Ижкар+1 °C
30 -тӥ шуркынмон 2021 Пуксён
18+

Кыккылолыклэн умоез но уродэз сярысь вераськозы Вавожын 31-тӥ южтолэзе

  • 649
  • 0
Вавож / Удмуртия
Кыккылолыклэн умоез но уродэз сярысь вераськозы Вавожын 31-тӥ южтолэзе
Фото: udmlib.ru

Кыккылолыклэн умоез но уродэз сярысь «Анай кылын азвесь чуръёс» пумиськон ортчоз 31-тӥ южтолэзе Вавожысь ёросысь лыдӟетъюртын. Со сярысь иворъёсъя «Удмуртия» агентстволы вераз ёрос лыдӟетъюртысь нылпи ёзэтын ужась библиотекарь Антонида Коротаева.

«Ми сое ортчытӥськом дошкольникъёслэн РМО-енызы (нылпи садъёсын ужасьёслэн ужан методикая ёрос огазеяськонзы — ред.) огазе ёрос библиотекаен. <…> Со кичӧлтонэн потӥм ми, лыдӟетъюрт. Садикъёсын ортчыто табере декада анай кылэз дышетонъя. Со декадаын соос мар ортчытозы, татчы соос лыктозы ини видеоотчетэн», — вераз Антонида Коротаева.

Ӧнерчиосын пумиськонын кыккылолыкъя визьноданлэн умой но урод палъёсыз эскеремын луозы, быгатоз-а нылпиослэн визьзы сыӵе «ныпъетэз» вормыны шуыса кенешозы. Со сяна, вераськозы, кыӵе шуг-секытъёсын пумиськоно луозы кыккылолыко нылпиез будэтӥсь анай-атайёс, ку ватсано нылпиослы кыкетӥ кылэз но соин герӟаськем мукет ужпумъёс сярысь.

Ужрадэ ёросысь нылпи садъёсысь визьнодасьёс, удмурт лулчеберетэз утёнъя «Удмурт корка» центрысь азьветлӥсьёс, ёросысь «Удмурт Кенеш» огазеяськонлэн ёзэтэзлэн тӧроез Геннадий Шубин пыриськозы. Со сяна, Антонида Коротаевалэн верамезъя, ӧтемын луоз на «Удмурт нылкышно кенеш» огазеяськонлэн тӧроез Надежда Степанова. Али соин со пумысен кенешонъёс мыно.

Удмурт кылэз утёнъя ужан амалъёссы сярысь иворъёсъя «Удмуртия» агентстволэн корреспондентэзлы вераз Вавожысь «Журавушка» нылпи садысь удмурт группаысь визьнодась Екатерина Вильмон.

«Удмурт группамы вань. Отчы 24 адями ветлэ. Ваньзы ӟучомемын. Удмурт сямен нокин но уг ни быгаты вераськыны. Соос воксё уг валало удмурт сямен. Анай-атайёссы уг верасько удмурт сямен одӥгзылэн но. Мон соосын тыршисько удмурт сямен вераськыны. Нырысь ик вераськыны кутскыкум уг валало вал ай, али умойгес ини, валаны кутско ини. Анай-атайёссы пумит ӧвӧл, дышетэ шуо. <...>Дышетӥськом кылбуръёс, выжыкылъёс лыдӟиськом, шудонъёс шудӥськом, лыдъяськонъёс дышетӥськом — фольклорез кутӥськом», — шуиз со.

Ватсалом, Вавож ёросын туннэ 11 нылпи садъёсын 25 удмурт группаос ужало. 



Наверх
Вниз