским. Со (Мария Абрамова – ред.) котькытчы пыриське, олокытын но вормылэ: кылбур лыдӟонын но, сочинение гожтонын но. Кылем гужеме «Шундыкаре» ветлӥз. Тӥни озьы, ваньзэ ас вылаз эскерыса, со шуэ: вераськон юрттэ. Анай кылыз солы лулсюлэмзэ усьтыны, ассэ возьматыны юрттӥз
Маргарита Долганова, Кечол шор ёзо школаысьудмурт кылъя но литературая дышетӥсь

Финалистъёсты сӥё-дано пусъён ужрад 17-тӥ шуркынмонэ Москваысь кивалтэтлэн юртаз ортчиз. Вормисьёсты дипломъёсын но кузьымъёсын пусйизы. Со сяна, кунмылэн шоркареныз тодматӥзы: историяя музее, Огъяросси адӟытон центре вуылӥзы, Коломенскойысь музей-заповедникын «Один день из жизни царя Алексея Михайловича» интерактивной экскурсие пыриськизы.

Пусъём, вожвылъяськон арлы быдэ ортче. Туэ отчы Россиысь но дуннеысь 34 пӧртэм кылъёсын эссеос вуизы. Ужъёссэс азербайджан, литва, молдаван, монгол, казах, киргиз, серб, бигер, удмурт, украин, якут но мукет кылъёсын вераськись 10-22 аресъем 300-лэсь трос нылпиос но егитъёс келязы. 

Тодэ вайытом, Алнаш ёросысь пинал арганчи огъяросси конкурсын вормисьёс пӧлы шедиз.



Удмуртиын кык студентъёс «Большая перемена» огъяросси вожвылъяськонын быдэн одӥг миллион манетэн утӥзы. Колледжъёсын 2-4 курсъёсын дышетскисьёс пӧлын конкурслэн йылпумъян люкетэз 16-тӥ шуркынмонэ Нижний Новгородын ортчиз. Со сярысь элькунысь дышетонъя но тодосъя министерстволэн пресс-службаез ивортӥз.

Удмуртиысь куать студентъёс ветлӥзы: Ижкарысь, Сарапулысь но Дэбес ёросысь. Марина Постоева но Алексей Сурнин вормисьёс пӧлын шедизы но миллион манетэн басьтӥзы. Алёна Анухина, Юлия Зеленина, Софья Лопашова но Милана Ситчихина озьы ик вормизы но быдэн 200 сюрс манет басьтӥзы.

Нырысь пырон тестъёсты ортчи, собере удысъёсъя заданиез, зэмзэ ик секыт вал. Конкурс кема кыстӥськиз – южтолэзьысен шуркынмонозь. <…> Полуфиналын но финалын валтӥсез – со команда, кудӥныз туала ужпумъёсты сэрттон-пертчон амалъёсты утчаны тунсыко но лякыт. <…> Шумпотӥсько, сыӵе кузь сюрес юнме ортчемын ӧвӧл, экспертъёс командаен ужамез но, аслэсьтым быгатонлыкъёсме но дунъязы шуыса
Алексей Сурнин, «Большая перемена» огъяросси вожвылъяськонын вормись

Шор ёзо ӧнер дышетсконниосысь студентъёс «Большая перемена» вожвылъяськонэ нырысьсэ пыриськизы. Дистанционной но очной эскеронъёс пыр финалэ 600 егитъёс потӥзы. Йылпумъян люкетаз «Искусство и творчество», «Образовательные технологии», «Среда обитания», «Общество» ӧръёсъя ужъёсты быдэсъязы. Озьы ик финалистъёс мер улонысь пӧртэм удысъёсты умоятыны юрттӥсь ӵектосъёс дасяны кулэ вал.

Мылкыд пачылме. Ваньмыз туж тунсыко ортчиз. <…> Мон данъяськисько быдэстэм уженымы. Шор ёзо ӧнер дышетсконниосысь студентъёс, эн кышкалэ, дӥсьтэ, пыриське, со туж бадӟым луонлык, туж бадӟым опыт
Марина Постоева, «Большая перемена» огъяросси вожвылъяськонын вормись

Колледжъёсын но техникумъёсын дышетскисьёслэн конкурсазы 300 пиналъёс вормизы: 4-тӥ курсын дышетскись 150 студентъёс быдэн 1 миллион манет басьтӥзы, 2-3 курсъёсын дышетскись 150 студентъёс – быдэн 200 сюрс манет. Вормисьёслэн дышетӥсь-наставникъёссылы 150 сюрс манетэн сётозы, нош устоосызлы 20 дышетсконниослы – дышетон луонлыкъёссэс азинтон понна быдэн 2 миллион манетэн.

Вожвылъяськонлэн йылпумъян люкетэз дыръя студентъёс мылкыдэз ӝутӥсь пумиськонъёсы но творчествоя мастер-классъёсы пыриськыны быгатӥзы.

Тодэ вайытом, азьвылгес школаын дышетскисьёс пӧлын «Большая перемена» огъяросси конкурслэн финалэн ортчиз. Отын Удмуртиысь ньыль пиналъёс вормизы.

Удмуртиысь ньыль дышетскисьёс «Большая перемена» огъяросси вожвылъяськонын вормизы. Воткаысь Илья Туляков, Киясаысь Екатерина Шутова, Сарапулысь Софья Самарина но Ижкарысь Эвелина Валова быдэн одӥг миллион манет утӥзы.

Вожвылъяськонлэн йылпумъян люкетэз «Артекын» 7-13 шуркынмонэ ортчиз. Отчы Удмуртиысь бадӟым классъёсын дышетскись 11 пиналъёс ветлӥзы. Софья Самарина но Екатерина Шутова конкурсэ кыкетӥ арзэ пырисько ни, кылем арын быдэн 200 утӥзы.

Мылкыд лӧптэмын, малы ке шуоно «Артекысь» югдур кужым сётэ. Татын тунсыко адямиос котьку трос но пӧртэм ужрадъёс орчтыло. Но туэ вормон секытэнгес сётӥськиз. Кылем арын котькуд люкетэз мылкыд ӝутскем вылын ортчиз ке, таяз ардэ пуктэм ужпумез быдэстон понна трос кужым сётоно луиз
Софья Самарина, «Большая перемена» огъяросси вожвылъяськонын вормись

9-11 классъёсын дышетскисьёс пӧлын вормисе 600 адями потӥз.

Озьы ик 15-тӥ шуркынмонэ Нижний Новгородын шор ёзо ӧнер дышетсконниысь студентъёслэн вожвылъяськонзылэн йылпумъян люкетэз кутскиз. Удмуртиысь куать адями пыриське.

«Большая перемена» Россиын кыкетӥзэ ортче. Туэ отчы 2 миллион 500 сюрслэсь трос дышетскисьёс но шор ёзо ӧнер дышетсконниосысь 1-3 курсъёсысь студентъёс пыриськизы.

Тодэ вайытом, 2020-тӥ арын школаын дышетскись ньыль пиналъёс огъяросси вожвылъяськонын вормизы

Россиысь тодосъя академилэн Урал ёзэтысьтыз Эскеронъёсъя удмурт федерал центрысь тодосчиос удмурт текстэз куарае берыктӥсь программа (синтезатор удмуртской речи) кылдытӥзы. Со сярысь ивортодэтъя «Удмуртия» агентстволэн корреспондентэзлы ӵектослэн авторез, программист, Центрысь машинаосын дышетонъя лабораториысь тодосъя ӧнерчи Григорий Григорьев вераз.

Огшоры кылын ке, со сыӵе программа, кудӥзлы удмурт кылын текст сётӥськод но, со сое кураен лыдӟе, аудиофайл кылдытэ
Григорий Григорьев, программист

Дась аудиофайлэз телефонысь но, компьютерысь но, мукет со выллем цифровой амалэн ужась арбериосысь но кылзыны луоз. Программа кылысь кылэ берыктӥсьёсын, удмурт кылъя корпусын, ляб адӟисьёсын, куараен юрттӥськисьёсын (голосовой помощник) но мукетъёсыныз уже кутӥськыны быгатоз.

Со удмурт кылъя корпуслэн сайтаз нимаз бамын ужалоз.

Нырысь ик со нимаз бам кадь луоз. Нош сэре корпусэ но озвучка пыртыны малпанмы вань. Соку со корпусэн ӵош ужаны быгатоз. Кылсярысь, со кыӵе ке висъям предложениез куараен лыдӟоз
Григорий Григорьев, программист

Программа «Мынам Удмуртие» радиоысь нуисьлэн Светлана Пикулевалэн куараеныз вераськоз.

Григорий Григорьевлэн кылъёсызъя, синтезатор кылдытыны кичӧлтонэн со ачиз потӥз. Россиысь тодосъя академилэн Урал ёзэтысьтыз Эскеронъёсъя удмурт федерал центрын ужасьёс солы дурбасьтӥзы. Озьы ужзы вырӟиз.

Мынам потэ вал нейронной сетез дышетыса утчаме. Тужгес валамонэз задача, кудзэ нейронной сетен лэсьтыны луэ, со ӵапак синтезатор речи. Со сыӵе утчаны шуыса, дышетскыны шуыса. Но кыӵе ке но пайдалык но со ваёз
Григорий Григорьев, программист

Программаез кылдытыны Григорий Григорьевлы эшъёсыз юрттӥзы. Денис Корнилов Светлана Пикулевалэсь куаразэ гожтӥз, сое дасян бордын тыршиз. Та ужез быдэстыны ог ӝыны арзы кошкиз. Нош Виталий Пронин нейронной сетез дышетыны юрттӥськиз.

Ми нырысь ик текстэз озвучить карим, сое Светлана Пикулева лыдӟиз. Сое обработать карим, предложениослы люкылӥм, марам. Собере нейронной сетез со текстлы дышетӥм. Табере ми солы кыӵе ке текст сётыны быгатӥськом, кудзэ со, кыӵе даннойёс ми солы сётӥм, со порма ик лыдӟыны турттэ
Григорий Григорьев, программист

Та дыре синтезаторлэн нырысетӥ версиез гинэ дась ай. Программистъёс сое умойгес, чылкытгес карон бордын тыршо на. Кылсярысь, али удмурт текстэз синтезаторен куарае берыктӥд ке, валаны луоз, сое программа лыдӟе шуыса. Азьланяз сое шӧдыны уз луы ни.

Нош бӧрысь ӧнерчиослэн удмурт кылын вераськемез текстэ берыктӥсь программа но кылдытыны малпанзы вань. Но Григорий Григорьев валэктӥз, со бордын нимаз тыршоно луоз, малы ке шуоно таиз нейронной сеть озьы уг ужа, со бадӟым уж, кудӥзлы 1-2 ар кулэ луоз.

Тодэ вайытом, ӟуч-удмурт кыллюкамез поттӥсьёсты Удмуртилэн кун премиеныз пусйизы

2022-тӥ арын Глазкарын но Сарапулын пиналъёс понна цифровой дышетонъя «ИТ-Куб» центръёс усьтозы. Соосты «Образование» йӧскалык ӵектосъя кылдыто. Со сярысь Удмуртиысь тӧролэн но кивалтэтлэн пресс-службазы ивортӥз.

«ИТ-Куб» - ивортодэт технологиосъя удысъя быгатонлыкъёслы вакчи дыр куспын дышетскон. Ӵектос ИТ-рынокысь азьмынӥсь компаниосты, визь-кенеш сётӥсьёсты но 7-18 аресъем разработчикъёсты огазея.

Пиналъёс ИТ-удысысь азинлыко ӧръёсъя дунтэк дышетскыны быгато.

Кылем арын «ИТ-Куб» центр Ижкарын кылдӥз, туэ – Воткаын. Озьы ик 2022-тӥ арын Удмуртиын «Образование» йӧскалык ӵектосъя 38 «Точка роста» центръёс усьтыны чакламын.

Тодэ вайытом, 2021-тӥ арын куарусёнэ Удмуртиысь 39 школаосын «Точка роста» центръёс ужаны кутскизы. Нош коньывуонэ 110 дышетон ужъюртъёсы 3 сюрслэсь трос компьютер тӥрлык вуттӥзы

Удмуртилэн кунлык басьтон нуналэз азьын элькунлэсь Кун премизэ басьтӥсьёс тодмо луизы. Соос пӧлын Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтын ужасьёс но, тодосчиосты ӟуч-удмурт кыллюкамез поттэмзы понна пусйизы. Со сярысь Центрлэн пресс-службаез ивортӥз.

Искусство, литература но дышетон удысъя Удмуртилэн Кун премиезлэн лауреатъёсыз луизы:

- Леонид Ившин - Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтысь кылосбур эскеронъёсъя ёзэтысь тодосъя ӧнерчи;

- Людмила Карпова - Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтысь кылосбур эскеронъёсъя ёзэтысь тодосъя валтӥсь ӧнерчи;

- Людмила Кириллова - Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтысь кылосбур эскеронъёсъя ёзэтысь тодосъя бадӟымез ӧнерчи;

- Сергей Максимов - Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтысь кылосбур эскеронъёсъя ёзэтысь тодосъя ӧнерчи;

- Ольга Титова - Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтысь кылосбур эскеронъёсъя ёзэтысь тодосъя ӧнерчи.

Искусство, литература но дышетон удысъя ик Кун премиос Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая институтысь «Удмуртская Республика: Здравоохранение» энциклопедия кылдытӥсьёс басьтӥзы. 

Со сяна, Кун премиосын пусйизы: тодос но технологиос удысъя - эмчиослэсь группазэс «Дети Удмуртии: перспективное популяционное исследование качества жизни» эскерон понна; Ижысь радиозаводын ужасьёсты - мувӧй поттыны электронасосъёсын ужан станциосты кылдытон но лэсьтыны кутскон понна; «Завод микроэлектронных технологий»

Читать полностью

Удмуртиын «Анай кылын мультфильмъёс» («Мультфильмы на родном языке») нырысетӥ элькун конкурслы йылпумъянъёс лэсьтӥзы. Ивортодэтъя «Удмуртия» агентстволэн корреспондентэз вожвылъяськонын вормисен, Тяма гуртысь нылпи садысь визьнодасен Ольга Ашихминаен вераськиз.

Визьнодась нылпи садысьтызы школалы дасяськон группае ветлӥсь пиналъёсын «Муш но майсы» выжыкылъя мультфильм дасяз.

Милемлы конкурслэсь положенизэ лэзизы, мон сое лыдӟи но мыным со сыӵе тунсыко луиз, сыӵе мыным со мылкыд сётӥз. Мон библиотекае мынӥ. Отысь книгаосты учкылӥ, удмурт кылын пичи гинэ выжыкыл утчай, пиналъёс сое вераны мед быгатозы, кылъёсыз капчигес мед луозы шуыса
Ольга Ашихмина, визьнодась

Выжыкыл бырйыса, визьнодась пиналъёсын ужаны кутскиз: ӵошен пӧртэм иллюстрациосты учкизы, нымы-кибыосын тодматскизы, пластилинэн ужаса утчазы, декорациос бырйизы. Бӧрысь мультфильм кылдытон борды басьтӥськизы. Нылпиос Ольга Ашихминалы суредазы, персонажъёсты пластилинлэсь лэсьтыны юрттӥзы, куаразэс гожтӥзы.

Визьнодась пусъе, видеороликъёс лэсьтонэн нырысьсэ кӧня ар талэсь азьло тодматскиз. Уж тунсыко потӥз. Дышетскон вылысь интернетысь, пӧртэм ватсэтъёсысь трос тодон-валан басьтӥз. Ваньмыз со конкурсэ ужзэс дасяны юрттӥз.

Пусъём, вожвылъяськонэ оглом 17 ужъёс вуизы, финалэ куатез потӥзы. Соос пӧлы Ольга Ашихминалэн мультфильмез но сюриз.

Финалистъёс кык эскерон ужъёсты быдэстӥзы. Нырысь ик «визитной карточказэс» возьматӥзы: йӧскалык дӥсенызы тодматӥзы но «Мой детский сад, моя профессиональная деятельность» темая презентация ортчытӥзы. Собере мультфильмзы сярысь вераськизы.

Озьы, Ольга Ашихмина конкурсын нырысетӥ инты басьтӥз. Кыкетӥ Дэри ёросысь Октябрьской черкогуртысь Полесской нылпи садысь визьнодась Елена Широбокова луиз. Куинетӥ интыез Ижкарысь 106 номеро нылпи садысь визьнодась Наталья Иванова басьтӥз.

Пусъём, ужрадэз радъясьёс но пыриськисьёс вожвылъяськонэз арлы быдэ ортчись карыны ӵектӥзы. 

Тодэ вайытом, Эстониын нылпиос понна удмурт кылын дышетӥсь видео поттӥзы

Эстониысь Тарту карын нылпиос понна удмурт кылын ньыль дышетӥсь видео лэсьтӥзы. Соосты поттонэз 28-тӥ коньывуонэ пусйиськись Анимацилэн калыккуспо нуналэзлы тупатӥзы. Со сярысь ивортодэтъя «Удмуртия» агентстволэн корреспондентэзлы ужъёсты одӥгез кылдытӥсь Анастасия Сидорова вераз.

Нылпиос понна удмурт кылын дышетӥсь нырысетӥез видео 2020-тӥ арын «Буёлъёс» нимын потӥз вал. Туж трос умой мылкыдъёс, ӟеч сӥзёнъёс вал нылпиослэсь но, анай-атайёслэсь но. Асьме семьяысь нылпиослы но туж кельшиз. Соку малпамы азьланьтыны та кутскем ужез, малы ке шуоно, туннэ нуналлы тужгес но YouTube канал нылпиосты гочатэ
Анастасия Сидорова, удмурт кылын дышетӥсь видеоез огез кылдытӥсь

Видеосуредъёсты лэсьтон бордын Анастасия Сидоровалэн кузпалэз, суредась, аниматор Сергей Сидоров ужаз. Со суредаз, анимация но монтаж лэсьтӥз. Анастасия куаразэ гожтӥз. Нош текстъёс бордын ужаны Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая удмурт институтысь тодосъя ӧнерчи Алевтина Камитова юрттӥз.

Озьы соос ньыль пӧртэм видео поттӥзы. Котькудӥз нимаз темалы сӥземын: лыдпусъёслы, мугор люкетъёслы, ымныр люкетъёслы но гурт пудоослы но тылобурдоослы.

Соосын, озьы ик азьвыл потэм «Буёлъёс» ужен но, чӧлсконпусъя тодматскыны луэ.

Анастасия Сидоровалэн кылъёсызъя, видеоез нылпи садын но, школаосын покчи классъёсын но уже кутыны луоз, со сяна, удмурт кылэз дышетӥсь адямиослы но тунсыко потоз.

Тодэ вайытом, Эгра ёросысь пиналъёс «Говорю. Верало» ӵектос пыр огъёзъёссэс удмурт лулчеберетэн тодмато.

Этнологлы, истори тодосъя докторлы, профессорлы Галина Никитиналы сӥзем виртуальной адӟытон дасязы Россиысь тодосъя академилэн Урал ёзэтысьтыз Эскеронъёсъя удмурт федерал центрлэн нимлыко сайтаз. Туэ 27-тӥ коньывуонэ Удмуртиысь тодос удысысь дано ужасьлы 70 арес тырмысал. Со сярысь ужъюртлэн пресс-службаез ивортӥз.

Галина Никитина институтын 1985-тӥ арысен ужаз. Солэн тодос удысын валтӥсь ӧрез удмурт крестьянстволэн историеныз, солэн аскивалтон амалъёсынызы герӟаськемын вал. Со сяна, бадӟым саклык висъяз удмурт калыклэсь тодон-валанзэ эскеронлы, со пӧлын калык дышетон, тазалыкез утён, метрология). Озьы ик дышетӥсьёс понна тодосъя но методикая пособиос кылдытъяз, Удмурт кун университетын дышетӥз. 110-лэсь трос тодос ужъёс гожтӥз, со пӧлын ньыль монографиос.

Со сяна, мер ужын но трос тыршиз: «Удмурт Кенешлэн» исполкомезлэн ёзчиез вал, 1998-2005 аръёсы «Удмурт нылкышно кенеш» огазеяськонэн кивалтӥз. Удмуртъёслэсь асваланэз, лулчеберетсэс азинтонын трос тыршемез понна Россиысь финн-угор калыкъёслэн ассосциацизы тодосчиез данъян грамотаеныз пусйиз. 2011-тӥ арын Кузебай Герд нимо йӧскалык премилэн лауреатэз луиз.

Ватсалом, 28-тӥ коньывуонэ 10 часын Историяя, кылъя но литературая удмурт институтын Галина Никитинаез буре ваёнлы сӥзем котыре ӝӧк ортчоз. ZOOM платформаын пумиськонысь возьматон нуозы. 

Удмуртиысь дышетонъя но тодосъя министр Светлана Болотникова 25-тӥ коньывуонэ журналистъёсын пумиськонын вераз, кызьы ужалозы элькунысь дышетон юртъёс улосвылын ужантэм нуналъёс дыръя но со бере.

Озьыен, 30-тӥ коньывуонысен 7-тӥ шуркынмонозь

  • школаос каникулъёсы кошко, куд-огаз соос 25-тӥ коньывуонэ кутскизы ни;
  • шор ёзо но вылӥ ӧнер дышетсконниосысь студентъёс асьсэ коже ужалозы, педагогъёс со вакытэ уз ужалэ;
  • ватсаса тодон-валан сётӥсь ужъюртъёс уз ужалэ;
  • нылпи садъёсын дежурной группаос усьтозы.

8-тӥ шуркынмонысен школаос, шор ёзо но вылӥ ӧнер дышетсконниос, ватсаса тодон-валан сётӥсь ужъюртъёс дистанционной ужан амалэ потозы. Нылпи садъёс дышем сямен уже берытскозы.

Тазалыксыя сюбегатэм луонлыкъёсын пиналъёс понна школа-интернатъёс но Удмурт кадет корпус обсерваци режимын ужало.

10 муниципалитетъёсын азьвыл чаклам радлыкъя школа бордын лагерьёс ужало. 10 карсьӧр лагерьёс но сӥзьыл каникулъёсы ужзэс азьланьто. Вань куронъёсты рос-прос быдэсъяса: лагерьёсын вакцинациез ортчем ужасьёс гинэ, ПЦР-тестъёсын, 75 процентлы гинэ тырмытыса. Куд-огез ужаны кутскизы ни, кудӥз ке 30-тӥ коньывуонэ кутскозы
Светлана Болотникова, Удмуртиысь дышетонъя но тодосъя министр

Озьы ик солэн верамезъя, дышетон удысын коронавируслэсь прививка пуктэмъёслнэ лыдзы туннэ нуналлы 70 процентлы матэктэ. Та дыре ковидъя карантинэ Дэбес ёросысь одӥг нылпи сад ворсамын, эшшо кыкез ОРВИ сэрен. Со сяна, 457 классъёс но колледжъёсысь группаос коронавирус сэрен пытсамын, 133-ез – кынман висёнъёсъя.  

Тодэ вайытом, 30-тӥ коньывуонысен 7-тӥ шуркынмонозь Удмуртиын, озьы ик быдэс Россиын, ужантэм нуналъёс ялӥзы. 25-тӥ коньывуонысен элькунын выль сюбегатонъёс кутӥсько. 

Удмуртиысь школаосын 11 дышетскисьёс но шор ёзо ӧнер дышетсконниысь куать студентъёс «Большая перемена» огъяросси вожвылъяськонлэн йылпумъян люкетаз потӥзы но валтӥсь кузьымъёс понна нюръяськозы. Со сярысь элькунысь дышетонъя но тодосъя министерстволэн пресс-службаез ивортӥз.

Пӧртэм ӧръёсын усто быгатонлыкъёссэс возьматӥзы Воткаысь, Ижысь, Кияса, Ува, Шаркан ёросъёсысь дышетскисьёс: Илья Туляков, Софья Самарина, Екатерина Шутова, Эвелина Валова, Алина Берестова, Руфь Басалыко, Анастасия Чижик, Алия Кощеева, Мария Чекрыгина, Виктория Деева, Варвара Трефилова.

Стдунетъёс пӧлын Удмуртилэсь данзэ утёзы Сарапулысь, Ижысь, Дэбес ёросысь егитъёс: Алёна Анухина, Юлия Зеленина, Софья Лопашова, Марина Постоева, Милана Ситчихина, Алексей Сурнин.

Школаын дышетскисьёс понна финал «Артек» калыккуспо нылпи центрын 7-тӥ шуркынмонэ кутскоз. Студентъёс йылпумъясь ужрадэ Нижний Новгородэ 15-тӥ шуркынмонэ люкаськозы

10-тӥ классын дышетскись 300 пиналъёс но куинетӥ курсысь 150 студентъёс 1 миллион манетъем премиос понна нюръяськозы. 8-9 классъёсын 300 дышетскисьёс но 1-2 курсъёсысь 150 студентъёс быдэн 200 сюрс манет но вузъёсы пырыку ватсаса баллъёс басьтозы. Вормисьёслэн дышетӥсьёссылы 150 сюрс манетэн сётозы, нош 30 устоосызлы школаослы – быдэн 2 миллион манетэн.

2021-тӥ арын «Большая перемена» вожвылъяськонэ 2 миллион 500 сюрслэсь трос дышетскисьёс но студентъёс пыриськизы.

Тодэ вайытом, 2020/2021 дышетскон арын Удмуртиысь куинь дышетскисьёс огъяросси вожвылъяськонын 5-7 классъёсын дышетскисьёс пӧлын вормизы. Нылъёс валтӥсь кузьымез утӥзы – Москваысен Владивостокозь но берен «Большая перемена» поездэн мынон-ветлон.

ВАТСАН

«Большая перемена» вожвылъяськон - «Россия – страна возможностей» платформалэн ӵектосэз. Конкурслэн нырысетӥ сезоназ вань улосвылъёсысь миллионлэсь трос дышетскисьёс пыриськизы. Ӵектослэн ужпумез – быдэ вуымтэослы асьсэды возьматыны но кужмо палъёссэс шедьтыны луонлык сётон. Вожвылъяськонын нырысь ик быгатонлыкъёсты
Читать полностью

18-тӥ коньывуонэ Удмуртиысь мерлыкъя но педагогикая элькун колледжын выль мастерскойёсты сӥё-дано усьтӥзы. Ваньбурез выльдыны «Образование» йӧскалык ӵектос улсын федерал но элькун коньдэтъёсысь 13 миллион 550 миллион манет висъязы.

«Дошкольное воспитание», «Преподавание в младших классах», «Социальная работа», «Физическая культура, спорт и фитнес» мастерскойёс WorldSkills Russia огазеяськонлэн куронъёсызъя экзаменъёсты ортчытон центр сямен аккредитовать каремын.

Та выль мастерскойёс федерал ӵектосъёсы пыриськыны но вормыны эшшо бадӟымгес луонлыкъёс усьто
Лилия Кожина, Удмуртиысь мерлыкъя но педагогикая элькун колледжлэн кивалтӥсез

«Физическая культура, спорт и фитнес» ӧръя мастерскойын студентъёс физкультура удысысь выль технологиосты уже кутыны дышетскозы. Висъетэ мугорез эскерись анализатор, «визьмо» вес, спорт тӥрлык пуктӥзы.

«Дошкольное образование» ӧръя мастерской нылпи садысь группалы укша. Отын вань сюрес вылтӥ мынон-ветлон куронъёсты дышетыны туала тӥрлык, дышетонъя EduQuest (ЭдуКвест) сӧзнэт, кудӥз нылпи садын дышетонъя кун стандартъёсты, робототехникаез, нылпи мультипликаци лэсьтон технологиез но мукетсэ огазея.

«Преподавание в младших классах» мастерское планшетъёс, интерактивной панель, электрон флипчарт, роботехникая бичетъёс басьтӥзы.

2019-тӥ арысен Удмуртиын 37 мастерскойёс усьтӥзы ни.

Таяз арын ми нош ик грант утӥмы, эшшо 42 мастерскойлы. Соос куинь арлы люкемын, 20022-тӥ арын 12 мастерскойёс усьтӥськозы. Оглом 119 куриськонъёс вал, ми нырысь ик промышленностен герӟаськем ӧнеръёсты бырйимы
Ирина Крохина, Удмуртиысь дышетонъя но тодосъя министрлэсь ужзэ быдэсъясь

Тодэ вайытом, туэ гудырикошконэ Элькун эм колледжын ньыль мастерскойёс усьтӥзы. 

Сюмси школаысь 11-тӥ классын дышетскисьёс Никита Онискиев, Антон Медведев но Илья Смирнов «Дебют в науке: исследование социальных проектов» огъяросси вожвылъяськонын кыкетӥ инты басьтӥзы. Пиос дунъясьёслы ужудысъёсын тодматскон (профориентационной) ӵектоссэс возьматӥзы. Со сярысь Удмуртиысь тӧролэн но кивалтэтлэн пресс-службазы ивортӥз.

Пиналъёслэн огъёзъёссылы ӧнер бырйыны юрттэмзы потӥз. Соин ик ужудысъёсын тодматонъя пӧртэм амалъёсты эскеризы, бадӟым классъёсын дышетскисьёс пӧлын юалляськон ортчытӥзы.

Юалляськон возьматӥз, тросэз выпускникъёс ӧнер бырйизы ни, ӝыныезлэсь тросэз дышетскисьёс ӧнерез асьсэос бырйизы. 11-тӥ классын дышетскон но нимаз тодметъёсын тунсыкъяськон юрттӥзы. 9-тӥ классъёсын анай-атайёслэн дэмланъёссы юрттӥзы
Илья Смирнов, ӵектосэз огез кылдытӥсь

Ӧнеръёсты эскеронэз но выпускникъёс пӧлын юалляськонэз ӵошатыса, пиос валазы, ӧнерез быръён радлык (алгоритм) кылдытыны кулэ шуыса. Школаысь психологен ӵош соос дунъет мэртэтъёс (критерий) малпазы но ӧнер быръён понна схема кылдытӥзы. Котькуд дышетскись сое уже кутыны но аслыз ӧнер быръёнын юрттыны быгатоз.

Вожвылъяськонэ оглом 15 эссеос но 17 ӵектосъёс вуизы. Вормисьёс пӧлын Челябинск, Калуга улосвылъёсысь, Красноярск шаерысь но Казахстанысь пиналъёс.

Тодэ вайытом, Глазкарысь институтлэн ӵектосэз «Моя страна – моя Россия» огъяросси конкурсын 23 устоосыз пӧлы пыриз.

Иворъёс

Ижкарын 12 номеро нылпи садлэсь Сельхозвыставка но Пазелы палан улӥсь пиналъёслы выль корпуссэ усьтӥзы. Со сярысь «ВКонтакте» мерлыко вотэсысь бамаз элькунлэн тӧроез Алексанр Бречалов ивортӥз.

Выль ужъюртэ 116 пиналъёс ветлозы.

Вить группаос, поръяны паськыт интыос, трос луонлыкъем зал, сылалэн шоканы висъет, туала тӥрлык, анимацияя, робототехникая но леголэсь лэсьтӥськонъя лабораториос – нылпи садын пиналъёслы азинскыны вань луонлыкъёс вань
Александр Бречалов, Удмуртилэн тӧроез

Нылпи сад 112 миллион манет тыр усиз. Солэн бадӟым люкетэз «Жильё и городская среда» йӧскалык ӵектосъя вуиз, 30 миллион манетсэ та микрорайонын пуктӥськись компания висъяз.

Тодэ вайытом, таяз арын Удмуртиын нылпи садъёсын йӧскалык ӵектос улсын оглом 1 сюрс 400 пала интыос усьтозы

Ватсалом, та дыре Ижкарын «Демография» йӧскалык ӵектосъя кык нылпи садъёс пукто. Со Берш нимо ульчаын 220 интылы куинь этажъем юрт но Машиностроительёслэн городоказы 150 интылы. Соосты 2022-тӥ арын усьтыны чакламын. 

2021-тӥ арын Удмуртиысь 110 дышетон ужъюртъёсы 3 сюрслэсь трос компьютер тӥрлык вуттӥзы. Со сярысь элькунысь дышетонъя но тодосъя министерстволэн пресс-службаез ивортӥз.

Школаос 3 сюрс 200 ноутбукъёс, трос луонлыкъем 110 устройствоос но «Точка роста» центръёсы 117 огмет компьютер техника басьтӥзы

Ваньзэ сое «Образование» йӧскалык ӵектос улсын ужась «Цифровая образовательная среда» улосвыл ӵектосъя вуттӥзы. Со понна федерал но улосвыл коньдэтъёсысь 212 миллион манетлэсь трос коньдон висъязы.

Пусъём, элькунамы «Цифровая образовательная среда» ӵектос 2020-2024 аръёсы ужалоз. Нырысетӥ араз отчы 102 дышетон ужъюртъёс сюризы. Озьы, школаосы но шор ёзо ӧнер дышетсконниосы 3 сюрс 72 ноутбукъёс, 216 интерактивной огъетъёс но дышетӥсьёслы 216 ноутбукъёс басьтӥзы.

Нырысь-валысь чакламъя, 2022-тӥ арын выль тӥрлык эшшо 62 школаосы вуттозы, 2023-тӥ арын – 100 школаосы, нош 2024-тӥ арын – 68 школаосы.

Тодэ вайытом, 2021-тӥ ар пумозь Удмуртиысь школаосы 110 автобусъёс вуозы.

Новосибирскын ортчем «Навыки мудрых» IV йӧскалык чемпионатын Удмуртиысь пыриськисьёс ньыль медаль утӥзы. Со сяна, ӧнерлыко луэмзы понна куинь медальон басьтӥзы. Чемпионатлы йылпумъянъёс 8-тӥ коньывуонэ лэсьтӥзы, ивортӥз элькунысь дышетонъя но тодосъя министерстволэн пресс-службаез.

Игорь Перевозчиков «Электромонтаж» ӧръя зарни медаль утӥз. Нош куинез пыриськисьёсмы бронза медальёс басьтӥзы: Алик Ишкулов — «Веб-дизайн и разработка» ӧръя, Ирина Гладкова – «Физическая культура, спорт и фитнес» ӧръя, Валентин Антропов – «Эксплуатация сельскохозяйственных машин» ӧръя

Медальонъёсын Тамара Соколоваез («Поварское дело» ӧръя), Елена Веретенниковаез («Дошкольное воспитание» ӧръя) но Эльвира Халтуринаез («Организация экскурсионных услуг» ӧръя) пусйизы.

Йӧскалык чемпионатлы йылпумъянъёсъя Россиысь улосвылъёслэн кубоксылэн зачётаз медальёслэн лыдзыя Москва но Новосибирск улосвылъёс устоосыз луизы, кыкетӥ интые Кемерово улосвыл потӥз, куинетӥ Челябинск улосвыл луиз

Пусъём, 50 ареслэсь мӧйыослы ӧнер устолыкъя ӵошатсконъёсы 64 улосвылъёсысь 300-лэсь ятыр адями пыриськиз. Финалын Удмуртилэсь данзэ укмыс мурт утиз. Вожвылъяськонъёс сизьым удысысь 28 ӧръёсъя мынӥзы. Нырысьсэ устооссэ «Ветеринария», «Социальная работа» но «Кузовной ремонт» ӧръёсъя шараязы.

Конкурсантъёсты Новосибирскын интыяськем Ӵошатсконъёсын кивалтон центрысь экспертъёс дунъязы. Пыриськисьёс заданиосты ас улосвылъёсысьтызы нимысьтыз радъям лабораториосын, мастерскойёсын быдэсъязы. Удмуртиын соос Ижкарын, Сарапулын но Уваын кылдытэмын вал. 

Россиысь финн-угор калыкъёслэн VII ӧтчамзылы дасяськон улсын 7-тӥ коньывуонэ «Удмурт Кенеш» огазеяськон кичӧлтэмен йӧскалык лулчеберетэз дышетон ужпумъёслы сӥзем котырес ӝӧк ортчиз. Ужрадэ ивортодэтъя «Удмуртия» агентстволэн корреспондентэз но вуылӥз.

Кенешонэ Удмурт кун университетлэн лыдӟетъюртаз ортчем пумиськонэ дышетонъя но тодосъя министерстволэн, йӧскалык политикая министерстволэн, вылӥ дышетсконниослэн ыстэм муртъёссы, Ижкарысь но Глазкарысь школаослэн кивалтӥсьёссы но дышетӥсьёс пыриськизы. Соос асьме элькунмы но быдэс финн-угор дунне понна лэчыт ужпумъёсты ӝутӥзы, соосты сэрттыны-пертчыны луонлыкъёс но амалъёс сярысь вераськизы.

Рос-прос ӵектонъёс дасяллям Йӧскалык дышетонъя институтысь ӧнерчиосты, соосты ужъюртлэн кивалтӥсез Надежда Ураськина шараяз. Кылсярысь, соос финн-угор кылъёсты дышетон удысысь экспертъёслэсь огъя лыдметсэс кылдытыны ӵекто. Та дыре программалы, учебниклы яке статьялы рецензия гожтыны дунъясьёсты шедьтыны ум быгатӥське, шуиз институтлэн кивалтӥсез.

Со сяна, Россиысь калыкъёслэн анай кылъёссыя федерал институтын котькуд финн-угор улосвыллэсь внештатной ужась яке координатор мед луоз вылэм шуыса пусйизы. Надежда Ураськиналэн кылъёсызъя, али Кыдёкысь Уйпалын улӥсь ӧжыт лыдъем калыкъёсын гинэ уж мынэ, потэ вылэм финн-угор калыкъёсын кусыпъёс мед юнматозы шуыса.

Озьы ик Йӧскалык дышетонъя институт финн-угор кылъёсты дышетон методикая но педагогикая огазе журнал кылдытыны но поттыны ӵектӥз. Али Scopus базае пырись журналын статьяез печатлан понна 80 сюрс манет тыроно, автор яке авторъёс асьсэ коньдонзэс сётоно луо. Финн-угор улосвылъёс понна журналын печатласькон дунтэк яке пичи дунын мед луыса, пусйиз Надежда Ураськина.

Йӧскалык дышетонъя институтлэн ӵектонъёсыз пӧлын дышетон но визьнодан теория но методика ӧръя огъя диссертаци кенеш кылдытон. Сотэк асьмелэн тодосъя кандидатъёсмы но, докторъёсмы уз луэ, пусйиз институтлэн кивалтӥсез.

Кенешонын шараям куд-ог ужпумъёсты улосвыл но муниципал ёзъёсын эскерыны луоз,

Читать полностью
Наверх
Вниз